TOBITƐ 5
5
Anzɛ Rafaɛlɛ kã Tobi ngɔ nu Medi
1Nɛ Tobi gisa hã baa a Tobitɛ na: “Mi dɛ sɛ mɛnɔ vɛ̃ mɔ tɔ̃a hã mi ni. 2Kɔ lɛ ĩ̀ ti ngba lɛ do Gabaɛlɛ gɔ, hã mi dɛ sɛ do kpa mbili ni nɛ nde? Mi tɔ̃ sɛ tɛ mi hã a, takɔ a kɔ̃ we nu mi, hã a hã mbili hã mi ni nɛ nde? Dɛ ngɔ nɛ, mi zɔ̃ wala kɛ ma la dɛ ngɔ nù Medi i ni gɔ.”
3Nɛ Tobitɛ gese na: “Lɛ kɔma zi mbɛti sanga tɛ ngba lɛ kɔma. Lɛ bɔa nɛ, lɛ ia zi kɔ̃ lɛ ti nɛ, nɛ mi 'bili sanga nɛ bɔa, nɛ mi hã 'bili nɛ kpo hã a, mba do mbili, nɛ mi 'bana tɛ mɛ 'bɔ do mbee nɛ kpo. Nɛ 'do kɛ mi ia mbili i mɔ ni, ma la di ni sabɛlɛ bɔa. Kɔ mɔ nɛ́, hã mɔ fá saka wele kpo, kɔ a kã mɔ ngɔ nù Medi i. Fala kɛ nɛ yolo i mɔ, kɔ nɛ si, nɛ lɛ futa sɛ olo nyanga wi ni. Ma wia na mɔ nɛ, hã mɔ ba mbili ni si do nɛ.”
4Nɛ Tobi la we fa wi kɛ a zɔa wala ngɔ nù Medi, nɛ a wia we kã a ni. Kɔ a nɛa we la nu tɔa 'da wa nɛ́, nɛ a kpa ngba a do Rafaɛlɛ, nɛ nde a ĩ̀ na, wi a anzɛ 'da Gale gɔ. 5Nɛ a aka a na: “Aa mbɛ, mɔ yula do nde?” Nɛ anzɛ gese hã a na: “Mi a nya mɔ be Israɛlɛ, kɔ mi tɛa we fa dɛa to.” Nɛ Tobi aka 'bɔ a na: “Mɔ zɔa wala nù Medi zɔa nde?”
6Nɛ Rafaɛlɛ gese na: “Mi zɔ zɔa, mi ba li wala ni fala dɛlɛ wena, nɛ mi ĩ ti obe walanɔ i mɔ ni do zu mi vɛ̃. Mi ɔ zi i mɔ kɔ le Ragɛsi, tɛ 'da mbe nya lɛ kpo li a a Gabaɛlɛ. Mɔ yolo Ragɛsi, nɛ mɔ nɛ do nyanga mɔ 'do tũ bɔa, sɛ nɛ mɔ hɔ tɛ kɔ gã le Ekbatanɛ de, we kɛ lenɔ bɔa ni, ma dɛ ngɔ kala.”
7Tobi zila ni, nɛ a tɔ̃ hã Rafaɛlɛ na: “Aa mbɛ, mɔ 'bɔ 'da mi dɛ dɛ, hã mi nɛ, hã mi mbese baa mi sɛ, we kɛ mi kɔ̃a na mɔ kã mi, nɛ mi futa sɛ olo nyanga mɔ.” 8Nɛ anzɛ gese na: “Ma a dia, mi 'bɔ sɛ 'da mɔ, kɔ mɔ nɛ́ dɔ̃ dɔ̃.” 9Nɛ Tobi kpula tɛ̃ a, nɛ a tɔ̃ hã baa a na: “Mi kpa mbe nya lɛ be Israɛlɛ kpo we kã mi.” Nɛ Tobitɛ tɔ̃ hã a na: “Mɔ sá mɔ hã a, mi kɔ̃a we ĩ ti a, do nu kpala a we zɔ na, a wia we kã mɔ nde?”
10Nɛ Tobi hɔa, nɛ a sa mɔ hã Rafaɛlɛ, nɛ a tɔ̃ hã a na: “Aa mbɛ, baa mi sa mɔ hã mɔ.”
Anzɛ nɛa we le dɛ kɔ tɔa i, nɛ Tobitɛ fana a. Nɛ anzɛ gese na: “E kɔ mɔ kpá yangga kɔ dungu nza 'da mɔ!” Nɛ Tobitɛ aka a na: “Mbé yangga mi nɛ kpa ma ni a ge nde? Li mi ba do'do, nɛ mi zɔ́ tua wese gɔ. Mi dungu dɛ kɔ gba tũ ɔ nɛ ofionɔ, kɛ wa zɔ́ 'bɔ hi fala gɔɛ ni. Gɛnɛ kɔ mi 'bana nza, nɛ nde mi lia sanga ofionɔ i belee ia. Mi zele gɛlɛ Owele, nɛ nde mi zɔ́ wa gɔ.”
Nɛ anzɛ tɔ̃ hã a na: “Mɔ ɔ́ do kpã sila! Gale kɔlɔ fala kpasa mɔ ia! Mɔ nɔ́ sila mɔ kpa!”
