Mateus 2
2
Marahara Lei Mweyamweyar Ra La Bwitiwo ma Hotiwo
1Hesus e fad ma räni wotawotara Betlehem ra e mire Yudea ifiri-mo e king Herodes. Nga palüül mwaare ra la tanaho ifiri titiini fidi, la bwitiwo ma hotiwo lada bwitiwo Yerusalem, 2lada hadiya bwa, “Iya riweisira e fad bwa ebwe yael lei Yudea king? Hai käkäne fidira hannahahir ra e bwitahe ma hotiwo, haida bwitoho bwa haibwe haparüye.”
3King Herodes e tai maho faringörüngön ifiri mena e longolongo titiror, nga urutael sawori Yerusalem nga iila mwo nga e tai maho faringörüngörüül. 4Herodes eda fadöngü fängäniil urutael marahara tamoni paderei ma lei tanahori farau eda hadiyael bwa, “Iya na ebwe fad Mesias ma irang?”
5Lada haüya bwa, “Ebwe fad ma Betlehem ra farüyeri Yudea, bwa iyera-mo profeta e farüye bwa,
6‘Betlehem ra e mire Yudea,
e tai heer na haühühüri halofalofari wotawot ma Yudea;
bwanasahü heer sapir nga erau bwitoho demarü tamoru
bwa ebwe yarael yai sawo Israel.’ ”
7Herodes eda fadöngülarango marahara la bwitiwo ma hotiwo ifiri uwolongolongora e hamwaromwaro titiin eda welawau ma iyoloil niyatora e nnahato fidira ma irang. 8Eda hataliletiwo marahara Betlehem nga e haüül titiror: “Hau raho hauda hamahowa yami kupeti riweisira, nga hauda weli hauda tabongariyei bwa ngaangu-mo nga ibwe raho haparüye.”
9-10Lada buwou lada süye lada fatare, nga lada para käkäne fidiwe la käkäne ma hotiwo. Ifiri mena la käkäne fidira nga eda yalaraho dewa mahori faringörüngörüül ma yael kkele! Eda taali fidira imowael eda tohongari burukara riweisira e mire irang. 11Lada itirango räni iimwara lada käkäne riweisira ma neirar Maria, lada hadobuhuyetiwo lada haparüye. Lada iteriniwou marahara hadiyael kolt ma frankincense ma yalöngü ra iitar mir lada hariya Hesus.
12Lada wehitafaari uwawori farüyael nga la taühü par deyau yaar, bwa Dios e tabongariil ma räni yaela ttar bwa la tawai wehitafaari iyolori Herodes.
Mwaroraho Ekipto
13Werimwiliri na lada süya nga yaari Tamoru anghel eda hirengari Hosei ma räni yara ttar eda haüya bwa, “Herodes ra ebwe kupeti riweisira bwa ebwe riiya. Simwatahe! Hädi riweisira ma neirar hauda mwarotiwo Ekipto eda tohongari na ibwe hauho bwa haubwe süya ma irang.”
14Hosei eda simwatahe eda hädi riweisira ma neirar lada süya nibwongi lada bwitiwo Ekipto, 15lada mire eda tohongari na e made Herodes. E faülüyehi mere bwa ebwe nnah bwa hatödü-mo Tamoru e faaülü profeta bwa ebwe tapa, “I fadöngüwau na Rai Mwaare ma uwawori Ekipto.”
Faiinil Riweisi
16Ifiri na Herodes eda welawau bwa marahawe la bwitiwo ma hotiwo la hosowa, e yalaraho dewa yaar dong eda itewau ramar bwa labwe riil urutael happala mwaare hara luwouwa madirapael ma marahara maifari luwou madirapael ra la mire Betlehem ma räni wotawot hara idelaye. E faülü mere bwa e tabweya ramawe marahawe la bwitiwo ma hotiwo la haüye bwa yatowe e nnahatoho fidiwe ma irang.
17E faülüyehi mere eda nnah bwa hatödü-mo e dölü profeta Eremias:
18“E wol raam ra la longolongo ma Rama,
ra tangiri tammaüri faringörüngörü.
Rahel e tangitil wonour
nga e tamasari na ebwe sipeyahi,
bwa lada mori ppari made.”
Wehitafaari ma Ekipto
19Werimwiliri na e made Herodes, nga yaari Tamoru anghel eda hirengari Hosei ma räni yara ttar ma Ekipto, 20eda haüya bwa, “Simwatahe hoda hädi riweisira ma neirar hauda wehitafaari Israel bwa marahawe la laweri riiya riweisira nga lada mori ppari made.” 21Hosei eda simwatahe eda hädi riweisira ma neirar lada wehitafaari Israel.
22Nga ifiri na Hosei eda longolongo bwa Arkelaus na e duweriya papar Herodes bwa king ari Yudea, eda matahü na ebwe wehitafaari burukara. Eda para wola titiro ra e hädi ma räni yaar ttar eda süya eda bwitiwo räni Kalilea, 23eda mire räni wotawotara iitar Nasaret. E faülüyehi bwa hatödü morowe profeta la dölü bwa: “Labwe fadöngüngeri bwa sawori Nasaret.”
Právě zvoleno:
Mateus 2: SOV
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
(Active) © Wycliffe Bible Translators, Inc. All rights reserved.