Maafiù 18
18
Ɓòò nàŋ yaà wo gbeeɔ̀?
(Mài 9.33-37; Luù 9.46-48)
1E teenga lii sùà anyùùŋ màŋjɛ̀wɛ̀ nyaŋ naŋ hnè koɓɛ̀ Jisɛ̀i yèè àŋ nauŋ dawè nyààŋ, “Ɓòò nàŋ yaà wo gbeeɔ̀ e Kànà Dayàa sùà ko àìjɛnɛ̀ŋ?”
2Kpeiŋ wo Jisɛ̀ naŋ nyààŋ wo jɔ̀àkàìŋ jɔa yèè wò naŋ nyiŋ wuŋ sèèlè ko fɛɛ̀feìŋ. 3Wò naŋ nyiŋ woò wààŋ, “Tɔɔɓaa sèè mùŋ go kìlà maŋ nɔ̀ŋ mààŋ wò jɔ̀àkàiŋ, muŋ naàŋ wa nàwèè kɔ̀ è Kànà àìjɛnɛ̀ɛŋ sùà. 4Wo gbeeɔ̀ e Kànà àìjɛnɛ̀ɛŋ sùà nàŋ yaà wo nyùnɔ̀ɔŋ deeyà wuŋ bi yèè wo nɔ̀ŋ mààŋ wo jɔ̀àkàiŋ jɔa mààŋ wɛɛ̀. 5Wo nyùnɔ̀ɔŋ gbiŋ naŋ jàà wo jɔ̀àkàiŋ mààŋ wɛɛ̀ bà guùŋ kùàŋ dìì esaɓù e deè mɛ̀ wɔ, wo nyùùŋ bi wòim jàà kùàŋ dìì.”
E wàa wèè wo nyùùŋ nyɛ̀nɛ̀ŋ keì nanàŋ
(Mài 9.42-48; Luù 17.1, 2)
6Wo Jisɛ̀ naŋ ɓɛìŋ woò wààŋ, “Sèè wo nyùùŋ gbiŋ nɔ̀ŋ esaɓù wèè wo tòloòjɔ̀à wɛɛ̀ bà guùŋ naim yaà haawè wɔ, wo nyɛ̀nɛ̀ŋ e keì naanààŋ, è henàŋ nɔ̀ŋ tɛ̀ɛ̀ wèè auŋ sɛ̀ɛ̀ ke duò gbee ke gbèìŋ auŋ gbìàŋ wɔŋ juwoɔ̀ sùà. 7E ɗuunyaàŋ kòò è yaà ke dòmàŋ e keì nyìnga diɛŋ wèè e ɗeweɛ̀ è nyɛnɛŋ anyùùŋ aŋ nyɛ̀nɛ̀ŋ e keì naanààŋ lɛ. E nɛ̀ŋ kòò è yaào wèè e nyɛ̀nɛ̀ŋ anyùùŋ aŋ nyɛ̀nɛ̀ŋ e keì naanààŋ, kɛɛ wo nyùnɔ̀ɔŋ do nàŋ nyɛ̀nɛ̀ŋ e keì naanààŋ bi wɔ̀, wò do nàŋ nɔ̀ŋ ke dòmàŋ e keì nyìnga diɛŋ.
8“Sèè wɔŋ kuàŋ mɔɔ̀ŋ ɔ̀ɔ̀ ke golò mɔɛ̀ŋ nɔ̀ŋ esaɓù wèè maŋ nyɛ̀nɛ̀ŋ e keì naanààŋ, kɛɛ̀ wuŋ noo muŋ gò! È yaà tɛ̀ɛ̀ wèè maŋ kɔ̀à wɔŋ kùàŋ guùŋ ɔ̀ɔ̀ ke gòlò guùŋ ko jàwà Dayà wɔŋ nyiiŋ gèe gò jùà sùà, wèè maŋ kùwìè maŋ kùàŋ tìyèe yèè maŋ gòlò tìyèe aum gbìàŋ ko jàhamaŋ koɓɛ̀ e hmɔ̀ɔ̀ɛŋ e yèɛ fè nyime wèè julɔfɔ lɛ̀. 9E kìlà sèè e fɛɛ̀ mɔ̀ɛ̀ nɔ̀ŋ esaɓù wèè maŋ nyɛ̀nɛ̀ŋ e keì naanààŋ, gè niŋ noo muŋ gò. È yaà tɛ̀ɛ̀ wèè maŋ kɔ̀à e fɛ̀ɛ̀ guùŋ e Kànà Dayàa sùà wɔŋ nyiiŋ gèe sùà wèè maŋ kùwìè le fɛ̀ɛ̀ tìyèe yèè aum gbìàŋ ko jàhamaŋ ko yèi e hmɔ̀ɔ̀ɛŋ yaào lɛ̀ e fè nyime.
