Maafiù 20
20
Wo Jisɛ̀ naŋ kìɛ̀ŋ ke kàɓànè anyuùŋ tòmo nyàŋ ko ɓù gbɛɛwɛ̀jɛ̀wɛ̀i
1Wo Jisɛ̀ naŋ ɓɛìŋ woò wààŋ, “E Kànà àìjɛnɛ̀ɛŋ è yaà mààŋ, wo felaa bà naŋ wa kɔ̀ maŋ nyiìŋ tɛ̀tɛ̀ ko kààmè anyùùŋ wèè aŋ nyɛ̀nɛ̀ŋ e tòmo ko ɓù gbɛɛwɛ̀jɛ̀wɛ̀uŋ niìŋ. 2Wò naŋ wa nyimèè wèè wo nyiŋ pààwà ke kaiŋ fua nɛɛnɛŋ wèè ke ɗɔɔ, yèè wò naŋ nyiŋ tùɔ̀ŋ ko ɓù gbɛɛwɛ̀jɛ̀wɛ̀i wèè aŋ tomo. 3Wo kenàaŋ naŋ ɓɛìŋ kɔ̀ e bòliɛ̀ sùà e gɔɛɛ gbòà nɔɔnɔŋ le tiinàaŋ maŋ nyiìŋ miiŋ yèè wò naŋ yɛ̀mɛ̀ anyuùŋ jɛ̀kɛ bà àŋ siao aŋ fè nyìnìè è nɛ̀ŋ gbiŋ. 4Yèè wò naŋ nyiŋ woò wààŋ, ‘Nyɛ̀iŋ pɛɛ kɔ̀àaìŋ niŋ tomo ko ɓù gbɛɛwɛ̀jɛ̀wɛ̀i miìŋ, yèè mìŋ doiŋ nàŋ kìɛ̀ŋ e yèɛ naiŋ sɔ̀ dèè lɛ e tɔ̀ɔ̀nyaàŋ sùà.’ 5Yèè àŋ nao kɔ̀. Wo kenàaŋ naŋ ɓɛìŋ kɔ̀ e bòliɛ̀ sùà e gɔɛɛ gbòà zììyà jɛ̀wɛ̀ tìyèeɛ̀, yèè wò naŋ ɓɛìŋ kɔ̀ e gɔɛɛ gbòà taaà diɛŋ e koya gɔɛɛ. Wò naŋ ɓɛìŋ yɛ̀mɛ̀ anyùùŋ àŋ siao foo yèè wò naŋ nyiŋ ɓɛìŋ wòò e kèì guùŋ nɛ. 6Ko diemeì, wo kenàaŋ naŋ ɓɛìŋ kɔ̀ e bòliɛ̀ sùà e tèèngà e gɔɛɛ gbòà nɔɔnɔɛ̀ŋ e koya gɔɛɛ. Wò nao ɓɛìŋ mɛ̀ɛ̀ŋ anyuùŋ jɛ̀kɛ bà àŋ siao. Yèè wò naŋ nyiŋ dawè wààŋ, ‘Wèè kiìŋ nìŋ sia kià foo niŋ fè nyìnìè è nɛ̀ŋ gbiŋ?’ 7Yèè anyùùŋ nyaŋ naŋ wòò wo kenàaŋ nyààŋ, ‘È sìàìŋ kià foo esaɓù kɛ̀ wo nyùùŋ gbiŋ kòò wò kìɛ̀ŋ wì è tòmo.’ Yèè wò naŋ nyiŋ woò wààŋ kɛ̀, ‘Kɔ̀àaìŋ niŋ tomo ko ɓù gbɛɛwɛ̀jɛ̀wɛ̀ miìŋ.’
