Mark 4
4
Wheat hae puravai velaripe parabole
1Are va kai ma haru poe ve iroro ipopeavape. Areve leia haela oaria korukaiavahaeape, laelave are va vevaea hekai horeai avape — kai haela oaria ma poe ve avape. 2Are erero eharu oaria parabole ila kileavahaeape. Areve kilea oharo uku maria, 3Iapaila — haela ae wheat hae puravai velarikive hoaupe. 4Are puravai velaripe hoa — hae uku oki poe ve hohoape, ori merava kihoahukai erero la ka leipe. 5Uku hae have ita hohoape — leia kekela parura va ka, ere aheaupe, ehovea kekele heheroro. 6Aka hare akea pekape la hoa ere va ahea iele lei le haroropape, ehovea ere va elele karia. 7Uku mamareke ureve hohoape — la kora mamareke aheai erero le havuopape, laelave ereve iele karia. 8Hae uku kekele vovohoro ila ve hohoape — ere aheaupe kai iele oaria horeavape — hae uku iele 30, uku iele 60, uku iele 100. 9Are maeaeape, Avako ila haela are iapakilai.
10Are lahua aeape la hoa ere are i hareho avape haela, 12 haela kara, arero parabole ve iele apevelavela leipe. 11Are erero maeaeape, Aualari ve basileia ve muruhari eharu ore leiki okiharo e le avape, aka mahokaea haela ma eharu oaria ela parabole hiki maeaeakilai. 12Ehovea ere va eavakilai aka auhohi eava va ka, iapakilai, aka auhohi iapa va ka: ere va hare aea iki helarivahaeaki ave, kai ereve mai haeae hapururukaki ave. 13Are erero maeaeape, E va ma parable ve iele haveva ha? Laelave e va lehae lei parable oaria ra ore leikilai ha? 14Puravai velariki haela — are va oharo veveke puravai velarivila. 15Okiharo poe ve hohoaki la hae hoveahovea haela oharo veveke ra iapakilava: diabolo ereve iki ureve puravai velaripe la oharo haiapo va ka le hareavakilai. 16Laria kara have ita hohoape la hae. Haela oharo ra iapakilava, ikiveveke ila iapakilai. 17Aka ereve elele va karia — laelave ere va hare uku hiki aheke leilula — aireaki — heraho hoa kai hararuaki hoa ra kihorerakilava, ehovea oharo veveke ve harihari, ere elavelave hihilaukilai. 18Kora mamareke ureve hohoape la hae kara laria — Haela oharo ra iapakilava, 19Aka meahaiapo ve heraho, erohoho ve amuraeharae, aeva eharu oaria ikivere mai ereve iki ureve arahavaki oharo veveke ere haehaharoavakilai, laelave ereve hae karia. 20Kekele vovohoro hohoape la hae maria — haela oharo veveke iapai le avakilai, kai hae veveke oaria le horeavakilai, uku iele 30, uku iele 60, uku iele 100.
Lamepa ve ihova: Hae aporaki ihova
21Are erero maeaeape: Haela lamepa kohu ihau ve aka avuku haha ihau ve aepakive heroe ha; kai are havahu ve haha akea ve aepa va ka ha? 22Ehovea aiarapape eharu oaria hihika leikilai — muruhari eharu kara haela oaria eavakilai. 23Haela avako ila la leikilava, are iapakilai. 24Are erero maeaeape, Eve iapaki mai kiva auhohi leila — ehovea e va haela aiarakilai hoveahovea ero aiarakilai — e iapa veveke haela ero oaria havahu aireaki aiarakilai. 25Ehovea eharu ila la haela — eharu kepea arero ae va aiarakilai — eharu karia la haela are oropa aeape la eharu ere hareavakilai.
26Are mariape, Aulari ve basileia haela ae kora mere kekele ve apoporauve hovea. 27Aireaki are avuku uavakilai, kai oroa i hare ila urouvila. La kora mere horera ahakilai, lehae lai areve iele va, are haveva. 28Ehovea kekele are havahu hae horeraki horova leivila, oropa ikupa, aireaki rorore, aireaki hae rorore ureve. 29Hae hovare ra leikilava, are la hoa hoi ila haerapakilai, ehovea eapai ikaeaki hoa hovea havahu.
30Are mariape, Ela Aualari ve basileia learia maeakilai ha? Aka le eharu hovea arilai? 31Are va mustard hae hovea. Mea ve aporaki hoa are va hae oaria ve hekai iele. 32Aka arero ra aporakilava are ahakilai aiai oru eharu oaria are heaoravaeakilai, areve mamaeako ehoaha i heahapiki leilula, laelave ori merava oaria areve kavu ureve loro aealula.
33Parable oaria laria are erero oharo veveke kileavahaeape, ereve iapa mai hovea hovea. 34Are va erero parable okiharo hiki kileavahaeape. Kai ere lahua apeape hoa eharu oaria are kilea haela hihika kileavahaeape.
Iesu mea heaha haerapape
35La hare, hailaea hoa, are erero maeaeape, Elava ukai elahukakilai. 36Ere haela oaria paparaehape, aireaki ere arero vevaea ureve lai horeape, vevaea titaeka oaria kara ere i hareho. 37Mea heaha eapapo hareavape kai ma loru ehoaha vevaea le havuopape, vevaea ure ma heloekoape. 38Are evoe ve aihari aipei avuku uavape. Ere arero hurapai mari maeape, Haelapo, ela va ma ihahakive leiro, a kekela va ka ha? 39Are urai mea i ma ila oropai maeaeape — maria, Kahara, here leila. Mea le haerapape, kai ma here leipe. 40Are erero maeaeape, Ipi leve e oaoka laleila ha? Ehovealeve e va iki mekari kelava va ka ha? 41Ere va ikihorahora eapapo leivahaeape, kai elare oharo hukavape maria, Maia le haela ha? Mea i ma ila areve oharo iapa hiki lae.
Právě zvoleno:
Mark 4: ORO
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Published by the British and Foreign Bible Society 1963-1972