Ke kàɓànè wo ɓaawaaà naŋ go wɔ̀
(Luù 15.3-7)
10“Ɓɔ̀ mùŋ jàà wò jɔ̀àkàiŋ jɔa wɛɛ̀ bà gbiŋ è keì keekèè. Miŋ woòum, aŋ màikà nyiŋ nyàŋ ko àìjɛnɛ̀ŋ àŋ yaà ko fɛ̀ɛ̀fèìŋ wo Dèda miɔ̀ŋ e teenga gbiŋ ko àìjɛnɛ̀ŋ. [ 11Esaɓù kɛ̀ miàim wo Jɔ̀àfèlàà Nyuùŋ Kpùnɔɔ̀ŋ naŋ hnè wèè ka jòèyè anyùùŋ nyaŋ naŋ go nyàŋ.]
12“Kiìŋ mùŋ naŋ ɓɛ̀nɛ̀ŋ gòngo sèè wo nyùùŋ wo kɛ̀ɛ̀nɛ̀ŋ aŋ ɓaawaa hɔ̀nɔ̀ɔ̀ guùŋ (100) yèè wò guùŋ wo go? Wò do nàŋ jòò aŋ kpɛ̀ɛ̀ùŋ tiinàŋ jɛ̀wɛ̀ zììyà jɛ̀wɛ̀ nɔɔnɔŋ le tiinàŋ (99) gbànaŋ nyàŋ ko gbilie wɔŋ tolòɔ ɓula, wo kà ko kààmè wo jè gunɔ̀ɔŋ naŋ go wɔ̀. 13Miŋ woòum e tɔɔɓaaà, sèè wò mɛɛ̀ŋ wo ɓaawaaà naŋ go wɔ̀, wò do nàŋ nɔ̀ŋ e zɔlɔ̀ gbee sùà e weèuŋ e nìàŋ aŋ kpɛ̀ɛ̀ùŋ tiinàŋ jɛ̀wɛ̀ zììyà jɛ̀wɛ̀ nɔɔnɔŋ le tiinàŋ nyaŋ nààŋ gò go nyàŋ. 14E ɗèwè guùŋ lɛɛ̀ sùà wo Dèdaiŋ nɔɔ̀ŋ ko àìjɛnɛ̀ŋ wo manàŋ wèè wò jɔ̀àkàiŋ jɔa wɛɛ̀ bà guùŋ pɛɛ wò doò go.
Sèè wo nyùùŋ nyɛnɛŋ e kèì jùumù
15“Sèè wo wùìya mɔɔ̀ŋ wò jààùm e nànàŋ, kɔ̀à ko nɛ̀ɛ̀uŋ niìŋ muŋ woòuŋ niŋ. Kɛɛ nyɛnɛ̀ŋ niŋ ke gbùnuo sùà nyɛiŋ tìyèe fèemàŋ. Sèè wò kumiàŋ e yèɛ mùŋ naŋ woò lɛ, kɛ̀ wò kìlà ko nɛ̀ɛ̀ŋ muìŋ. 16Kɛɛ sèè wò gè maŋhɛɛ wèè woum kumiàŋ, ɓèmè wo sèì guùŋ ɔ̀ɔ̀ àŋ tìyèe niŋ ka ko nɛ̀ɛ̀uŋ niìŋ. Wɔŋ fɛ̀ì Dayàa naŋ woò wààŋ anyùùŋ tìyèe ɔ̀ɔ̀ aŋ nìàŋ yɛi e keì wòo gbiŋ sùà, kɛ̀ è tɔ̀ɔ̀ e tɔ̀ɔ̀nyaàaŋ janjai. 17Sèè wo nyùnɔ̀ɔŋ naŋ nyɛ̀nɛ̀ŋ e keì naanààaŋ wɔ̀ gè maŋhɛɛ wèè wo nyiŋ kumiàŋ, kɛ̀ wòò niŋ koɓɛ̀ ke gbòò anyuùŋ hààwe nyàŋ. Sèè wò gè maŋhɛɛ wèè wo kùmìàŋ ke gbòò anyuùŋ hààwe nyàŋ, kɛ̀ tùwò ko nɛ̀ɛ̀uŋ niìŋ mààŋ wo nyuùŋ gò kɛ̀ɛ̀nɛŋ hààwe ɔ̀ɔ̀ mààŋ wo nyuùŋ kùwà nɛ̀ɛ̀nɛ̀ŋ fuɔŋ.