8“E koya gɔɛɛ lii wo kɛ̀ɛ̀nɛ̀ŋ wɔŋ ɓù gbɛɛwɛ̀jɛ̀wɛ̀ɔ naŋ wòò wo nyùnɔ̀ɔŋ sia anyuùŋ tòmo nyàŋ feìŋ nyaŋ kɛ̀ wo nyààŋ nyiŋ wèè wo paawà nyiŋ e nɛɛnɛŋ nyiŋ nɛ̀. Wo kɛ̀ɛ̀nɛ̀ŋ ɓùɔ naŋ ɓɛìŋ wòò wo felaaà wààŋ wo tɔɔtù niŋ koɓɛ̀ anyuùŋ tòmo dìàmaŋ nyàŋ, e jeèsùà wo haì koɓɛ̀ anyuùŋ jiɛ̀jiɛ̀ nyaŋ. 9Àŋ naŋ wa pààwà anyùùŋ nyaŋ naŋ wa tɔ̀ɔ̀tù tòmo e gɔɛɛ gbòà è nɔɔnɔɛ̀ŋ nyaŋ ke kaiŋ fua nɛɛnɛŋ wèè wo nyùùŋ guùŋ gbiŋ. 10Kpeiŋ nààŋ anyuùŋ jiɛ̀jiɛ̀ nyaŋ naŋ wa kɔ̀ ko toomoɛ̀ nyaŋ naŋ hnè wèè aŋ kùwà e nɛɛnɛŋ nyiŋ nɛ̀, àŋ yaà wa goongo kɛ̀ àŋ he nyiŋ nàŋ kìɛ̀ŋ e nɛɛnɛŋ zimgbe e nìàŋ anyuùŋ gbànaŋ nyàŋ. Kɛɛ àŋ naŋ wa kìɛ̀ŋ wo bà guùŋ gbiŋ ke kaiŋ fua nɛɛnɛŋ. 11Àŋ naŋ kùwò e nɛɛnɛɛ̀ŋ yèè àŋ naŋ tɔ̀ɔ̀tù maŋ ɗìòsùà gùlia koɓɛ̀ wo kɛ̀ɛ̀nɛ̀ŋ ɓùɔ. 12Àŋ naŋ woò nyààŋ, ‘Anyuùŋ dìàmaŋ nyàŋ naŋ hnè nyaŋ naŋ tomo wèè e teenga kpuu, yàwi zà naŋ tomo ke ɗɔɔɛ̀ gbiŋ e gɔɛɛ nyìngaà dìì. Yɛi nɔŋ è yaà mùŋ naŋ wi kìɛ̀ŋ e nɛɛnɛɛ̀ŋ eiŋ seenè kpaŋ.’ 13Wo kɛ̀ɛ̀nɛ̀ŋ ɓùɔ naŋ nyiŋ woò wààŋ, ‘Dàwiim nyàŋ, miŋ gòiŋ kaaɓì. Wo nyùùŋ gbiŋ naŋ hnè wèè wo tomo wèè ke kaiŋ fua nɛɛnɛŋ wèè ke ɗɔɔɛ̀, yèè tɛɛ̀ yàwi nààŋ gbiŋ è naiŋ nyìmèè diɛŋ. 14Weètii kùwaìŋ e nɛɛnɛiŋ nɛ̀ niŋ ka. Kiìŋ tɛɛ̀ è kuwa eiŋ nyiniàŋ, sèè mìŋ mɔnɔŋ wèè ka pààwà e nɛ̀ɛ̀nɛ̀ŋ guùŋ nɛ mìŋ naiŋ paawà lɛ koɓɛ̀ anyùùŋ nyɛɛ̀ŋ? 15Miŋ fè è nyaàŋ gè diɛm wèè ka tòòmò è nɛɛnɛŋ mɛ̀ è ɗeweɛ̀ mìŋ manaŋ lɛ̀? Wèè kiìŋ nìŋ giiyàìm le koo sèè mìŋ mɔnɔŋ ka kpùùmàŋ anyùùŋ?’ ”
16Kpeiŋ wo Jisɛ̀ naŋ nyiŋ woò ko diemeì wààŋ, “Weètii anyuùŋ dìàmaŋ nyàŋ nàŋ do nàŋ nɔ̀ŋ aŋ jiɛ̀jiɛ̀ nyaŋ, yèè anyuùŋ jiɛ̀jiɛ̀ nyaŋ nàŋ do nàŋ nɔ̀ŋ aŋ dìàmaŋ nyàŋ.”
