MATEO 12
12
Jesús: Jamakiy junaqpa Señornin
1Tsey tyempuchow Jesús eywarqan murushqakunapa jamakiy junaqchow; i disípulunkuna mallaqákuriyarqan, i qalleykuyarqan espigakunata kipchur i mikur. 2Farisewkuna rikeykur, niyarqan: —Kaq keymi disípuliykikuna rurayan mana konbyeneq rureyta jamakiy junaqchow.
3Peru peynam nerqan: —¿Manaku leyiyarqonki Dabid rurashqanta, pey i peywan kaqkuna mallaqáyarnin; 4imanowmi yeykorqan Dyospa wayinman i mikorqan santu tantakunata, ni peyta ni peywan kaqkunata mikuyananpaq mana permitishqa keykaptin, sinowqa saserdotikunallata? 5¿Ó manaku leyiyarqonki leychow, imanowmi jamakiy junaqchow saserdotikuna jarukuyan templuchow jamakiy junaqta, i jutsannaq kayan? 6Niyaqmi jukmi templupita mayor keychow keykan. 7I si musyayankiman ima ninanmi: Ankupákiytam muná, i manam sakrifisyutatsu, manam kondenayankimantsu inosentikunata; 8Nunapa Tsurinqa jamakiy junaqpa Señorninmi.
Tsakishqa makiyoq nuna
9Tseypita pasarir, peykunapa eyllukayanan wayinman shamorqan. 10I kaq keychow karqan juk nuna juk makin tsakishqa, i Jesusta tapuyarqan, akusayánanreykur: —¿Konbyeninku jamakiy junaqchow kachakátsikiy?
11Peynam nerqan: —¿Qamkunapita pí nunaraq kanman, juk úshan kapuptin, i key jeqakurkun juk pósuman jamakiy junaqchow, makinta mana makyarintsu, i sutarkunman? 12Tseyqa ¿manaku mas bálin juk nuna juk úshapita? Tseynow karqa, konbyeninmi allita rurey jamakiy junaqkunachow.
13Tseynam nerqan tsey nunata: —Makikiyta makyey.
I peynam makyarerqan, i sanuyárerqan jukninnow. 14I farisewkuna yarqurirnam, rurayarqan juntata Jesuspa kontran ushakátsiyananpaq.
Jesús: Señorpa sirweqnin
15Jesús keyta musyarirna, tseypita rakikákurerqan, i atskaq nunakuna qatiyarqan, i kachakátserqan llapankunata, 16i peykunata atikarqan alleqpa mana reqitsiyananpaq; 17profeta Isaias nishqan kumplishqa kananpaq, nenqannow:
18Keymi key sirwimaqniy, peytam akrarqó;
kuyeyními, peychowmi kushikun almá;
Espiritútam churashaq peyman,
i fisyuta willakonqa gentilkunata.
19Manam liryanqatsu, ni qaparipanqatsu,
ni pí wiyanqatsu bosninta kállikunachow.
20Makwa shoqushta manam pakenqatsu,
i qoyeykaq pabíluta manam upenqatsu,
bensikiyman fisyuta jorqanqanyaq.
21I jutinchowmi shuyarayanqa gentilkuna.
Jesús pipam qarqun jaqman demoniyukunata
22Tseynam apamushqa karqan peyman juk endemoniyadu, wisku i múdu; i kachakátserqan, tseynowpana wisku i múdu rikarqan i parlarqan. 23I llapan nunakuna almirashqa kayarqan, i niyaq: —¿Keytsuraq Dabidpa tsurin?
24Farisewkunanam, wiyarir, niyarqan: —Keyqa qarqun demoniyukunata jaqman Belsebúpam, demoniyukunapa apunninpam.
25Jesús peykunapa yarpeyninkunata musyarir, peykunata nerqan: —Llapan reynu kikinpa kontran rakikashqa, ushakárinmi, i llapan marka ó wayi rakikashqa kikinpa kontran, manam tsarakunqatsu. 26Sitsun Satanas qarqun jaqman satanasta kikinpa kontranmi rakikashqa keykan, ¿imanowraq, reynun tsarakonqa? 27Si noqatsun jaqman qarqú demoniyukunata Belsebúpa, ¿pipataq qarquyan qamkunapa tsurikikuna? Tseyreykur, peykunam kayanqa fesnikikuna. 28Noqatsun qarqú Dyospa Espiritunpa demoniyukunata jaqman, tseqeypam Dyospa reynun chámushqa qamkunaman. 29Tseynowqa ¿imanowparaq pipis pwedinman yeykita kallpayoq nunapa wayinman, i ranchanman kapoqninkunata, mana puntata watar? I tseyran pwedinman wayinpita rancheyta. 30Mana noqawan kaqqa, noqapa kontrámi, i mana noqawan eylloqqa, ramanmi.