E keì gè maŋhɛɛ yèè e yèɛ àŋ jaa kùàŋ dìì lɛ
18“Yèè miŋ woòiŋ e tɔɔɓaaà kɛ̀, e yèɛ nìŋ naŋ gè maŋhɛɛ e ɗuunyaŋ lɛɛ̀ wèè naŋ niŋ jàà kùàŋ dìì lɛ, e naàŋ nɔ̀ŋ kuàŋ jàà dìì niŋ kò àìjɛnɛ̀ŋ, yèè e yèɛ nìŋ do nàŋ jàà kùàŋ dìì e ɗuunyaŋ lɛɛ̀ lɛ, è do nàŋ nɔ̀ŋ kuàŋ jàà dìì niŋ ko àìjɛnɛ̀ŋ.
19“Yèè miŋ woòiŋ e tɔɔɓaaà, sèè nyɛ̀iŋ nààŋ nyùùŋ tìyèe nyɛɛ̀ŋ e ɗuunyaàŋ naŋ nyimèè wèè naŋ zoolò wèè e nɛ̀ŋ titi bà, wo Dèda miɔ̀ŋ ko àìjɛnɛ̀ŋ do niŋ nàŋ nyɛ̀nɛ̀ŋ weèiŋ. 20Esaɓù kɛ̀ koɓɛ̀i anyùùŋ tìyèe ɔ̀ɔ̀ àŋ taai àŋ naŋ dèènè koɓɛ̀ guùŋ e deè mɛ̀ diɛŋ lɛ̀, kòò mìŋ yaà nyiìŋ nèè tɛɛ.”
Ke kàɓànè wo ɓɔìjɔ̀à gò jùùyà nyùùŋ hakɛ̀ɔ
21Kpeiŋ wo Pììlɛ naŋ hnè koɓɛ̀ Jisɛ̀i yèè wò nauŋ dawè wààŋ, “Kanaà, sèè wo wùìya miɔ̀ŋ wò jààìm e nànàŋ, sùà kiìŋ mìŋ nauŋ ɓɛ̀nɛ̀ŋ jùùyà hakɛ̀? E sùà nɔɔnɔŋ le tìyèe è yaà tɛ̀ɛ̀?”
22Wo Jisɛ̀ naŋ fasàì wààŋ, “Kpele, e fè nɔŋ è sùà nɔɔnɔŋ le tìyèe, kɛɛ è nɔɔnɔŋ le tìyèe e sùa kpɛ̀ɛ̀ùŋ taai jɛ̀wɛ̀ zììyà. 23Ke kàɓanè yɛɛ̀ kè doum nàŋ woò kɛ̀ diè e Kànà àìjɛnɛ̀ɛŋ è yaà. Ke ɗɔ̀ɔ̀ guùŋ wo kana bà manaŋ wa wo kpɛ̀nɛ̀ŋ e nɛɛnɛŋ jikaà kinɛiŋ aŋ ɓɔìjɔ̀àuŋ nyàŋ kuwa wa lɛ̀. 24Wo kanaà naŋ wa nɔŋ tɔ̀ɔ̀tù e keì bi kinɛiŋ àŋ hìàŋ wo nyùùŋ e kpàauŋ nɔɔ̀ŋ wò gùuŋ wo yèɔ kùwaùŋ wa e kpàŋ e pàtaà meenyɔ̀ùŋ jika. 25Kɛɛ wo ɓɔìjɔ̀àa wo kùwà wa è nɛɛnɛŋ wèè wo pààwà è kpàauŋ nɛ̀. Kpeiŋ wo kanaà naŋ woò wààŋ aŋ maàuŋ e ɗo dìì, e hààwè wo jàwè yèè aŋ jɔ̀àuŋ nyàŋ e kpùlìà e nɛ̀ɛŋ gbiŋ wò kuwa wa lɛ̀ wèè wo paawà e kpàaŋ. 26Wo ɓɔìjɔ̀àa naŋ dè maŋ gɛ̀ɛ̀nùuŋ màŋ dììnaŋ wo kanaà fɛɛ̀feìŋ yèè wò nauŋ tɔ̀ɔ̀tù pɔ̀wɔ wààŋ, ‘Kɔ̀nɛɛ̀ŋ kanaà, yɛ̀mɛ̀iŋ ke nyowo, yèè mìŋ do nàŋ pààwà e nɛɛnɛɛ̀ŋ gbiŋ mìŋ kùwàùm e kpàŋ lɛ.’ 27Wo kanaà naŋ wa kɛ̀ɛ̀nɛ̀ŋ ke nyowo wèè wo ɓɔìjɔ̀àa yèè wò nauŋ jùùyè hakɛ̀ wouŋ dangè wo ka foo. Yèè wo kanaà naŋ ngèè ɓɛìŋ dàngè e kpàaŋ wo ɓɔìjɔ̀àa kùwaùŋ wa lɛ.
