MATIUS 2
2
Dou marongga ma ramai Ele mai
1Ruma Isa rawarakaina aka kota Betlehem d̄i dana Yudea aipu wakatu parenta b̄a Sangaji Herodes. Aipu wakatu ede pila-pila dou ta ele ma loa poda ilimu ntara maina aka Yerusalem. 2Sod̄i rero b̄a siad̄oho, ”Tab̄eku Ana dou to'i ede mab̄ou ranggana d̄imand̄adi sangaji dou Yahudi? Madad̄oho ra'edamu ntara-Na mawontu tawela ele, ro madad̄oho maimu d̄imanemba Sia”.
3Wakatu ringa b̄a Sangaji Herodes au mandad̄i ede, sia nawancuku wed̄ina, ndede rau sara'a dou aka Yerusalem. 4Edempara kau b̄a sia sara'a mana'ekai imam, ro guru-guru agama dou Yahudi mai kab̄oro weki. Edempara sod̄i b̄a sia d̄i doud̄oho ede, ”Tab̄eku d̄iwarakai Sangaji rasake b̄a Ruma Hatalla?”
5Cambe b̄a siad̄oho, ”D̄i kota Betlehem d̄i dana Yudea. B̄ara ndake ratunti b̄a sab̄ua dou nabi, 6#Mi. 5:1 ’Nggomi Betlehem, d̄i dana Yehuda,
nggomi sakali-kali laina ma cumpukai to'i d̄iwoha kota-kota mana'e d̄i Yehuda.
B̄ara rad̄i nggomina d̄imamai sab̄ua dou mana'ekai
ma d̄imana'ekai ela-Ku Israel.’ ”
7Sawa'u b̄a rakana haba ede, Herodes ouna dou-dou maloa ilimu ntara ma ramai ele mai ede kai nari-nari. Edempara sod̄i b̄a sia d̄i doud̄oho ede b̄une aiku ntara ede tampu'u tadana. 8Sawa'u b̄a ede kau b̄a sia lao doud̄oho ede aka Betlehem ro nggahi ndakena, ”Laora, ngupa kab̄aepu Ana dou to'i ede. Nggara nggomid̄oho mawa'usi eda Ana dou to'i ede, ngoajapu nahu, loakud̄u nahu rau malao nemba Sia.”
9-10Edempara lao siad̄oho. Eda wali b̄a siad̄oho ntara ra'edana ntoina tawela elena. Nawancuku neo adena siad̄oho edana ntara ede! Ntara ede ma'ulu wea kai siad̄oho, edempara midina pas ese mai b̄a hid̄i warakai Ana dou to'i ede. 11Lu'u siad̄oho d̄i ade uma ede, ro edana Ana dou to'i ede lab̄o la Maria ina-Na. Siad̄oho suju ra nembana Ana dou to'i ede, edempara siad̄oho henggana hid̄i ntau ra wara siad̄oho, ro d̄onggo ra mbeina d̄i Ana dou to'i ede, masa, kamaya, ro d̄upa. 12Ruma Hatalla ngoa ra kawarana siad̄oho d̄i ade nifi loakud̄u aina mbali aka Herodes. Ndad̄i siad̄oho dulana ta ncai ma kalai.
Lao ngge'e peso weki aka Mesir
13Sawa'u b̄a dou-dou maloa ilimu ntara ede laona, mala'eka Ruma katadana weki d̄i la Yusuf ade nifi. Nggahi mala'eka ede, ”Herodes nane'e ngupa Ana dou to'i ede d̄ihadena. B̄ara ndedena tu'ura, wa'apu Ana dou to'i ede lab̄o ina-Na lao pesopu wekimu aka Mesir. Ngge'epu ta aka sampe Nahu manuntu wali lab̄o nggomi.”
14Tu'u la Yusuf, ro d̄i aimangad̄i ede wa'u sia wa'ana Ana dou to'i ede lab̄o ina-Na aka Mesir. 15#Hos. 11:1 Siad̄oho ngge'ena ta aka sampe made Herodes.
Ndedeku ndad̄ira au ranggahi Ruma kai ncai nabi-Na, ndake, ”Nahu ma'ou ana-Ku rad̄i Mesir.”
Hadekai d̄ambe-d̄ambe to'i
16Wakatu b̄ade b̄a Herodes b̄a one dou-dou maloa ilimu ntara ma ramai ele mai ede kekona sia, sia na'ipiku mbanina. Edempara parenta b̄a sia hade sara'a d̄ambe-d̄ambe to'i mone ma umu d̄ua mba'a la awana aka Betlehem ro d̄i rasa kompe ra peina. Ede ncihi ncao lab̄o haba rarakana d̄i dou-dou maloa ilimu ntara ede mab̄oha wakatuna tadana ntara ede.
17Ndedeku ndad̄ina au rawa'u parana nggahi b̄a Nabi Jeremia, eded̄u;
18 #
Yer. 31:15
”Aka Rama maringaku eli nangi,
d̄uru ra d̄ala ro weta.
La Rahel manangi d̄uru ra d̄ala wea anad̄ohona;
sia wati ne'ena d̄irere b̄ara anad̄ohona watid̄u warana.”
Dula rad̄i Mesir
19Sawa'u b̄a made Herodes, wakatu la Yusuf mbuipu aka Mesir sab̄ua mala'eka Ruma katada walina weki d̄i la Yusuf d̄i ade nifina. 20Nggahi mala'eka ede, ”Dou-dou ma ne'e hade Ana dou to'i ede, nawa'ura made. B̄ara ndedena tu'ura, wehapu Ana dou to'i ede lab̄o Ina-Na lao mbalira aka Israel.” 21Tu'ukai la Yusuf edempara wa'ana Ana dou to'i ede lab̄o ina-Na lao mbali aka Israel.
22Pala sawa'u b̄a ede la Yusuf ringana b̄a one Arkelaus, ana Herodes macepe amana ndad̄i sangaji aka dana Yudea. Ndad̄i la Yusuf nadahuku lao ta aka. Sawa'u b̄a la Yusuf rakana ngoa ra tei wali rambei b̄a Ruma ade nifina, edempara lao la Yusuf aka dana Galilea. 23#Mrk. 1:24, Luk. 2:39, Yah. 1:45 Ta ede sia ngge'ena d̄i kota Nasaret ngarana. Ade ndedekaina ndad̄ira au ranggahi b̄a nabi-nabi mab̄oha Ana dou ede: ”Sia d̄ipehekai Dou Nasaret.”
Dewis Presennol:
MATIUS 2: LAIBHP
Uwcholeuo
Rhanna
Copi
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fcy.png&w=128&q=75)
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
@LAI 2001