Mark 7
7
Pharisee haela horahora ehovea Iesu pupu uku hahaure leipe
1Pharisee haela i Jerusalem ve ekevahaeape hohoa haealula haela uku ila areve leia korukaiavahaeape. 2Ere areve kilea haela uku mai hirihiri ila (ehovea ereve mai ere au huhelavalaila) eapai laralula eavavahaeape, ere o vere ape. 3Ehovea Pharisee haela i Jew haela oaria ila mai auhohi huhelavahaeaki aue la leikilava ere va eapai lalavahaea va ka, ehovea ere uvari vilari ve la pupu kiva auhohi leivahaelula. 4Ere va ilaea leivahaea ita ve kihoahukaki hoa ere va mai ma huhelavahaeaki aue ra leikilava, ere va eapai lalavahaea va ka. Ae va pupu oaria leia vea ere iapai kiva leivahaelula: hekako huhelavahaeaki, kai elaa, berasi haita ila kara, kai eapai haha kara. 5Aire Pharisee haela arero velavela leipe, Ehovealeve ave kilea haela uvari vilari pupu kiva auhohi leivahaea va ka, aka mai hirihiri ila eapai laralula. 6Are erero kavale maeaeape, E opore haela e, Isaiah iele e v'ila peroveta oharo ape maria:
Ma vilakao araro ape iilu hiki morapaealula,
Aka ereve iki ureve ita apehai vea.
7Laelave ereve morapaea mai iele karia,
Ehovea ereve kilea oharo haela ve pupu oharo hiki.
8Ehovea e va Aualari ve pupu hahaure leivahaelula
Aka haela ve ikikekela pupu, hekako, elaa ila huhelavahaeakive la mai hovea, e leivahaelula.
9Are kai erero maeaeape, Iele havahu e Aualari ve pupu hahaure leivahaelula, ehovea e va elare pupu hiki kiva leivahaelula. 10Ehovea Moses mariape, Ave oa i lou ila momorapuki — kai areve oa i lou ila o heaha maeaki la haela arero huru harive. 11Aka eve oharo maria, Haela areve oa i lou ila ra maeakilava, a va arave oki avaki ikivere la eharu are Corvan (oharo ve iele Aualari ve meru) are va la eharu avara va ka. 12Laelave areve oa i lou ila koaraki pupu karia le lai. 13Laria e va Aualari ve oharo naoae naoae leivahaelula, ehovea e va elare pupu aheke leivahaelula.
14Are haela oaria itavavahaeai erero mari maeaeape, E oaria arave oharo iapaila, kai auhohi iapaila. 15Haela ve ureve arahavaki la eharu oaria ere va haela lei haeae lei va ka: aka areve ape ve kihoreavaki la eharu iele arero lei haeae leilula. 16Avako ila la haela, are iapakilai. 17Are va haela oaria harepai uvi pekape la hoa, areve kilea haela ma parable ve velavela leipe. 18Are erero maeaeape, E kara auhohi iapa va ka ha? E kekela va ka ha, eharu haela ape ra larilava, la eharu arero lei haeae lei va ka. 19Ehovea are iki ureve araea va ka aka areve eharau ve, kai e ra heavakilava, maea meheo la leikilai. 20Are maeape, Haela ve ape kihoreraki la eharu arero lei haeae leiki eharu va la. 21Ehovea areve maea ureve, iki ve kihoreavaki eharu oaria maria, — Ikikekela heaha, airi pavora mai, mai heahaha, haela haeaki mai, 22Korea mai, eharu oaria ikivere mai, haeae oaria, hehepo mai, ovohae heaha, o heaha, maea pelaea, ikihaveva oaria. 23Ma eharu heaha oaria ureve kihoreavalula, kai haela lei haeae leilula.
Ita lahua mari lei makuripe
24Aire are urai Tyre i Sidon ila ve ukai elaupe, — kai uvi haroapo muruhari pekape, aka areve arauki ita karia: 25Ehovea uamari ae areve mari ovehahu ila, areve hari iapai iki areve oropa ekaopape. 26Are va Greek uamari, areve ita Syrophoenicia. Are arero here leipe, areve la mari ve ovehahu avakakive. 27Aka Iesu arero maeape, Akoremari eapai oropa avaraki — ehovea veveke va ka akoremari ve eapai kaili avita ve oropa koavakive. 28Are erero kavale maeape, Kaire, Amua, aka haha ihau ve la avita, akoremari ve eapai erorova laralula. 29Are arero maeape, Ehovea ave la oharo — Aula, ovehahu ave mari overa harepai. 30Are elare uvi pekape la hoa, are mari avuku uavavila eavape; ovehahu overa vivilape.
Avako ipi hahuru o haveva haela lei veveke leipe
31Are va Tyre i Sidon ila la ita harepai Galilee ma haru poe ve aupe — Decapolis aru hihi ve la okiharo. 32Ere avako ipi hahuru i oharo haveva haela areve leia lai ekepe. Ere Arero here leipe arero mai koharakive. 33Are arero ita lahua lai ai areve mai lekoka avako ureve avarape, kai apea koa areve auli mai koharape. 34Are ovohae kaia ve iupepe, iki hoara ape, kai arero maeape, Ephthatha (oharo ve iele, Hapa). 35Areve avako elavelave hapape, areve auli avaro le leipe, kai are oharo hihika hukavape. 36Are erero ahilape haela ae va kamaealue. Are lari oharo oaria aheke iele maeaeape, aka ere va areve la oharo hihika kileavahaeape. 37Ere oaria ikihorahora eapapo leivahaeape, kai mariape, Eharu oaria va are lei mekaka laivila — are va avako ipi hahuru haela lei oharo le iapai, kai o muruha haela oharo le ara.
Právě zvoleno:
Mark 7: ORO
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Published by the British and Foreign Bible Society 1963-1972