METHIU 23
23
Thiimthang aere Pharisi ae Ensakniimah
(Mk 12.38-40; Luk 11.37-52; 20.45-47)
1Changlaenche Jesu ing asebok aere meenem ae ningnache ariir, 2Pharisi aere thiimthang ae ing Mosi ongniina ongnae. 3Chukhaenache enuw ing enriir chaapchu manjiiruw; changvakonchu enuw ing entu nong-vaang ichii ing nong tumahruw, enuwve enerpang ing riir aeka anong chuve tumah ae. 4Enuw ing irik peeh ithong aeka mee amanreennah ae, changvakonchu entak chuve engkik topoh tikho manlaap nungka tamah ae. 5#Met 6.1Enuw ing entu enri chaap mee ing imurasii ichii ing atupae, amanche enrungop mansuwr deendeen ing ynthongnae. 6Enuw ing kuurva nache isaseh ongnii nache ongchu engadiknah, amanche meekongnii nakho isaseh ongniichu engadiknah; 7enuw ing kithiir nache mee vakhae ing salaam entu vokhehkho oja ichiichu engadiknah. 8Changvakonchu nenuw ing enuwchu oja tamah aeruw, akhaechuve nenuw unaepoh vachuw amanche nenuw neng oja Khrista yngkhehpang om vatah. 9Amana laaruw paamne achuwkho apa tamahruw, thangbaenna ong nenpa yngkhehpang omna. 10Nenuwchu oja itamah ae rasiing, akhaechuve nenuw neng oja yngkhehpang omna amachuve Khrista chuva. 11#Met 20.26,27; Mk 9.35; 10.43,44; Luk 22.26Nengkaarna ki aaruungseh ping achii mee inche aasiingseh ynsuwh vachiiva. 12#Luk 14.11; 18.14Achuw yngkheh ataksah ing ruungsa nave ama ynjuursa vaata, amanche achuw yngkheh ing ynjuursa nave, ama ruungseh vaata.
Jesu ing Isachaang entuchu Arumah
(Mk 12.40; Luk 11.39-42,44,52; 20.47)
13“Nengkhaena ijaniisapa, isa-chaang itu thiimthang aere Pharisi ae! Nenuw ing iruwng lipahchu mee ae maekungna nengkampa, amanche nentakkho ruwhmah sachuw, ruwhsa kata achii mee ae chukho manruwhmah sachuw.” 14“Nengkhaena ijaniisapa, thiimthang ae! Akhaechuve nenuw ing apha iseehpak ing Thangnang ting thamsa khang tanuwre, muwkhuwnuw ae een vokhehkho empeeh enchaechu nensiihnah. Chukhaenache nenuw iruungpak miraar phavanenta.”
15“Nengkhaena ijaniisapa, isachaang itu thiimthang aere Pharisi ae! Nenuw ing achuw yngkheh barungriirchu nemanguurchehnii khaena chifhuw iraen chuwka vokhehkho paam aajaehkho nengahuurnah; changvakonchu nencheh raenche nenuw ing atakchu nenuw ikheerdeh ing longkong siti nemambunah.”
16“Nengkhaena ijaniisapa, mikchu ing mee nencheer! Achuw yngkheh ing rumniieen manpar naka chongreep atuchuve yntanga mahva, amanche achuw yngkheh ing rumniieenna om sana manpar naka chongreep atuchuve achongreep ingkhe ynsuwrsahva tachuwka nenriirnah. 17Ipang mikchu ae, sana amanthiingcheh een chure asanachu achuw ingkhe iruunghakva? 18Achuw yngkheh ing thiimkung manpar naka chongreep atuchuve yntanga mahva, changvakonchu achuw yngkheh ing Thangnang peeh manpar naka chongreep atuchuve achongreep ingkhe atak ynsuwrsahva tachuwka nenriirnah. 19Mikchu ae! kikthuur re thiimkung chu ukho ingkhe iruungpae? 20Achuw yngkheh ing thiimkung chu manpar naka chongreep tunave, thiimkung vokhehkho asungna ynthin vakhaechu manparka chongreep atuva; 21amanche achuw yngkheh ing rumniieen manparka chongreep atuchu asungna ynthin Thangnang chukho manparka chongreep atuva; 22#Met 5.34amanche achuw yngkheh ing thangbaen manpar naka chongreep tunave, asungna om iruwng lipah re Thangnang chukho manparka chongreep atuva.”
