Salmau 103
103
SALM 103
Trugarog a graslon yw’r Arglwydd
Cyfamod (Hen Ddarbi) 98.98.D
1-5Bendithied y cyfan sydd ynof
Lân enw yr Arglwydd o hyd.
Na foed im anghofio’i holl ddoniau:
Mae’n maddau ’nhroseddau i gyd.
Ef sydd yn iacháu fy afiechyd,
Ac yn fy ngwaredu o Sheol.
Y mae’n fy nghoroni â chariad,
Yn dwyn fy ieuenctid yn ôl.
6-9Mae’r Arglwydd yn gwneuthur cyfiawnder
I bawb sydd dan orthrwm a thrais.
Fe ddysgodd ei ffyrdd gynt i Moses,
A chlywodd plant Israel ei lais.
Trugarog a graslon yw’r Arglwydd;
Ni lidia; mae’n ffyddlon ddi-lyth.
Nid yw yn ceryddu’n ddiddiwedd
Na meithrin ei ddicter am byth.
10-14Ni thalodd i ni ein troseddau,
Ond, fel y mae’r nef dros y byd,
Mae’i gariad ef dros bawb a’i hofna.
Pellhaodd ein pechod i gyd
Mor bell oddi wrthym ag ydyw’r
Gorllewin o’r dwyrain; cans gŵyr
Mai llwch ydym ni, ac, fel rhiant
Wrth blentyn, tosturia yn llwyr.
15-18Mae’n dyddiau ni megis glaswelltyn.
Blodeuwn fel blodau ar ddôl;
Ond pan ddaw y gwynt, fe ddiflannwn:
Ni ddeuwn i’n cartref yn ôl.
Ond y mae ffyddlondeb yr Arglwydd
A’i iawnder am byth yn parhau
I’r rhai sydd yn cadw’i gyfamod
A’i ddeddfau, ac yn ufuddhau.
19-22Mae gorsedd ein Duw yn y nefoedd,
Ac ef sy’n rheoli pob peth.
Bendithiwch yr Arglwydd, angylion,
Sy’n gwneuthur ei air yn ddi-feth.
Bendithiwch yr Arglwydd, ei luoedd,
Sy’n gwneud ei ewyllys; a chwi,
Ei holl greadigaeth, bendithiwch
Yr Arglwydd ein Duw gyda mi.
Dewis Presennol:
Salmau 103: SCN
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Gwynn ap Gwilym 2008