Ko-Dabirɛnu 24
24
Isiyakala Musi Nyini-Koe
1Mari tora ata duwɛ yigila Iburayima kuma koe bɛɛ rɔ ha a kɔrɔyara kɔbɔkɔbɔ! 2Wo wati rɔ, Iburayima ya a fɔ ala wɔli-kɛla-kunyɛ ye min bi a bolo-fan bɛɛsi kuma ko, “I bole ladon n kin tɛma#24.2 Kin tɛma: Anuta namunyɛ le wo la ni anu bi lanyiri mabalanna anu nyɔgɔn tɛma. 3ka i keli n ye Mari Alla yala min ya san-kole anubɛ dugu-kole dan, ni i si na Kenan dunmusi do nyini nna dan ye ma siginɛ minnu tɛma yan kaka. 4Kɔnɔ i ni ta nta nyamanɛ rɔ n bɔra kan min ka nyɔ-dunmusi do nyini nna den Isiyaka ye.”
5Ala wɔli-kɛlɛ wo ya a fɔ a ye ko, “Ni n ma musi sɔrɔn nyɔ min si na n fɛ ha nyamanɛ kɛ rɔ yan don? Ni wo ma, i si sɔn n ni ta ila dan la n bolo nyɔ rɔ?”
6Iburayima ya a fɔ a ye ko, “Ade, i kana ta nna dan la nyɔ. 7San-Kole-Mari-Alla min ya n nabɔ n fala bɔn la ka n nabɔ n sɔrɔn-nyamanɛ rɔ fanan, wo le ya lanyiri kɛ kiri n ye gben, ko a si nyamanɛ kɛ di n bɔnsɔn ma. Alla si ata melika sɔ i yarɔ alako i si musi sɔrɔn nna dan ye nyɔ nya min. 8Ni musi ma sɔn nala i fɛ, i ya lanyiri min kiri n ye, i si bɔ wo kɔrɔ kɔnɔ i yandi, i kana ta nna dan la nyɔ.” 9Wɔli-kɛlɛ wo ya a bole ladon a tigi Iburayima kin tɛma#24.9 Kin tɛma: Fɔlɔ mɔgɛnuta namunyɛ le wo la. ka a keli a ye musu-nyini-koe rɔ.
10Wɔli-kɛlɛ wo ya nyomo tan bi a tigila nyomɛnu tɛma anubɛ fen-hakika siyaman ka ta Mɛsopotemiya nyamanɛ rɔ Iburayima na-kelen-nyɔgɛ Nehori ye kan min. 11Anu kera nyɔ wura dɛ la musinuna yi-bi-wati rɔ. A ya a ma, ala nyomɛ wonu ya anu sa soe kɔma tenke dafɛ nyɔ.
12A ya Alla madiya, a ko, “E, n Mari, n tigi Iburayimata Alla, n bi i madiyala ko i ni hɛrɛ kɛ n ye bi, ka ila lanyiri latɔnbagaya n tigi Iburayima ye. 13N bi tenke kɛ dafɛ yan, sunkurɔnnu si na yi bi kan min. 14Ni n ya sunkurɔn min tara yi ma, a ni n kɔ, ado a ni do di nna nyomɛnu fanan ma, i yandi Mari, musi wo ni ma Isiyakala musi la i ya min ma a harayɛgɛ la. Ni wo mara, n si a lɔn wo rɔ ko i wara ila lanyiri latɔnbagaya n tigi ye.”
15Yanni a ni ban madiyalɛ wo la, Rebɛka anubɛ ala yi-bi-kunan nara. Iburayima na-kelen-nyɔgɛ Nehori, wo mamanɛ le Rebɛka wo la. Nehori wonubɛ ala musi Milaka le ya Rebɛka fa Bɛtuwɛli sɔrɔn. 16Rebɛka wo kin dɔgɔma-ma-de, ado sunkurun-nasɔlɔnɛ le a la. Anubɛ ala yi-bi-miran yigira yi-bi-tinɛ.