Wo Jisɛ̀ naŋ gbòò e dìà taaà e nyaàiŋ dè e fàauŋ nɛ̀
(Mài 10.32-34; Luù 18.31-34)
17Nààŋ wo Jisɛ̀ yaà wa kɔ̀ɔ̀yɛ̀ ko Jùlusɛ̀làm, wò naŋ mììnyɛ̀ŋ anyùùŋ màŋjɛ̀wɛ̀ zììyà jɛ̀wɛ̀ tìyèe nyàŋ e ɓula, yèè wò naŋ nyiŋ gbòò kɔɔ mɔ̀ɔ̀ŋ ke dòmàŋ kàaiŋ nyiŋ niìŋ diɛŋ. 18Wo Jisɛ̀ naŋ nyiŋ woò wààŋ, “Kùmianìim tɛ̀ɛ̀, è yààìŋ kɔ̀ɔ̀yɛ̀ ko Jùlusɛ̀làm ko yèi àŋ do nàŋ gè miàim wo Jɔ̀àfèlàà Nyuùŋ Kpùnɔɔ̀ŋ nyààŋ diɛŋ koɓɛ̀ aŋ kànà sìèfèìŋ zòòlo nyàŋ yèè aŋ kààmɔ̀ɔ̀ŋ maŋ Sàwà Dayà nyaŋ. Àŋ doim nàŋ hèè e kìtì fàa diɛŋ, 19yèè àŋ doim nàŋ kìlè koɓɛ̀ anyùùŋ nyaŋ fè àŋ Juùù nyaŋ, aŋ yè nyaŋ doim nàŋ hiilè, aim ɓùlà yèè aim jìwà. Sèè e gɔ̀ɛ̀ɛ̀ taai maaŋ, mìŋ do nàŋ yèwè e fàaà dìì wɔŋ nyiiŋ gèe sùà.”
E nɛ̀ɛŋ wo yèyè aŋ jɔ̀àfèlàà tìyèeɔ̀ naŋ wa dawè weè niŋ lɛ̀
(Mài 10.35-45)
20Kpeiŋ wo jàwè Zɛɓɛdiìɔ naŋ hnè yèè wò naŋ hìɛ̀ŋ aŋ jɔ̀àfèlàà tìyèeuŋ nyàŋ koɓɛ̀ Jisɛ̀i, wò naŋ dè maŋ gɛ̀ɛ̀nùuŋ màŋ dììnaŋ ko fɛɛ̀fenùuŋ, yèè wò nauŋ pɔwɔ̀ wèè wo nyɛ̀nɛ̀ŋ e nɛ̀ŋ bà e weèuŋ.
21Yèè wo Jisɛ̀ nauŋ dawè wààŋ, “Kiìŋ mùŋ manaŋ?”
Yèè wo nìeɔ̀ nauŋ woò wààŋ, “Mìŋ manaŋ sèè mùŋ kɛɛ̀ wa nàwèè e Kana mɔ̀ɛ̀ sùà, kɔ̀nɛɛ̀ŋ wèè maŋ nyimèè yèè maŋ wòò aŋ jɔ̀àfelaaim nyàŋ wò guùŋ woum jɛ̀ì wɔŋ kùàŋ jìka yèè wo bàa woum jɛ̀ì wɔŋ kùàŋ gbɔnɔŋ.”
22Wo Jisɛ̀ naŋ nyiŋ woò wààŋ, “Niŋ nyimààŋ è nɛ̀ɛŋ nìŋ yaà dààwè kii niŋ lɛ̀. Nàŋ ɓɛ̀nɛ̀ŋ tììyà wɔŋ kpòò keì nyìngaà mìŋ yaà hinie wèè ka tììyà sùà wɔŋ?”
Àŋ naŋ woò nyààŋ, “È ɓɛnɛ̀ŋ.”
23Yèè wo Jisɛ̀ naŋ nyiŋ woò wààŋ, “Tɔɔɓaa nìŋ do nàŋ tììyè wɔŋ kpòòɔ mìŋ do nàŋ tììyè sùà wɔŋ. Kɛɛ miŋ kuwà è gààaŋ wèè ka tà wò nyùùŋ gbiŋ kè ɗùù wèè woim jɛ̀ì wɔ̀ŋ kùàŋ gbɔnɔŋ ɔ̀ɔ̀ wɔ̀ŋ kùàŋ jìka. Wo Dayà, wo Dèda miɔ̀ŋ wuŋ bi nàŋ do nàŋ kìɛ̀ŋ maŋ jɛ̀i mɛɛ̀ŋ maŋ koɓɛ̀ anyùùŋ nyaŋ wò manaŋ wèè aŋ miŋ jɛ̀ì diɛŋ nyàŋ.”