28“Kpeiŋ wo ɓɔìjɔ̀àa naŋ kɔ̀ yèè wò naŋ mɛ̀ɛ̀ŋ wo ɓɔìjɔ̀à dàwiuŋ nɔɔ̀ŋ bà guùŋ wo yèɔ kùwaùŋ wa e kpàŋ e kaiŋ fua nɛɛnɛŋ hɔ̀nɔ̀ɔ̀ guùŋ. Yèè wò naŋ kùwò wo felaaà ke gbèìŋ. Yèè wò naŋ tɔ̀ɔ̀tù nɔ̀à wo felaaà ke gbèìŋ yèè wò nauŋ woò wààŋ, ‘Pààwaà e nɛɛnɛɛ̀ŋ gbiŋ mùŋ kùwàìm kpàŋ lɛ.’ 29Wo ɓɔìjɔ̀à dàwiuŋ nɔɔ̀ŋ naŋ dè maŋ gɛ̀ɛ̀ŋ nùuŋ màŋ dììnaŋ yèè wò nauŋ pɔwɔ̀ wààŋ, ‘Yɛ̀mɛ̀iŋ ke nyowo, yèè mìŋ do nàŋ pààwà e nɛɛnɛɛ̀ŋ gbiŋ mìŋ kùwàùm e kpàŋ lɛ.’ 30Kɛɛ wo ɓɔìjɔ̀àa naŋ gè maŋhɛɛ wèè wo jùùyà wo dàwiuŋ nɔɔ̀ŋ hakɛ̀, yèè wò nauŋ gbìɛ̀ŋ ko sààŋ nyìwì wèè woo jeèè e jèèsùà wo pààwà e nɛɛnɛɛ̀ŋ wò kùwaùŋ e kpàŋ lɛ. 31Nààŋ aŋ ɓɔìjɔ̀à gbànaŋ nyàŋ naŋ yɛ̀mɛ̀ e yèɛ naŋ wa kaaìŋ lɛ, àŋ naŋ wa tuù, yèè àŋ naŋ kɔ̀ koɓɛ̀ wo kanaà àŋ nauŋ gbàì e keì bi jìì. 32Yèè wo kanaà naŋ nyààŋ wo ɓɔìjɔ̀àa ko nɛ̀ɛ̀uŋ niìŋ yèè wò nauŋ woò wààŋ, ‘Mùŋ yaà wo nyuùŋ kɛ̀ɛ̀nɛ̀ŋ ke kpèè naanààŋ! Mùŋ naim dawè wèè kaum jùùyà hakɛ̀ wèè e kpàaŋ mùŋ kùwàìm lɛ, mìŋ naum jùùyè hakɛ̀ yèè mìŋ naŋ dàngè e kèè e nɛɛnɛɛ̀ŋ gbiŋ mùŋ kùwàìm kpàŋ lɛ. 33Mùŋ he weè nàŋ jùùyè wo ɓɔìjɔ̀à dàwi mɔɔ̀ŋ hakɛ̀, màànààŋ nɔŋ mìŋ naum tɔ̀ɔ̀ ke nyowo lɛ̀.’ 34Wo kanaà naŋ wa tuù, yèè wò naŋ tùɔ̀ŋ wo ɓɔìjɔ̀àa ko sààŋ nyìwì wèè woo nɔ̀ŋ e jèèsùà wo pààwà e nɛɛnɛɛ̀ŋ gbiŋ wò kuwa kpàŋ lɛ.”
35Yɛi wo Jisɛ̀ naŋ wa kpɛ̀ɛ̀yɛ̀ gbòa wààŋ, “E ɗèwè guùŋ lii sùà wo Dèda miɔ̀ŋ ko àìjɛnɛ̀ŋ do wa nàwèè nàŋ nyɛ̀nɛ̀ŋ nyɛ̀iŋ nààŋ bà guùŋ gbiŋ sèè mùŋ go jùùyà wo wùìya mɔɔ̀ŋ hakɛ̀ e yìwìà kè jii mɔɛ̀ŋ sùà.”
Dewis Presennol:
Maafiù 18: WFESD
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Gola New Testament Translation and Literacy Project © Bible Society in Liberia, 2019.