23“Nengkhaena ijaniisapa, isa-chaang itu thiimthang aere Pharisi ae! Nenuw ing chimuw bajaang nenphana suumna yngkheh ipeehchu iruwpak ing mandenchuwka vajeer chonghak sungna aaruwseh ichum, ningsiih vokhehkho thacha, hava vakhae ichuve nenuw ing teentaen seemmahchuw; chutahnache hava vakhae i iruwpak ing tuva nenchiiting buksa, amanche areh ikho itumah rumahnii. 24Mikchu ing mee icheer ae! Nenuw ing nenginnii kam sungna basuw iruwh chucha thurchuwka, siirchar chuve nenbaduwr chehnah.”
25“Nengkhaena ijaniisapa, isa-chaang itu thiimthang aere Pharisi ae! Akhaechuve nenuw ing kam re bukam jaekhi chuve ataangtaniipang itaehchuwka, asung tingcha isamah tangmah, ynner paamsah ing bariim sachuw. 26Mikchu Pharisi ae! Amaensana kam re pakaan jaekhikha asungtanii manseeng japruw, amana chembe taang taniikho seengvaata.”
27 #
Nong 23.3
“Nengkhaena ijaniisapa, isa-chaang itu thiimthang aere Pharisi ae! Akhaechuve nenuw taangna chembe sapak nachuw, thaenkung sunu ivaar ing yntaeh thohkhe aanghaknachuw changvakonchu nenbarungriir sungna chembe mee ithii vasah saruw baruw re ithuw ing vokhehkho ynthiingmah ing sipnachuw. 28Havi thoh aanghak ing nenuwkho taangting chembe ichum mee pingeng ichii ing nemandennah, changvakonchu sungting chembe isachaang iture ichuwhmah tangmah ing bariimnachuw.”
Ponti phavachii ae maen ing Ajeer
(Luk 11.47-51)
29“Nengkhaena ijaniisapa, isa-chaang itu thiimthang aere Pharisi ae! Akhaechuve nenuw ing jaephar ae thaenchu isapak ing nentunah, amanche ichum mee ae thaen rung chukho nemanrehnah; 30amanche nenriirnah, amachuve ajae afhuw ae ing empaar raenche inuwkho ynvae-manuwve, jaephar ae sii ynta khaena inuw ynvaemah vaanchiiva. 31Chutah-nache nenchong inche nenuw i jaephar ae entheh siti sanaepung ichiichu nentaksah ing nemandangsahpa. 32Chuvanuwve nenpa nenfhuw ae ing isii entuna entusuw mahkha nenuw ing tuchirruw. 33#Met 3.7; 12.34; Luk 3.7Baruwr ae vokhehkho baruwr baring ae! Ynsaang khenche longkong ting bukva nenchii tanii ynjuwhchehva nente? 34Chukhaenache ki ing neningna jaephar ae amanche ising iveer mee ae vokhehkho aanchuw ae kajenchiirpa; areh ae chuve nenuw ing khros na thehva nenta, amanche areh ae chuve meekongniina ipirpak ing binva nenta amana khuwruung khuwruugna thehkenta tatanuwka thurva nenta. 35Havi nenuw ing rumniieen amanche thiimkung sungna nentheh ichum mee ae Abel na ing Barakia sapa Jekaria asii ynta ipha ing laaruw paamna ichum ae sii ynta vakhae nentaklina omvaata. 36Ki ing neningna atatak ing kariirnah, amachuve hava vakhae i ataraennii suwnthar mee ae takline suwhvaata.”
Jerusalem khaena Jesu Ichap
(Luk 13.34-35)
37“O Jerusalem, O Jerusalem, naningna jaephar kajenchiirchu rung ing deeng chiika nathehpa. Aar ing atichu abatha ing aop vaangkhe ki ing nasiti aechu aajaehmeh op aening kachiisahva, changvakonchu nenuw inchembe irupeehmah sachuw! 38Enla, na-een i kabathenpa vokhehkho aruwh thangsiisa. 39‘Thangnang rumingna ijuwng Aafhuw chu isasehva ichii nenuw ing nenriirmahri raentaang, atarae basen naka athar supmu imumah tanuw.’ ”
Dewis Presennol:
METHIU 23: MOYO
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.