Logo YouVersion
Eicon Chwilio

मत्ती 2

2
पूर्व दिशा नोर पाऊनागोळ्द यीशु से मुलाकात
1हेरोदेस राजा अन्द दिनगोळ दा याग यहूदिया प्रदेश इन बैतलहम ऊरा यीशु उन जनम आत, रा नोळी, पूर्व दिशा टु हापाळ सा जानकार लॉकुर यरूशलेम दा बंदकु केळली कुरतुर, 2“यहूदीगोळव राजा यार्द जनम आग्याद, यल आन? यतिकी नाव पूर्व दा आऊन तारा नोळेव, अदिक नाव आऊक प्रणाम माळली बंदेव.”
3ईद केळकु हेरोदेस राजा अदिक आऊन सांगुळ पुरा यरूशलेम घबरूसेत. 4आग आव यहूदी समाज इन सप्पा प्रधान याजकगोळी अदिक शास्त्रीगोळी जमा माळकु आंदुर से केळदुन, “कि मसीह अन्द जनम यल आग पायजे.” 5आंदुर आऊन से अंदुर, “यहूदिया अन्द बैतलहम दा, यतिकी परमेश्वर उन भविष्यवक्ता अन्द द्वारा ईद लिख्सकु आग्याद: 6‘हे बैतलहम, नी जो यहूदा अन्द प्रदेश दा आय, नी यातोदारा भी रीति देल यहूदा अन्द अधिकारीगोळ दा सब से स्याणेव हैलेच; यतिकी नीन दा टु ऊंद अधिपती होट्टान, जो नान प्रजा इस्त्राएल इन रखवाली माळ्यान.’”
7आग हेरोदेस जानकारगोळी चुपचाप कारूकु आंदुर से केळदुन कि तारा ठीक याता समय दा कांळ्सीत, 8इदुरसाटी आव ईद अनकु आंदरी बैतलहम कळुदुन, “होगी, आ पार उन बारा दा बेस-बेस मालूम माळी, अदिक याग आव सिक्‍केदान रा नानी बातणी कोळी ताकी ना भी बंदकु आऊक प्रणाम माळाईन.”
9आंदुर राजा अन्द मात केळकु होटोदुर, अदिक जो तारा आंदुर पूर्व दी नोळीदुर अदा तारा आंदुर मुंद-मुंद नळोद; अदिक यल चिग्द ईरोद, आ जागा अन्द म्याकुच पोहचुस्कु रूकसेत. 10आ तारा अक नोळकु आंदुर हापाळ खुश आदुर. 11आंदुर आ मान्ना दा पोहचुस्कु आ पार उक आऊन मोय मरियम इन सांगुळ नोळदुर, अदिक बांगकु आ पार उक प्रणाम माळदुर, अदिक तान-तान झ्वारा खोल्सकु आऊक व्हान्ना, लुबान, अदिक गन्धरस इन भेंट येर्सदुर.
12आग परमेश्वर कान्सा दा आंदरी चेतावनी कोटकु ईद अंदुन कि हेरोदेस उन हात्‍ती मात्‍त होगबाळेतीर, आंदुर दुसरा हादी देल तान द्याश दा होटोदुर.
मिस्त्र द्याश इक होगोद
13आंदुर होगदुर बाद्दा प्रभु उन ऊंद स्वर्गदूत कान्सा दा यूसुफ उक कांळ्सकु अंदुन, “येळ, आ पार उक अदिक आऊन मोय इक हुळकु मिस्त्र द्याश इक ओळेग; अदिक यागासताका ना नीन से अनालीन, आगासताका अल्या ईरेत; यतिकी हेरोदेस ई पार उक ढुंढ़सेत्यान कि आऊक कोन्सुस बुळुल.”
14आग आव ईळ्लकी इच यदकु पार अदिक आऊन मोय इक हुळकु मिस्त्र द्याश इक ओळेदुन, 15#होशे ११:१ अदिक हेरोदेस उन सायास्ताका अल्या ईत्‍तुन. इदुरसाटी कि अद वचन जो प्रभु भविष्यवक्ता अन्द द्वारा अंदिदुन अद पुरा आगुल: “ना तान पार उक मिस्त्र द्याश टु कार्सदिन.”
चिकोरी कोन्नोद
16याग हेरोदेस ईद नोळदुन, कि तारागोळ्द बारा दा जानकारी ताकोमावाळेर जानकार लॉकुर आऊन सांगुळ ध्वाका माळदुर, आग आव सिट्ट देल बेक्‍की घाई आगेदुन, अदिक लॉकुरी कळुकु जानकार लॉकुर द्वारा तारा नोळोद समय इन अनुसार बैतलहम अदिक अदुर आसपास इन जागा अन्द सप्पा चिकोरी जो येढ्ढ वर्ष इनोर या आंदुर से स्याणेर ईरोर, कोन्सुस बुटुन. 17आग अद वचन जो यिर्मयाह भविष्यवक्ता अन्द द्वारा अंदकु आगीत, अद पुरा आत: 18“रामाह ऊर दा दुख भरा ऊंद आवाज केळ बत्‍त, वोरलोद अदिक हापाळ गयरा विलाप इन ईरोद; राहेल तान चिकोर साटी वोरलोर, अदिक शांत आगोद ईला चाहासोर, यतिकी ईग आ चिकोर सोतोगीदुर.”#यिर्मयाह ३१:१५
मिस्त्र द्याश टु वापस बरोद
19हेरोदेस उन सोत्‍तुर बाद्दा, प्रभु उन स्वर्गदूत मिस्त्र दा यूसुफ उक कान्सा दा कांळ्सकु अंदुन. 20“येळ, पार उक अदिक आऊन मोय इक हुळकु इस्त्राएल इन द्याश दा होटोग, यतिकी जो पार उन जीव ताकोमोद चाहासोर, आंदुर सोतोग्यार.”
21यूसुफ येद्दुन, अदिक पार उक अदिक आऊन मोय इक सांगुळ हुळकु इस्त्राएल इन द्याश दा बंदुन. 22लेकीन ईद केळकु कि अरखिलाउस तान आप्प हेरोदेस उन जागा दा यहूदिया मा राज्य माळेत्यान, अल होगोर से अंजदुन. बाक कान्सा दा परमेश्वर उन दी टु बातणी ताकोमकु गलील प्रदेश दा होटोदुन. 23#मरकुस १:२४; लूका २:३९; यूहन्ना १:४५आव अल नासरत हेसुर इन नगर दा होगकु कुरतुन, ताकी अद वचन पुरा आगुल, जो भविष्यवक्तागोळ द्वारा अंदकु आगीत: “आव नासरी कहलुस्यान.”#लूका ८:१७

Uwcholeuo

Rhanna

Copi

None

Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda

Cynlluniau Darllen am ddim a Defosiynau yn ymwneud â मत्ती 2

Mae YouVersion yn defnyddio cwcis i bersonoli'ch profiad. Trwy ddefnyddio ein gwefan, rwyt yn derbyn ein defnydd o gwcis fel y disgrifir yn ein Polisi Preifatrwydd