TOBITƐ 1
1
1'Buki gɛ ma tɔ̃ lɛnggɛ ngɔ Tobitɛ, be 'da Tobiɛlɛ, nɛ a a be yaa Ananiɛlɛ. Ananiɛlɛ zi a be 'da Aduɛlɛ, nɛ li yaa a a Gabaɛlɛ. Wa vɛ̃ a Owi nu fɛlɛ Asiɛlɛ, tɛ kɔ nu kpala Nɛftali. 2Tobitɛ ɔ zi kɔ le Tisbe, tɛ ngɔ nù Galile. Yolo tɛ le Tisbe, nɛ nde le Kadɛsɛ do si gbãlã ngɔ, le Hasɔrɛ do si 'biti gɛ̃a wese, nɛ le Fogɔrɛ do si ba gɔtɔ. Do 'da fala Salmanazarɛ zi a nwa ngɔ nù Asiri ni, nɛ Oasiri wa ba zi Tobitɛ kɔ le 'da a Tisbe, nɛ wa la do a kɔlɔ 'duli tɛ ngɔ nùi 'da wa i.
Tobitɛ zi a wi dɛ mbulanɔ 'da Gale
3Mi Tobitɛ, mi dɛa zi bɔlɔ zu dɛa mɔ, nɛ mi dɛa zi 'bɔ odia dɛa mɔ kɔ dungu nza 'da mi vɛ̃. Mi hã zi mbili hã onya mi, Oisraɛlɛ, kɛ lɛ la zi kɔlɔ 'duli do wa tɛ kɔ le Ninivɛ, tɛ ngɔ nù Asiri i ni. 4Nɛ kɔ gã 'da mi, 'da fala kɛ mi 'bana zi tɛ ngɔ nù Israɛlɛ i ni, nɛ owi nu kpala yaa mi Nɛftali vɛ̃, wa kɛ̃a sanga tɛ ngba wa do nu fɛlɛ kulanɔ 'da nwa Davidi. Nɛ wa bɛ̃a zi 'bɔ gɛnɛ le Yeruzalɛmɛ. Ĩ na, Gale saka zi le ni kpo tɛ ngɔ nù Israɛlɛ vɛ̃, takɔ onu kpala Israɛlɛ wa nɛ tɛ di ni we hã do dɔnggamɛnɔ hã a. Wa dɛa zi tɔa Tɛmpɛloe 'da Gale dɛ di ni we obe Israɛlɛ vɛ̃, owanɔ wa nganga gɛ, do owanɔ wa ko sɛ wa do 'do ni. 5Yeroboamɛ, nwa ngɔ nù Israɛlɛ dɛa zi hi be wili ngɔmbɔ do mɔ mbali, nɛ a ia ma tɛ fala dɔnggɔ do Gale tɛ Danɛ. Nɛ Owi nu fɛlɛ kula 'da mi, do owi nu kpala yaa mi Nɛftali vɛ̃, wa hã zi dɔnggamɔ hã be wili ngɔmbɛ ni tɛ ngɔ kalanɔ ngɔ nù Galile vɛ̃. 6Kɔ nu fɛlɛ kula 'da mi ni vɛ̃, mi zu mi kpo, mi nɛ zi tɛ Yeruzalɛmɛ i fai, we dungu ɛngganɔ ɔ nɛ kɛ mbula 'da Mɔizɛ tɔ̃ ma hã Oisraɛlɛ na, wa dɛ ma kɔ sabɛlɛ do sabɛlɛ ni. Mi nɛ zi do kuti kpalɛnɔ li fɔɛ 'da mi, do kuti be nadalamɛnɔ 'da mi. Nɛ mi nɛ zi 'bɔ do kpo mbe 'bu kɔ nadalamɛnɔ 'da mi, do kuti sala tɛ batanɔ 'da mi, kɛ mi kɛlɛ ma ni. 7Mi hã zi mɛnɔ ni hã onganganɔ, obe zã Aroni, takɔ wa hã ma do dɔnggamɔ hã Gale. Nɛ mi nɛ zi 'bɔ do kpo mbe 'bui kɔ kpalɛ ble, do dɔ̃ɛ, do olivɛ, do grɛnadɛ, do figɛ, do tala gele wala tenɔ, nɛ mi hã ma hã olevitɛnɔ kɛ wa dɛ toe tɛ Yeruzalɛmɛ ni. Nɛ mi be zi 'bɔ gole ombe mɛnɔ 'da mi, nɛ mi nɛ zi do mbili nɛ we duzu tɔa Tɛmpɛloe. Nɛ sabɛlɛ kpo kpo, mi nɛ zi do ma tɛ Yeruzalɛmɛ i. 8Mi hã zi 'bɔ mbe tɛ mɛnɔ 'da mi hã obe gulanɔ, do Owi fio wilinɔ, do ogele winɔ kɛ wa kɔ̃a gɛnɛ Gale 'da Oisraɛlɛ ni. 'Do sabɛlɛ talɛ, nɛ mi nɛ zi do mɛnɔ ni hã wa, nɛ lɛ nyɔngɔ zi mɔ do wa fala nɛ kpo, ɔ nɛ kɛ mbula 'da Mɔizɛ tɔ̃a nɛ ni. Wi bia zi mbula ni hã mi, wi a yaa mi wuko nɛ, Debora, wi ko baa mi. Mba gɔ, baa mi Ananiɛlɛ, a fia zi do'do, nɛ mi zi a be gula iko. 9Kɔ mi hɔa wi wili, nɛ mi ba wuko tɛ kɔ nu kpala lɛ. Wuke ni kua bulu be hã mi, nɛ mi e li a na Tobi.
