Génesis 2
2
1Tsaynömi Tayta Dios kamayta usharqan ciëluta y ciëluchö kaqkunata, kay patsata y kay patsachö kaqkunatapis. 2Llapanta kamaskirnam qanchis kaq junaqchö Tayta Dios jamarqan.#Éxo. 20.11; Heb. 4.4, 10. 3Tsaynö jamanqanpitam Tayta Dios tsay junaqta bendisarqan sagrädu junaq kananpä.#Éxo. 20.11.
Edén huertachö Adánwan Eva täyanqan
4Kaychömi qellqashqa kaykan ciëluta y kay patsata Tayta Dios kamanqan.
Ciëluta y kay patsata kamashqa karpis 5Tayta Dios manarämi tamyatsimurqanrätsu. Tsaymi qewapis ni jachapis karqanrätsu. Tsaynöllam chakrachö arunanpä runapis karqanrätsu. 6Tsay witsan patsapita yaku pashtamurmi#2.6 O pukutay shärirmi. entëru patsata ushmarqan.
7Tsaypitanam allpapita runata Tayta Dios kamaskir kawananpä senqanpa pükarqan. Tsaynöpam kawaq runa kananpä kamarqan. 8Paytam Edénchö jatunkaray huertaman churarqan tsaychö tänanpä. Tsay huertataqa kikin Tayta Diosmi rupay yarqamunan läduchö rurarqan. 9Tsay huertachömi Tayta Dios wiñatsirqan tukuy niraq kuyayllapä jachakunata. Tsay jachakunapa wayuyninmi maypis mikuy munay karqan. Huerta chawpinchömi juk jacha karqan wayuyninta mikur imayyaqpis runa kawananpä.#Apoc. 2.7; 22.2, 14. Tsaynöllam juk jacha karqan wayuyninta mikur alli kaqta y mana alli kaqtapis runa musyananpä.
10Jinan Edén huertapitam juk mayu pashtamurqan tsay huertata ushmananpä. Huertapita yarqurmi tsay mayu chuskuman rakikarqan. 11Punta kaq mayupa jutinmi karqan Pisón. Tsay mayum päsan Havila partipa. Tsay partichömi atska qori kan. 12Tsay qoriqa qori pürum kaykan. Tsaychömi kaykan pasaypa mushkuq jachapa weqin y kuyayllapä ónice rumikunapis. 13Jukaq mayupa jutinnam karqan Gihón. Tsay mayum tumaykämun Cus partipa. 14Jukaq mayupa jutinnam karqan Tigris. Tsay mayuqa Asiriapita rupay yarqamunan kaq lädupam päsan. Jukaq mayupa jutinnam karqan Éufrates.
15Kamanqan runatam Edén huertaman Tayta Dios churarqan tsaychö arur shumaq cuidananpä. 16Tsaypitanam runata nirqan: <<Kay huertachö jachakunapa wayuyninqa llapanpis mikunaykipämi. 17Peru ama mikunkitsu allita y mana allita musyatsikuq jachapa wayuyninta. Tsayta mikurqa wanunkim>>.#Rom. 6.23.
18Tsaypitanam Tayta Dios nirqan: <<Japallan kar runa llakipaypämi kaykan. Tsaymi yanapananpä majanta kamashä>>.
19Tsaypitanam allpapita kamanqan tukuy niraq ashmakunata y päriqkunata Adán#2.19 Hebreo idiömachö Adán ninanqa runa ninanmi. kaqman Tayta Dios aparqan jutinkunata churananpä. Jutinta Adán churanqallanmi llapanpapis kaykan.
20Tsaynöpam jutinkunata Adán churarqan wätana kaq mana wätana kaq ashmakunapata y päriqkunapatapis. Llapan casta ashmakuna kaptinpis runapa majanpänöqa manam mayqanpis karqantsu. 21Tsaymi Tayta Dios wanuypa Adánta punukaskatsir juk custillanta jipirqan. Jipiskirnam kanqantanölla alliskatsirqan. 22Tsay jipinqan custillapita warmita kamaskirmi runa kaqman pusharqan. 23Warmita rikaykurmi Adán pasaypa kushikur nirqan: <<¡Kaymi sïqa tullüpita aytsäpita rurashqa kar kikï niraq kaykan! Ollqupita rurashqa karmi payqa warmi kaykan>>.
24Tsaymi mamanpita y papäninpita runa yarqukun warminwan mana rakikaypa täkunanpä. Tsaynö täkurnam ishkanpis jukllayllanö kayanqa.#Mat. 19.5; Mar. 10.7-8; 1Cor. 6.16; Efe. 5.31. 25Ishkan qallapächulla kaykarpis manam mayqanpis penqakuyarqantsu.
Dewis Presennol:
Génesis 2: qxo
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2002, 2008, Wycliffe Bible Translators, Inc. All rights reserved.