Mark 6
6
Nazareth haela Iesu haure leipe
1Are leia harepai elare ita hoaupe. Areve kilea haela arero airekai auvahaeape. 2Sabati hare are synagogue oharo kileape. Areve oharo iapape haela oaria ikihorahora leivahaeape kai mari ape, Ma haela ma eharu lahoa ve aeape? Ma arero avarape ikiore learia, ehovea are horova ehoaha leivahaevila? 3Maia evera haela hiki, Joseph ve akore, James i Joses i Juda i Simon ila ve apoheari ka ha? Areve maritaloa ela i hareho apea va ka ha? Ere va arero ikihairihairi leipe. 4Aka Iesu erero maeaeape — Peroveta haela ve morapaea?-?kiaue leikive ita elare ita hiki, elare karikara hiki, elare apavara hiki, elare uvi haela hiki. 5Are va leia horova ehoaha oaria hovea ka: maea kakare haela haroapo‐haroapo hiki are va mai koharai lei makukuripe.
Aposetolo haela 12 paparaehape
6Are va ikihorahora leipe ehovea ereve ikikekela karia. Are helari karikara oaria iroro ape.
7Are haela 12 itavavahaeape kai erero orahoka orahoka paparaehape. Are erero aheke avarape ehovea ovohahu haruapakive. 8Are erero ahilape — ere va hahi eharu kaealue, mai kaika hiki, aroa va ka, pai va ka, moni pausi haroka. 9Aka loa iilu oraki, kai pura kepea va arekaea. 10Are erero maeaeape, E va lela ita aeva uvi ra pekahavakilava, la uvi hiki apeapea e va la ita harepakive. 11Ero auhohi leiki aue ra leikilai la haela kai eve oharo iapaki aue ra leivahaeaki la haela, e va la ita harepaki hoa eve loa hara ve kekele mahuvu leia ve hareavaki, ihova erero kileakive. O iele ara ero maeaeaive, aireaki heheavaki hare ve Sodom i Gomorrah ila perehekai veveke leikilai, aka la karikara veveke lei va ka. 12Ere hoahukape kai mai haeae ve ikihuru leikive iroro ape. 13Ere ovehahu oaria haruapape kai maea heahaha haela oaria la‐apu huhariri la, ere veveke le leivahaeape.
John Baptist apape hari
14Ereve hari Herod amua iapape, ehovea areve rare ita oaria haela iapape. Kai Herod mariape, Leia John Baptist karu ve roulaila, laelave areve horova ehoaha oaria hihika leivahaeavila. 15Uku haela mariape, Are va Elias la. Uku haela maeape, Peroveta haela la, aka peroveta haela ae va la. 16Aka Herod iapai mari maeape, Are va John Baptist, ara haro haerapape la haela la, are karu ve la roulaila. 17Ehovea Herod havahu haela paparaehape John paeakive kai arero uvi muru hahape, ehovea Herodias areve apoheari Philip ve uva ve harihari — ehovea are arero laeape. 18Ehovea John Herod mari maeape, Ave apoheari ve uva laeakive pupu ila. 19Laelave Herodias arero ikiheaha leipe. Are ikivere arero harive, aka areve oki karia. 20Ehovea Herod ore overa leipe John va mai ehoe hehe haela ae, laelave are arero oaoka leipe, kai areve kilea oharo iapape. Are areve oharo iapai ikiveveke lei horova veveke le leipe. 21Hare veveke kihorerai, Herod areve epape hare hurai leipe, kai amua haela oaria i Galilee captain haela oaria ila la hurai ve itavavahaeape. 22Herodias ve mari hekai mahea harape, kai Herod i hareho avape la haela oaria ikiveveke leivahaeape. Amua la mari mari maeape, Ave ikivere ra leikila la eharu velavela leiki, ara aro avarakilai. 23Are okoare arero maeape, Lela eharu hovea a velavela leikilai, aiai arave basileia ve ukai, ara avarakilai. 24Are hoai areve lou mari maeape, Ara le eharu velavela leikilai? Are kavale maeape, John Baptist ve haro ve rare la maeaki. 25Are kai elavelave pekai amua velavela leipe maria, Ara ikivere a va John Baptist ve haro haita ve aivaupi araro avikiaraki. 26Amua ikihuru eapapo leipe — aka ehovea are okoare overa maea, aeva ehovea are i hareho apeape la haela kara, are areve oharo au haerapaila. 27Amua la hoa havahu hevehe haela haroapo paraeape John ve haro haerapai avikekive; are uvi muru ureve areve haro haerapape. 28La haro kai haita aivaupi mari le avarape. Mari areve lou la avarape. 29Areve kilea haela iapai hoahuka areve maea ikupa kaivi koru le ihape.