10'Da fala kɛ wa kala lɛ, hã wa la do lɛ kɔlɔ 'duli tɛ ngɔ nù Asiri i ni, nɛ mi ɔ zi kɔ le Ninivɛ. Onya mi vɛ̃, do Oisraɛlɛ kɛ wa ɔ zi kɔ le ni, wa nyɔngɔ zi nyɔngɔmɛnɔ 'da ogele winɔ, 11nɛ nde mi kɔ̃̀ zi we nyɔngɔ ma gɔ. 12Mi gbini zi zã mi vɛ̃ do Gale 'da mi. 13Nɛ Gale tɛ li nza i dɛa na, nwa Salmanazarɛ kɔ̃ gɛnɛ mi. Nɛ a ba zi mi do wi oso mɛnɔ 'da a vɛ̃ kɛ ma wia do a ni. 14Nɛ dati kɛ na Salmanazarɛ fe ni, mi nɛ zi tɛ ngɔ nù Medi we oso mɛnɔ hã a fai. Nɛ mbe 'da fala kpo, mi nɛa zi kɔ le Ragɛsi, ngɔ nù Medi i, nɛ mi la saki mbili kɛ dĩ nɛ kilo kama talɛ hã Gabaɛlɛ, nya Gabri. 15Kɔ nwa Salmanazarɛ fia, nɛ nya a Sɛnakeribɛ dungu nwa olo a. Nɛ 'da fala ni, nɛ nde li wala we nɛ dɛ ngɔ nù Medi i, ma zi do fɛna wena, nɛ mi nɛ́ zi 'bɔ i mɔ gɔ.
16'Da fala kɛ nwa Salmanazarɛ 'bana zi ni, mi gala zi onya mi, wanɔ lɛ nɛa zi kɔlɔ 'duli do wa ni wena. 17Mi kɛ̃ zi mapa 'da mi hã wanɔ wa fe wɛ ni, nɛ mi hã tulu hã wanɔ wa zɔlɔ ma ni. Fala kɛ mi zɔ zi wɔlɔ mbe nya mi kpo, kɛ wa da dɛ 'do ngbo nu le Ninivɛ i, nɛ mi ba ma, nɛ mi mi. 18Mbe ngba soe kpo, nɛ nwa Sɛnakeribɛ nɛa zi tɛ ngɔ nù Yude, nɛ a dã zu li Gale, NWA tɛ li nza zi wena. Nɛ Gale hã etumbu hã a, nɛ a dɛa na, wa ndaka a ngɔ nù Yude do'do. Nɛ a si do nɔ̃lɔ̃ zã nɛ, nɛ a hɔ Ninivɛ nga, nɛ a gbɛa Oisraɛlɛ dɛlɛ wena. Nɛ mi kala wɔlɔ wa do usu nɛ, nɛ mi mi. Nɛ nwa fa wɔlɔnɔ ni, nɛ nde a kpà gɔ. 19Nɛ mbe wele kpo tɛ Ninivɛ ni nɛa, nɛ a tɔ̃ hã Sɛnakeribɛ na, wi mi wɔlɔnɔ ni, wi a mi, Tobitɛ. Kɔ mi nɛa we zele na, nwa ĩ ti gulu we 'da mi ia, kɔ a fa we gbɛ mi ni, nɛ kili ba mi, nɛ mi yu dɛ gele fala. 20Nwa nɛa we zele na mi yu ni, nɛ a ba nu a na, wa kala mɛnɔ 'da mi vɛ̃ hã ɛ. Nɛ mi tia sã do'do, nɛ mi 'bana tati a do wuke 'da mi Ana, do be 'da mi Tobi. 21'Do nɛ là pɔsɔ gazɛlɛ gɔ, nɛ ombe zagbãlã benɔ 'da nwa bɔa, wa gbɛ a, nɛ wa yu dɛ ngɔ kalanɔ tɛ Araratɛ. Nɛ mbe gele be olo Sɛnakeribɛ, li a a Asaradoni, a hɔ nwa olo baa a. Nɛ a e Ahikarɛ, be 'da nya mi Anaɛlɛ, do gã wi ngɔ tonɔ vɛ̃ kɛ ma zɔa mbilinɔ 'da nwa ngɔ nùi ni. 22Ĩ na, zi dati, 'da fala Sɛnakeribɛ 'bana do nwa ni, nɛ Ahikarɛ zi a gã wi a dɔ̃ɛ hã nwa, do wi fɔmɔ kasɛ to ti mbɛtinɔ 'da nwa, do gã wi ngɔ tonɔ, do mbilinɔ 'da nwa tɛ ngɔ nù Asiri. Kɔ Asaradoni ba to nwa, nɛ a gese 'bɔ Ahikarɛ dɛ ngɔ tonɔ 'da a ni. Ahikarɛ zi a be 'da nya mi, wi nu fɛlɛ kula 'da mi. Nɛ a tɔ̃a we ngɔ mi hã nwa, nɛ nwa kɔ̃a, nɛ mi kpolo wá tɛ mi dɛ Ninivɛ nga.
Dewis Presennol:
TOBITƐ 1: NGB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ngbaka DC Bible (We Nu Gale) Version © Bible Society of the Democratic Republic of Congo, 1995.