31»Tseyreykur niyaq: Llapan jutsa i maldisikiy perdonashqam kanqa nunakunata: Espiritupa kontran maldiseqqa manam perdonashqatsu kanqa. 32Meyqanpis ninman ima parleykunata Nunapa Tsurinpa kontran, perdonashqam kanqa; peru Espiritu Santupa kontran parlaqtaqa, manam perdonashqatsu kanqa ni key kaweychow ni shamoqchow.
Montiqa reqishqa wayiyninpam
33»Ó rurayey alli montita, i alli wayíninta, ó mana alli montita rurayey, i wayínin mana alli; wayíninpam reqintsik montitaqa. 34¡Bíborakunapa kastan! ¿Imanowtaq pwediyankiman alli parleyta, mana alli keykar? shonqupita atska kaqtam shimi parlan. 35Alli nunaqa, alli tesoru shonqupitam alli kosaskunata jorqamun; i mana alli nunaqa, mana alli tesorupitam mana alli kosaskunata jorqamun. 36Mas noqa niyaqmi llapan mana báleq parley nunakunapa parlanqan, tseypitam kwentata qoyanqa fisyu junaqchow. 37Palabreykikunapam justifikádu kanki, i palabreykikunapam kondenashqa kanki.
Jesús señalkuna rureyta munantsu
38Tseynam yaskiyarqan judyukunapa leynin yachatseqkunapita i farisewkunapita wakinkuna, nishpa: —Mayestru, qampitam señalta rikeyta munayá.
39Pey yaskirnam nerqan: —Mana alli i olteron kastakunaqa munayan señaltam; peru señal manam qoshqatsu kanqa, sinowqa profeta Jonaspa señalninllam. 40Imanowmi Jonas peskadupa pachanchow karqan kima junaq i kima ampi, tseynowmi Nunapa Tsurinpis kanqa allpapa shonqunchow kima junaq i kima ampi. 41Nínibipa nunankuna sharkuyanqa fisyuchow key kastawan i kondenayanqam; peykuna wanakuyarqan Jonaspa predikasyonninwan, i kaq keymi Jonaspita mas keychow. 42Surpita reynam shárimonqa fisyuchow key kastawan, i kondenanqam; pey shamushqa kaptin patsapita usheyninkunapita Salomonpa yacheyninta wiyananpaq. ¡I kaq key Salomonpita mas keychow!
Rakcha espiritu kutin
43»Imeymi rakcha espíritu nunapita yarqurin, tsaki sityukunapa purin jamakiyta ashir, i mana tarintsu. 44Tseynam nin: “Yarqonqá wayiyman kutishaq.” I chárirna, jayeykaqta tarin, pitsashqata i adornashqata. 45Tseynam eywan, i peywan apan qanchis espiritukunata peypita peyorta, i yeykuriyarna, tseychow yachayan; i shamoq keynin taqey nunapa peyormi tikrarin nowpa kashqanpita. Tseynowmi susedenqa key mana alli kastatapis.
Jesuspa kastankuna
46Pey nunakunata parlapeykaptinraq, kaq key maman i wawqinkuna jaqchow keykáyarqan, i parlapeyta munayarqan. 47I juknam nerqan: —Kaq key mameyki i wawqikikuna jaqchow keykáyan, i parlapáshinikitam munayan.
48Pey yaskirnam key neqninta, nerqan: —¿Pitaq mamániy, i pikunataq kayan wawqíkuna?
49I makinta disípulunkunaman makyarir, nerqan: —¡Kaq keymi mamá i wawqíkuna! 50Syeluchow keykaq Teytápa muneyninta llapan ruraqqa, tseymi wawqí, i paniy, i mamá.
Dewis Presennol:
MATEO 12: QUEAN
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Quechua Ancash New Testament © Peruvian Bible Society, 1992.