Mark 8
8
Iesu 4,000 haela eapai aiarape
1La hoa au korukaiavahaeape haela oaria iele, kai ereve eapai karia, laelave Iesu areve kilea haela itavavahaeai mari maeaeape: 2Ara haela lakea ikihuru eapapo, ehovea ere ara i hareho apealula hare irehoila, kai eapai au laila. 3Ara erero elare ita ra paparaehakilava, ere va oki poe ve aitara areaukilai, ehovea uku haela ve ita apehai iele. 4Areve kilea haela arero kavale maeape, Haela ma ita merava ve pai lahoa ki avakilai, ma haela oaria ve eharau huha?-?ravahaeakive ha? 5Are erero velavela leipe, Eve leia pai leavaila apearo. Ere mariape 7. 6Are haela oaria maeaeape mea va au avakive. Are pai 7 kaili, thank you oharo ape kai pai haivavaela kilea haela aiarape, ehovea ereve oropa aipevahaeakive. 7Ere va leia ekaka titaeka haroapo haroapo kara — are ivaiva lei erero ahilavahaeape ekaka kara haela aiarakive. 8Ere oaria lalavahaeai eharau huharape. Ere kailape eapai hohoe hara 7. 9Eapai lalavahaeape haela oaria 4,000. Are erero elare ita paparaehape. 10Are i kilea haela ila vevaea horeai Dalmanutha ve ukai elahukape.
Are kilea haela aihukamaeape ehovea iapaki aue mai
11Pharisee haela kihoreavi arero au amurai arero kaia ve ihova ve velavela leipe: 12Are ove ve iki hoara mari maeaeape, Ehovea leve ma vilakao ihova ra haroparo ha? O iele ara ero maeaive — ma vilakao ihova ava va ka. 13Are erero haitapai vevaea horeai ukai elaupe.
14Kilea haela pai au availa, iki hoapai: vevaea ureve kara pai haroapo hiki. 15Are erero ahilape maria, Kiva auhohi leila, Pharisee haela i Herod ila ve pai aeaki ave. 16Ere elarelare iki heheavape maria, Ma oharo ehovea ela va pai au aeakiue. 17Iesu ereve ikikekela ore lei mariape, Ehovea leve e va elarelare iki heheavaro, ehovea e va pai au aeakue ha? Aiai ma hoa e iapa va ka ha? Aiai ma hoa e va iki aheke ila apealula ha? 18E va ovohae ila, kai eava va ka ha? E va avako ila, kai iapai va ka ha? E iki kekela va ka ha? 19Ara pai hue ila haivavaelai, 5,000 haela aiarape la hoa, e va eapai hohoi hara leavaila heheloekoavi kailape ha? Ere arero kavale maeape: 12. 20Aeva pai 7 haivavaelai haela 4,000 ra aiarape hoa e va eapai hohoi hara leavaila kailape ha? Ere kavale maeape: 7. 21Are erero maeaeape, Lehae lei, e va iki hoapape.
Bethsaida ovohae kariri haela haroapo
22Are Bethsaida pekape. Ere ovohae kariri haela areve oki lai ekepe kai arero apevelavela leipe arero mai koharakive. 23Are ovohae kariri haela mai pae karikara mahokaea ve lai aupe. Are areve ovohae apea koa arero mai kohari arero velavela leipe are va eharu eavape la? 24Are ovohae iupe kavale mari maeape, Ara haela kora kukupa maea aula kelalula eavave. 25Are va aeka areve ovohae mai koharape — kai ovohae iupekive maeape. Areve ovohae veveke le leipe, kai are haela oaria hihika eavavahaeape. 26Are arero elare uvi parae i mari maeape, A va karikara kaulue, kai karikara haela kamaeaelue.
Peter Iesu va Keriso hihika maeape
27Iesu i kilea haela ila mea hoahuka Caesarea Philippi la karikara oaria pekahavape. Ere oki auvahaeape hoa are kilea haela vela vela leipe maria, Haela va arave rare va leaora la ara leita ha? 28Ere kavale maeape, John Baptist, kai uku Elias, rare arura, kai uku peroveta haela are va rare aro. 29Are erero maeaeape, E va arave rare va leaora aro ara leita ha? Peter kavale maeape, A va Keriso iele.
Iesu areve aireaki api kai urouki maea kileape
30Are erero ahilape ere va haela ae va la oharo kamaeaelue.
31Are erero kilea ipopeavape maria, Haela va Akore kakare oaria, koarakilai, kai haela hoaha i oharo haela i hohoa haealula haela arero haure lei harilai, are va hare irehoila kai uroukilai. 32Are va la oharo hihika maeaeape. Peter arero oki lai aupe kai arero ovora kopape maria, Laria va arekaea. 33Are helari kilea haela ovohae eavape kai Peter erereape maria, Satan e, arave aireaki aula, ehovea ave ikikekela Aualari ve ikikekela hovea ka, aka haela ve ikikekela hovea hiki.
Elare maea kekela v'arekaea
34Are haela oaria i kilea haela ila hareho itavavahaeai mari maeaeape, Haela ae araro airekai ra ekekilava, veveke are elare kekela va arekaea, aka are havahu ve satauro oraiavi araro airekai ekekilai. 35Haela ae elare ovokake aheke leikive ikivere ra leikilava, are va ovokake le paua harilai. Haela ae elare ovokake arave harihari ve kai oharo veveke ve harihari ve ra havoavakilava, are ovokake iele koarakilai. 36Haela va meahaiapo eharu hareho ra aeakilava, kai areve ove ra havoavakilava, areve kavale iele lahoa? 37Aka haela areve Ove ve le eharu kakavai leikilai. 38Ma mai haeae i airi pavora ila vilakao hoa, arave harihari ve aka arave oharo ve makiri leiki la haela, aireaki Haela ve Akore, Areve Oa i aneru ila ve haharika ila kihoreraki hoa, la haela ve rare ve makiri leikilai.
Právě zvoleno:
Mark 8: ORO
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Published by the British and Foreign Bible Society 1963-1972