Mark 9
9
1Are erero maeaeape, O iele, ara ero maeaive, maia lai pavakila uku haela apihaea va ore va ka aiai ere Aualari ve basileia aheke ila kihoreaki eavakilai.
Iesu ve maea koelaripe
2Hare aukava ila kari le lai, Iesu Peter i James i John ila kela heaikiapo lahua kari pekape, ereve oropa ve maea koelaripe. 3Are pura hauhuka leipe, ovava hovea, meahaiapo haela pura huhelavaelula laria ka. 4Ereve oropa ve hihika leipe Elias i Moses ila. Ere kai Iesu i hareho oharo hukavape. 5Peter Iesu kavale maeape, Haelapo e, veveke ela maia lakivikahavila va! Ela va kovo uvi irehoila ra kukueakilai, aeva Ave, aeva Moses ve, aeva Elias ve. 6Ehovea are oharo iele maea va haveva, ehovea ere oaria oaoka iele. 7Meuru eapapo erero aeravahaeape — ara meuru ureve hape maria, Maia va ara iki akore havahu — areve oharo va iapai. 8Haiapo ka, ere va helari ovohae eavape kai haela au eavaila, ere i Iesu hiki apeape.
9Ere va kela ve ra kihoahuka Iesu erero ahilape ere ovohae eavape la haela ere haela kamaeaelue, aiai haela ve Akore karu ve aea kai uroukilai. 10La oharo ere va iki ureve kiva leivahaeape kai elarelare velavela leipe — karu ve aea kai urouki la oharo iele le ha? 11Ere arero velavela leipe maria, Ehovealeve hohoa haealula haela mari arurava, Elias oropa ekekilai ha? 12Are erero kavale maeaeape, Iele havahu Elias oropa ekekilai, kai eharu oaria auhohi karikikilai — kai haela ve Akore v'ila maria overa hape, are va kakare oaria koarakilai, kai haela arero haure leikilai. 13Aka ara ero maeaive — Elias overa iki la, kai haela ve ikivere mai ere arero lari leipe, overa hape la oharo hovea.
Ovehahu ila akore lei makuripe
14Are kilea haela ve leia kihoai haela oaria ere i elari apealula eavape — kai hohoa haealula haela erero velavela leipe. 15Haela oaria arero eavi elavelave iki horahora leipe, kai arero morapaeape. 16Are hohoa haealula haela velavela leipe, E va erero leari oharo velavela leipe ha? 17Haela haroapo arero kavale maeape, Haelapo, ara ave maia arave akore lai leikila, are va ikihaveva i ovehahu ila. 18Areve aura kerari hoa ovehahu arero laria hararuaveape. Areve ape ohare horeraveape, kai kao heheaveape, kai maea karoroka iele leipe. Ara ave kilea haela maeaeape ovehahu avakakive, aka ere va avaka va ore va ka. 19Are kavale maeape, Ikikekelakiaue vilakao e — ara e i hareho aeavila hare leavaila ha? Ara ero heraho leivila hare leavaila ha? Arero maia lai ekerurava. 20Ere arero lai ekepe — are arero eavi ovehahu elavelave areve maea hararuape. Are hilai mea ve arura ape, ohare horerape. 21Are la oa velavela leipe, Are ma maea leahovea koarape. Are mariape, Areve akore hekai hoa ve. 22Mea aea are a ve hareauvila kai ma ve hareauvila, ehovea apakive, aka a va horova hovea ra leikilava, elaro ikiheroe leivahaeai elaro koarakive. 23Iesu arero maeape, A va iki ra kekelakilava, ikikekelavila la haela eharu oaria aupovearai la. 24Akore ve oa elavelave o ma ila maeape, Ara iki kekelave — arave ikikekelaki aue mai hapururuka. 25Iesu haela oaria ra korukai eavape, laelave are ovehahu erereape maria, A iki haveva avako ipi hahuru ila ovehahu, ara aro ahilave, arero harepa, kai areve ureve va kai karaealue. 26Ovehahu hi ape, kai arero ra hararuape, heaha iele, aire arero le harepape. Are apape haela hovea leipe, laelave uku haela mariape, Are le api. 27Aka Iesu arero mai pae urapape, are kai uroupe. 28Ere uvi pekai kilea haela arero velavela muruhari leipe maria, Ehovealeve ela arero avaka va hovea au leila ha? 29Are erero maeaeape, Mari ovehahu eharu aeva avaka va hovea ka, ivaiva i ere aheke ila hiki.
