Gen 1
1
Mbili jakupanganyidwa kwa yindu yosope
1Pandanda Mlungu ŵapanganyisye kwinani ni cilambo capasi. 2Ndaŵi jeleji cilambo capasi caliji cangali upanganyikwe wine uliwose, soni caliji cangali kandu kalikose ka umi. Cipi cawunicile mesi gagagumbele posepose, Msimu wa Mlungu ŵaliji mkwendajenda pacanya pa mesigo.
3Kaneko Mlungu ŵatite, “Kulanguce,” ndaŵi jijojo kwalangwice.#2 Akoli 4:6 4Mlungu ŵakuweni kulangukako kuti kwaliji kwambone. Jwalakwe ŵakulekangenye kulangukako ni cipi. 5Kulangukako ŵakupele lina lyakuti musi, ni cipi cila ŵacipele lina lyakuti cilo. Nipo kwaswele, soni ni kwacele, ali lyaliji lisiku lyandanda.
6-7 #
2 Pet 3:5
Kaneko Mlungu ŵatite, “Paŵe cakulekanganya mesi, kuti mesigo gaŵe pa malo gaŵili gakulekangana.” Myoyo Mlungu ŵapanganyisye cakulekanganya mesi, ni calekangenye mesigo gane galiji kusi, gane galiji pacanya pakwe, nipo yatendece myoyo. 8Cakulekanganya mesico ŵacipele lina lyakuti liwunde. Nipo kwaswele, soni ni kwacele, ali lyaliji lisiku lyaŵili.
9Kaneko Mlungu ŵatite, “Mesi gagali kusi kwa liwunde gaŵe pa malo gampepe, kuti uwonece mkuli,” nipo yatendece myoyo. 10Mlungu ŵawupele mkuliwo lina lyakwe Cilambo, mesi gaŵagaŵisile malo gampepe gala, ŵagapele lina lyakwe Nyasa. Mlungu ŵayiweni kuti yaliji yambone yiŵapanganyisyeyo. 11Nipo Mlungu ŵatite, “Cilambo cimele yakumela yakusogola songolo, ni soni yitela yakusogola yisogosi yana mbele, mpela mwa mitundu jakwe jakulekanganalekangana,” nipo yatendece myoyo. 12Myoyo pa cilambo pamesile yakumela yamitundu josope, yakumela yakusogola songolo, ni yitela yakusogola yisogosi, mpela mwa mitundu jakwe jakulekanganalekangana. Mlungu ŵayiweni kuti yaliji yambone yiŵapanganyisyeyo. 13Nipo kwaswele soni ni kwacele, ali lyaliji lisiku lyatatu.
14Kaneko Mlungu ŵatite, “Kwiwunde kuŵe yakumulicila, kuti yilekanganyeje musi ni cilo, ni soni kuti yiŵe yilocesyo ya ndaŵi, yaka ni masiku. 15Yakumulicilayi yiŵe kwinani kuti yimulicileje cilambo capasi,” nipo yatendece myoyo. 16Mlungu ni ŵapanganyisye yakumulicila yayikulungwa yiŵili, lyuŵa kuti limulicileje musi ni mwesi kuti umulicileje cilo. Ni ŵapanganyisye soni ndondwa. 17Mlungu ŵayiŵisile yakumulicilayi kwinani, kuti yimulicileje cilambo capasi, 18kuti yimuliceje musi ni cilo, kulekanganya lilanguka ni cipi. Mlungu ŵayiweni kuti yaliji yambone. 19Nipo kwaswele, soni kwacele, ali lyaliji lisiku lya mcece.
20Kaneko Mlungu ŵalamwile kuti, “M'mesi muŵe ya umi yejinji yakulekanganalekangana, nipo paŵe yijuni yakuguluka mwinani.” 21Myoyo Mlungu ŵapanganyisye somba syasikulungwa sya m'nyasa, pamo ni yakupanganyidwa yine yakutama m'mesi, ni soni yijuni yakuguluka yine yosope ya mitundu mitundu. Nipo Mlungu ŵayiweni kuti yosope yiŵapanganyisye yaliji yambone. 22Ŵayipele upile pakusala kuti mŵelekane mgumbale m'nyasa, nombe yijuni yiŵelekane pa cilambo. 23Nipo kwaswele, soni ni kwacele, ali lyaliji lisiku lya msano.
24Nipo Mlungu ŵatite, “Cilambo capasi cikole yinyama ya mitundumitundu, yakulanga, yakwaŵa, ni yinyama ya mwitinji ya mitundumitundu.” Ni yatendece myoyo. 25Mlungu ŵapanganyisye yinyama ya mwitinji ya mitundumitundu, ni yakulanga ya mitundumitundu ni yosope yakwaŵa ya mitundumitundu. Mlungu ni ŵayiweni kuti yaliji yambone.
26Piyamasile yeleyi Mlungu ŵatite, “Kwende tupanganye ŵandu mcilandanicisyo cetu, kuti taŵe mpela Uweji. Kuti alamulile somba sya m'nyasa, yijuni ni yinyama yosope ya pa cilambo capasi, yakulanga ni ya mwitinji, ni yinyama yiliyose yakwaŵa ya pa cilambo capasi.”#1 Akoli 11:7 27Myoyo Mlungu ŵapanganyisye ŵandu mciwanicisyo cakwe. Ŵapanganyisye jwine jwamlume ni jwine jwamkongwe.#Mat 19:4; Mak 10:6#Gen 5:1-2 28Ŵapele upile ŵanduwo pakwasalila kuti, “Mŵelekane, mtupe, mgumbale mcilambo capasi, mcilamulile. Ngumpa ulamusi pa somba sya m'nyasa ni yijuni, ni yinyama yosope ya pa cilambo capasi.” 29Mlungu ŵatite, “Ngumpa yakumela yosope yakusogola songolo yayili pa cilambo capasi, ni mtundu uliwose wacitela wakusogola yisogosi yana songolo, kuti mlyeje yeleyo. 30Nambo yinyama yosope ya pa cilambo capasi ni yijuni yosope ni yinyama yakwaŵa yosope ya pa cilambo capasi, nayipele manyasi ni masamba kuti yilyeje,” ni yatendekwe myoyo. 31Mlungu ŵayiweni kuti yosope yiŵayipanganyisyeyo yaliji yambone mnope. Nipo kwaswele soni ni kwacele, ali lyaliji lisiku lya msano ni limo.
Dewis Presennol:
Gen 1: YAWO
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Chiyawo Bible: Buku Jeswela © Bible Society of Malawi, 2014