24E teengaà anyùùŋ màŋjɛ̀wɛ̀ zììyà gbànaŋ nyàŋ naŋ niŋ kòmò lɛ, àŋ naŋ wa tùù aŋ wùìyà tìyèe nyàŋ sìwè. 25Wo Jisɛ̀ naŋ nyiŋ nyààŋ koɓɛ̀ guùŋ yèè wò naŋ nyiŋ woò wààŋ, “Nàŋ nyìmàŋ kɛ̀ aŋ kànà anyùùŋ nyaŋ fè àŋ Juùù nyaŋ kilià e kana aŋ nyuùŋ nyiŋ nyàŋ diɛŋ, yèè anyuùŋ gbeegbèè nyiŋ nyàŋ kuwa e gààŋ dìɛ̀ŋ anyùùŋ nyaŋ àŋ yaà diɛŋ nyàŋ. 26Kɛɛ ɓɔ̀ è nɔ̀iŋ yɛi fèemàŋ. Wo nyùnɔ̀ɔŋ gbiŋ mɔnɔŋ wo kùwìè e gààŋ dìɛiŋ wɔ̀, wò kuwa wo nɔ̀ŋ wo ɓɔìjɔ̀à anyuùŋ gbànaŋ nyàŋ dìì. 27Yèè wo yèɔ gbiŋ mɔnɔŋ wo nɔ̀ŋ wo sìèfenɔ̀ɔŋ wɔ̀ wò kuwa wo nɔ̀ŋ wo ɗo wèè nyɛ̀iŋ gbiŋ. 28Màànààŋ nɔŋ miàim wo Jɔ̀àfèlàà Nyuùŋ Kpùnɔɔ̀ŋ kànɔ̀ɔŋ gò wa hnàŋ wèè ànyùùŋ aim tòòmò dìì lɛ, mìŋ naŋ wa hnè wèè ka nɔ̀ŋ wo ɗo, e kìlà wèè ka fè wɔŋ nyiiŋ miɔ̀ŋ wèè ka jòèyè maŋ nyììŋ anyuùŋ zimgbe.”
Wo Jisɛ̀ sùngà aŋ fèlàà tìyèe zììlè fɛ̀ɛ̀
(Mài 10.46-52; Luù 18.35-43)
29Yèè nààŋ wo Jisɛ̀ yaà anyùùŋ màŋjɛ̀wɛ̀uŋ nyàŋ yaà wa naàŋ fòlà sùà ko Jɛlekò, e faaŋ gbee naŋ nyiŋ wa dè maŋjɛ̀wɛ. 30Aŋ fèlàà tìyèe zììlè le fɛ̀ɛ̀ bà jaa wa ko dòmaàŋ kɔɔì. Yèè nààŋ àŋ naŋ wa kòmò kɛ̀ wo Jisɛ̀ yaà wa hìnìè e tèèngà koɓɛ̀i àŋ jaa wa lɛ̀, àŋ naŋ tɔ̀ɔ̀tù kpàaŋ nyààŋ, “Jɔ̀àfèlàà Kanaà Dèèweɔ̀! Muàŋ nàŋ yaà wo yèɔ wo Dayà naŋ tàeɗùù wèè muŋ joeyè e ɗuunyaàŋ. Yɛ̀mɛ̀ wi ke nyowo hee!”
31Anyùùŋ nyaŋ naŋ nyiŋ kpiinyɛ̀ŋ nyààŋ aŋ kumiàŋ. Kɛɛ àŋ naŋ wa ngèè ɓɛìŋ kpààŋ sɛiŋ nyààŋ, “Kanaà yèè Jɔ̀àfèlàà Dèèweɔ̀, yɛ̀mɛ̀ wi ke nyowo hee!”
32Wo Jisɛ̀ naŋ sie yèè wò naŋ nyiŋ nyààŋ ko nɛ̀ɛ̀uŋ niìŋ. Yèè wò naŋ nyiŋ dawè wààŋ, “Kiìŋ nìŋ manaŋ wèè ka nyɛ̀nɛ̀ŋ weèiŋ?”
33Anyuùŋ zììlè le fɛ̀ɛ̀ nyaŋ naŋ fasàì nyààŋ, “Kanaà, è manaŋ maŋ yìlè le fɛɛ̀ wilɛ̀ wèè e yɛmɛ̀ dìì.”
34Wo Jisɛ̀ naŋ nyiŋ wa yɛ̀mɛ̀ ke nyowo, yèè wò naŋ mɛ̀nlɛ̀ɛ̀ŋ le fɛɛ̀ nyiŋ nɛ̀. Yèè ko fɛɛ̀feìŋ àŋ naŋ yɛ̀mɛ̀ dìì, yèè àŋ naŋ dè wo Jisɛ̀ maŋjɛ̀wɛ.
Dewis Presennol:
Maafiù 20: WFESD
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Gola New Testament Translation and Literacy Project © Bible Society in Liberia, 2019.