Mark 5
5
Gerasene ovehahu ila haela lei veveke leipe
1Ere ukai poe elahuka Gerasene haela ve ita pekahavape. 2Are va vevaea ve ra ukaki, haela kapu ita ve kihorera arero miri koarape. 3La haela va kapu ita aeaveape. Haela arero mai haha va hovea ka, kaire — aori horou kara hovea ka. 4Ehovea ere va arero mehaemehae chain havahu hahaeroape, aka are va la chain oaria au koeraearoape, haela oaria are i maraha va ka. 5Oroa i hare oaria ila are kela ve aeaveape, kai kapu ita kara are va hi o kaoka eapapo ape, kai maea iilu have hai heaha iele. 6Are Iesu arai ve eavi vivila areve oropa ve ekaopape. 7Ara hai kara maria itavape, Ara va aro leari leikilai ha, Iesu Akea ve Aualari ve Akore? Ara Aualari ve oropa aro ahilave — a araro ka hararuarue. 8Ehovea are arero maeape, A va ovehahu hirihiri heaha arero harepai havoava. 9Are arero velavela leipe, Ave rare leita ha? Are kavale maeape, Arave rare va Legion, ehovea ela ove oaria. 10Ere arero here leipe erero ita lahua paparaeha va arekaea. 11Kela ita leia ilaita oaria korukai eapai lalavahaeroape. 12Ovehahu oaria arero velavela leipe, Elaro la ilaita ve ureve paparaehakive, ela va ereve ureve arahavakilai. 13Are erero le paparaehape. La ove hirihiri heaha oaria arero harepai kihoreavi ilaita ve ureve arahavape: La ilaita oaria harava kaiko ukai hoahuka ma ve le titavape: (ere va 2,000 hovea) ere oaria hareho ma ihahape.
14Ilaita kiva haela vivila karikara hihi ve la oharo hukavape, kai kaipure kara. Ere oaria horeavape ehovea la eharu ve iele ore leikive. 15Ere Iesu leia horeavape kai ovehahu legion avape la haela eavape — are va pura veveke oaria ikiore lei hahari titavape. Ere iki le ihahape. 16Eavavahaeape la haela la ovehahu ila haela ve hari erero maeaeape — la ilaita ve oharo kara. 17Ere Iesu velavela leivahaeape, ereve ita harepakive. 18Are va vevaea horera, ovehahu avape la haela arero velavela leipe arero koarai elaukive. 19Aka Iesu arero mari maeape, Arekaea. Av' aea. A havahu ve la ita aula ave apavara haela oaria maeaeaki Amua aro leari maea laleila ae va aro leari ikihuru laleila. 20Are ai Decapolis ita oaria Iesu arero leipe la maea hovea oharo kopurapape. Haela oaria iki le ihahape.
Jairus ve mari: Apu epavape uamari
21Iesu vevaea horeai ukai elaukape: haela oaria areve leia korukaiavahaeape are va ma haru poe ve epavape. 22Iapai, synagogue ve kiva haela rare Jairus, areve leia ekepe. Are arero eavi areve loa ipi ve ekaopape. 23Are arero velavela maria leipe, Arave mari hekai apaki ve maia iele. Ara aro here leive — ekela, iki arero mai koharaki, are veveke leikive, are kai ovokake le leikilai. 24Iesu are i hareho aupe. Aka haela oaria erero koarai auvahaeape, kai areve oki au hereavape. 25Uamari ae va apu epavape, areve la maea hitolo 12. 26Are muramura haela oaria maea hovave overa leipe, laelave areve moni kari leilei, aka are veveke au leila, ae va heaha eapapo leipe. 27Are Iesu ve hari iapai areva areve aire aupe, haela oaria ve aru ve kai areve pura mai koperereape. 28Ehovea areve ikikekela maria, Ara areve pura hiki ra koperereakilava, ara maea veveke leikilai. 29Areve apu maea elavelave karia le leipe. Are va maea ure la hohipeva, areve maea veveke le leipe. 30Iesu leia ore leipe, areve maea ve aheke uku le horeavi ka leipe, are haela oaria hihi ve helari maeaeape, Arave pura pao leita mai kolapererealila ha? 31Areve kilea haela arero maeape, A va haela oaria au eavakue ha? Ere va aro elari hupakai ereru velaru leiaro. Ehovealeve a maria avilara — araro leita kai kolapererealila ha? 32Are helari lari leipe la haela haropi ovohae eavakive. 33La uamari oaoka lei ikihorahora leipe. Ehovea areva ore areve maea leipe la eharu. Are iki areve oropa ve ekaopi oharo iele arero maeape. 34Are arero maeape, Mari e, ave ikikekela aro lei veveke laleila. Havila ra avi aula, ave maea veveke la.
35Are leia avi hehe uvi kiva haela ve haela uku ekevahaeai arero mari maeape, Ave mari le api. Ehovea leve a la Haelapo aeka hararuavilava? 36Iesu ere maeape la oharo iapai are synagogue ve kiva haela mari maeape: Oaoka kalailue — iki kekela hiki. 37Are haela oaria au hereavape: Peter i James i John, James ve akoreheari ila, ere hiki arero airekai pekahavape. 38Are synagogue kiva haela ve uvi ekepe, kai hivi i hivavara i arura haela oaria eavape. 39Are uvi pekape la hoa are erero maeaeape, Ma ikihahika kai hivavara oaria ehovealeve? Mari huru havahu va ka — are avuku i aeave. 40Ere arero area keavape. Are erero oaria hukilala paraeape, kai oa i lou ila kai are i hareho ekevahaeape la haela hiki karape. Ere mari aeaveape la lalava ureve pekahavape. 41Are mari hekai mari maeape, Talitha cumi. La oharo ve iele, Mari e, ara aro maeaive — Urou. 42La mari elavelave urai loa veavelaripe, areve epape hitolo 12. Ere oaria iki le ihahape. 43Are erero muruhari maeaeape ere haela ae maea va arekaea; Are erero maeaeape, Mari hekai eapai avaraki, are larive.
Právě zvoleno:
Mark 5: ORO
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Published by the British and Foreign Bible Society 1963-1972