Api kai urouki oharo aea
30Ere leia harepai Galilee aru hihi aupe. Are ikivere ka haela ore leikive. 31Ehovea are kilea haela kileavahaeape kai mariape, Ere haela ve Akore haela ve mai ve avarakilai, ere arero harilai: ere arero ha aireaki hare ilehoila are kai uroukilai. 32Aka ere va la oharo auhohi au iapaila, kai arero velavela leikive oaoka leivahaeape.
Maeoka mai veveke ikivere leiki
33Ere Capernaum hoahukape. Ere va uvi pekai are erero velavela leipe, E va oki leia le oharo ve o hahari laila ha? 34Ere oharo ka, ehovea okiharo leia ere elare oharo ve o hahari ape — ereve oropa haela leita. 35Are haiavape kai haela 12 itavavahaeai erero mari maeaeape, Oropa leikive ikivere la haela, are va aireaki haela laikilai, kai haela oaria ve horova leikilai. 36Are akore hekai la ereve aru hihi aepape — are arero mai hahavi erero mari maeaeape: 37Maria akore hekai la arave rare ve auhohi leiki la haela, are araro kara auhohi leikilai, kai araro auhohi leiki la haela are araro kiparaeape la haela auhohi leikilai.
Horova haela ae haure lei v'arekaea
38John arero maeape, Haelapo, ela haela ae va ovehahu ave rare ve haruapai la eavape. Are ela i koarai vea ve ka, laelave ela arero erereape, ehovea are ela i hareho au koarai veaila. 39Aka Iesu erero maeaeape, Arero kaererearue, ehovea arave rare ve horova eapapo leivila la haela, are araro naoae heaha lei va ka. 40Ela i iri leiki aue la haela, are va elave haela hovea. 41Haela ero ma hekako haroapo arave rare ve ra leikilava, ehovea e va Keriso ve haela, o iele ara ero maeaeaive, are va kavale veveke havoava va ka.
Haela ae ka hereavalue
42Haela ae arave rare kekelavila mari akore hekai haroapo la hararuakilava, veveke, wheat hae haipepekaki have areve karave heropi arero avavu ve paraeakive, ma ihaukive. 43Ave mai ukai aro la hararuakilava, koerapa — veveke perehekai maria, mai ukai hiki karia, ovokake ve basileia araeakive, aka mai ukai ukai ila ere Hell ve laria hiki hahavila la a aro ure ve paraeaki ave. 44Leia ereve hehee apihaea va ka, a kara huhura va ka. 45Ave loa ukai aro la hararuakilava, koerapa — veveke perehekai, mari loa ukai hiki karia, ovokake ve basileia araeakive, a va loa ukai ukai ila ere Hell ve laria hiki hahavila la a aro ure ve paraeaki ave. 46Leia ereve hehee apihaea va ka, a kara huhura va ka. 47Ave ovohae ukai aro la hararuakilava, haoavi, aukapa — a ve veveke perehekai maria ovohae ukai hiki, Aualari ve basileia araeakive, a va ovohae ukai ukai ila Gehenna ve laria hiki hahavila la a ere aro ureve paraeaki ave. 48Leia ereve hehee apihaea va ka, la a kara huhura va ka. 49Ehovea haela oaria kaikara a ila ve bapatiso leikilai: arura horova oaria kara kaikara lei veveke leikilai. 50Kaikara va veveke — aka kaikara heaha ra leikilava, e va arero learia lei veveke leikilai? E va elarelare ureve kaikara kiva leikive, aireaki e va hareho havila ila apeakilai.
Právě zvoleno:
Mark 9: ORO
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Published by the British and Foreign Bible Society 1963-1972