Nɛ Tobitɛ na: “Be 'da mi Tobi nɛ nɛ ngɔ nù Medi. Kɔ mɔ wia we kã a, nɛ mɔ zɔ mɔ tɛ̃ a nde? Mi futa sɛ olo nyanga mɔ.”
Nɛ anzɛ gese na: “Mi wia we kã a. Mi gɔnɔ wala i mɔ wena, nɛ mi ĩ ti owalanɔ ngɔ kalanɔ, do ngɔ mbɛ nùnɔ ni vɛ̃.”
11Nɛ Tobitɛ aka 'bɔ a na: “Aa mbɛ, mɔ tɔ̃ hã mi sɛ! Mɔ ngboo a 'bo ge nde? Mɔ a nu fɛlɛ wio nde?”
12Nɛ anzɛ gese hã a na: “Gulu kɛ mɔ kɔ̃a we ĩ ma we ge nde?” Nɛ Tobitɛ na: “Mɔ mbɔkɔ mi, tua kɛ mi kɔ̃a we ĩ ti gulu mɔ. Li mɔ a ge nde? Mɔ a be 'da wio nde?” 13Nɛ anzɛ gese na: “Li mi a Azaria, nɛ mi a be 'da Ananiasi kpasa wele kɛ, kɛ a a nya nɛ ni.”
14Nɛ Tobitɛ tɔ̃ hã a na: “Aa nyae! NWA dúngú do mɔ, nɛ a wélé nu a tɛ mɔ! Nɛ da dɛ kɔ zã mɔ nɔ̃́lɔ̃́ dɛ tɛ mi, we kɛ mi kɔ̃a sɔ we ĩ ti gulu mɔ ni gɔ. Kafi bina, mɔ a nya lɛ, nɛ mɔ a wi nu fɛlɛ owi dĩ. Mi ĩ zi ti Ananiasi do Natanɛ, kɛ wa a obulu benɔ 'da Semeliasi, kpasa wele kɛ ni. Lɛ nɛ zi do wa Yeruzalɛmɛ i, nɛ lɛ sambala Gale fala nɛ kpo. Nɛ wa dɛ zi olo nu Gale dɛa fai. Obaa mɔ wa a osaka wele, nɛ mɔ yula kɔ dia nu fɛlɛ kula. Lɛ fana 'bɔ ngba lɛ sɛ!”
15Nɛ a tɔ̃ 'bɔ na: “Mi futa sɛ mɔ ɔ nɛ kɛ wa futa do winɔ we tũ kpo kpo fai ni. Nɛ mi hã sɛ kpo mɛnɔ mi nɛ hã hã be 'da mi ni hã mɔ, we gala nɛ li wala. 16Kɔ mɔ zɔ mɔ tɛ̃ a do dia nɛ, nɛ mi e sɛ 'bɔ ngɔ mbili 'da mɔ.”
17Nɛ anzɛ tɔ̃ na: “Ma a dia, mi nɛ sɛ do a. Mɔ tɛ dɛ̃ kili gɔ, lɛ hɔ sɛ i mɔ, nɛ lɛ si vɛ̃ do dia nɛ, we kɛ fo fɛna li wala ni bina.” Nɛ Tobitɛ na: “Aa nyae, e kɔ Gale wele nu a tɛ mɔ.” 'Do nɛ, nɛ a tɔ̃ hã be 'da a na: “Mɔ 'dáfá mɔ gɛnɛ 'da mɔ, hã mɔ lé wala do yali ngba mɔ. E kɔ Gale tɛ li nza i fɔmɔ nɛ i mɔ, nɛ a gese nɛ dɛ 'da mi nga do ba tɛ nɛ! E kɔ anzɛ 'da a kã nɛ li wala, nɛ a zɔ mɔ tɛ nɛ!”
Tobi 'dafa tole 'da a do'do, nɛ a ufu zala baa a do naa a. Nɛ Tobitɛ wele 'bɔ nu ɛ tɛ̃ a. 18Nɛ naa Tobi ma ngɔ he ma, nɛ a tɔ̃ hã wili a na: “Gulu kɛ mɔ tumba be 'da mi nyɛlɛ ni we ge nde? A zu a kpo a wi gala lɛ, do wi nɛ to nu lɛ. Kɔ mbé wi nɛ zɔ mɔ tɛ lɛ a wio nde? 19Mɔ fa fai tati a mbili iko we ge nde. Be dè nɛ ngɔ mbili gɔ nde? 20Lɛ dɛ́ yangga be mɛnɔ kɛ NWA hã hã lɛ ni iko!” 21Nɛ Tobitɛ gese na: “Mɔ fí sila mɔ nù! Be 'da lɛ a hɔ sɛ i mɔ do dia nɛ, nɛ a kpolo sɛ tɛ̃ a do lɔa tɛ̃ a iko. Ngba soe a si sɛ ni, nɛ mɔ zɔ sɛ a do li mɔ. 22Mɔ tɛ dɛ̀ kili gɔ, kɛnɛ! Mɔ lá fala he kɔ̃a tɛ̃ a. Dia anzɛ a kã sɛ be 'da lɛ li wala, nɛ gɛnɛ 'da a ma la sɛ do dia nɛ, nɛ a si sɛ do lɔa tɛ̃ a.” 23Kɔ wuke zila ni, nɛ a la fala he kɔ̃a.
Dewis Presennol:
TOBITƐ 5: NGB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ngbaka DC Bible (We Nu Gale) Version © Bible Society of the Democratic Republic of Congo, 1995.