Aposetolo haela hahi ve kihelaripe
30Apostle haela Iesu ve leia korukaiavahaeape, ere leivahaeape kai kileavahaeape eharu oaria arero maeape. 31Are kai erero mari maeaeape, E v'ekeila, elaviila lahua arahavakilai, leia iki perehekai paparaehakive, ehovea haela oaria leia ve aula kelari arura hiki, kai ere va eapai auhohi larive oki karia. 32Ere va muruhari vevaea hekai horeai ita merava haropakive. 33Aka haela uku erero horeavi eavavahaeape, ere kai arero ore leipe, laelave haela oaria karikara oaria ve kihoahuka loa auvahaeape, kai erero oropai areve la ita havahu koarape. 34Iesu vevaea ve hoai ukavi haela oaria eavavahaeape. Are erero ikihuru eapapo leipe, ehovea ere va mamoe hovea, kiva haela karia. Are erero oharo oaria kilea ipopeavape.
Iesu 5,000 haela eapai aiarape
35Hailaea mea ovoka i, areve kilea haela iki arero mari maeape, Maia va ita merava, ae va hare kari leilei. 36Erero paparaehai karikara haropakive, ehovea eapai ilaea leikive. 37Are erero kavale maeaeape, E havahu erero eapai aiaraila. Ere kavale maeape, Ela lehae? Ela va ai 200 denarius#6:37 See Mt 18:28 hovea ilaea leiki, erero aiaraki, ere larive ha? 38Are erero maeaeape, Eve pai leavaila apearo ha? Ai hoai eavaila. Ere ore lei arero maeape, Hue ila, kai ekaka orahokaila. 39Are erero maeaeape, Haela oaria hohe ve hiru hiru availa. 40Ere va hoa lahua lahua erereapai avape, hiru uku 100, uku va 50. 41Are pai hue ila i ekaka orahokaila ila kaili ovohae kaia ve iupepe: Are ivaiva lei pai haivavaelape, kai kilea haela aiarape ehovea haela oaria aiarakive. La ekaka orahoka kara are havuri haela oaria hovea hovea leipe. 42Ere oaria eapai lalavahaeai eharau huharavahaeape. 43Pai i ekaka ila ve hohoe ere kaili hara 12 heheloekoavape. 44La eapai lalavahaeape haela oaria 5,000 hovea.
Iesu ahea ma akea ve loa veavelaripe
45Aireaki are kilea haela vevaea horeakive maeaeape kai ukai oropa elahukakive, Bethsaida la karikara ve. Are lahua aeape ehovea haela oaria paparaehakive. 46Are erero paparaehai kela pekai ivaiva leipe. 47Hailaea hoa vevaea ma haru hihi ve avape, are kai lahua huru ve epavape. 48Are erero eavape ere para heraho leiroape, ehovea oropa mea hereavape. Oroa a hihi are ereve leia horera, ma akea ve erero oropai itaupe. 49Aka ere arero ma akea ve itauvila eavape, ere mariape, Ovehahu la! kai hivavara i ara hai ape. 50Ehovea ere oaria arero eavape kai iki ihahape. Are elavelave erero oharo maeaeape maria, Ikiveveke leila, maia va ara! Oaoka kalailue! 51Are ereve leia vevaea ureve pekape kai mea le haerapape. Ere va ikihorahora eapapo iele, iki le ihahape. 52Ehovea ere va are pai ve leipe la horova eapapo iki au kelavaila, ehovea ereve iki aheke.
Gennesaret maea haela lei makukuripe
53Ere ukai elahukai miri le pavape. 54Ere vevaea ve ukavi haela oaria arero ore leipe. 55La ita hareho ve haela oaria harava hukai kihoreavape kai ereve maea heahaha haela oaria are pekape la ita kari hoahukape. 56Are aupe la ita oaria karikara ehoaha titaeka ila, kaipure kara, ereve maea heahaha haela oaria oki poe ve aipevahaeape — kai arero here leipe — Ere va areve pura kao hiki mai koharakive — are mai koharape la haela oaria lei veveke leivahaeape.
Právě zvoleno:
Mark 6: ORO
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Published by the British and Foreign Bible Society 1963-1972