17Wɔli-kɛlɛ wo ya a labɛn, a ko, “I yandi, n kɔ yi-ni tɔ. N ni n min.”
18Rebɛka ya ala yi-bi-kunan bɔ a kuma ka yi di a ma. A ko, “N tigi, i min.” 19A banta yi dila a ma tumɛ min, a ko, “N si yi di ila nyomɛnu fanan ma ha anu ni ban anu minna.” 20A ya a lakaliya ka yi maduni ka a kɛ kolo-fannu min-kɛ-tinɛ rɔ nyomɛ wonu ye. A sɛgira tun ka ta yi do bi. Nyomɛ wonu damasi ya anu min nyɔ ha anu wasara. 21Wɔli-kɛlɛ wo tora sɔni. A ye Rebɛka lakɔrɔsila ni ko bɔra ata tagama rɔ Mari bolo.
22Nyomɛnu ban yi wo minna, kei wo ya sɛnɛ-foro kelen bi min si don a sunyɛ#24.22 Sunyɛ: Anu denu bi min dunna anu sunyɛ la, mata tolola-fan le wo la. la anubɛ sɛnɛ-bolo-kalama-dɛɛn fila ka wonu di dunmusi wo ma. Sɛnɛ-fore anubɛ sɛnɛ-bolo-kalama-dɛɛn wonu kolo dɔgɔma-ma-de! 23A ko, “I yandi, ile fa ye yon na? A tɔgɛ ye kama?” A ko, “Wo le ye ma yiyala bi?”
24Rebɛka ya a fɔ a ye ko, “Milaka Bɛtuwɛli wola dan le nde la. N benba tɔgɛ le Nehori.” 25A ya a fɔ a ye tun ko, “Wo le yiya-tinɛ ye nyɔ. Ila nyomɛnu de-nyini-fannu bi nyɔ fanan.”
26Kei wo ya a madu ka Mari bato. 27A ko, “Alla tanto, n tigi Iburayimata Mari min bara ata lanyiri latɔnbagaya n tigi ye, wo ara n telen n tigita mɔgɛnu na.”
28Sunkurɔn wo burimatoe tara a na wara bɔn la ka koe bɛɛ rakaran ala mɔgɛnu ye min tenbira anu tɛma kilɛ la. 29-30Rebɛka tirisan-kei do ye nyɔ. A tɔgɛ Leban. Leban ya sɛnɛ-fore anubɛ bolo-kalama-dɛɛn wonu yen a tirisan-musi wo bolo tumɛ min ka kumɛ wonu namɔɛn Rebɛka ya minnu takaran anu ye kei wola ko la. Woletɔ Leban wo fanan burimatoe tara ke kei wonubɛ ala nyomɛnu ma yi wo dafɛ. 31A ya a fɔ a ye ko, “I sɔnɛ soe kɔma nfenna? Ile duwa-dan, na, ma ni ta bɔn la. N bara i yiya tinɛ rabɛn anubɛ ila nyomɛnu sa tinɛ.”
32Anu ke bɔn la, anu ya dunɛnu bɔ nyomɛnu kɔ tɛma. Leban ya dɔn-fan di nyomɛ wonu ma. Wo kɔma, a ya sundan wo kin-maku-yi labɔ. 33Anu nara ale Iburayimala wɔli-kɛlɛ wo fandɛ la tumɛ min, a ya a fɔ ko, “N ti fenfen dɔn kaka fɔ n ba ban n na-kunya rakaranna.”
Leban ko, “Awa, ale le wo la. I dantɛgɛ.”
34Wɔli-kɛlɛ wo ya a fɔ anu ye ko, “Iburayimata wɔli-kɛlɛ le nde la. 35Mari ara ata duwɛ layigi n tigi kuma kati! Alla ara a ma mɔgɔ-ba la ka nɔnfuli anubɛ yɔɔnnu anubɛ sofɛlɛnu anubɛ nyomɛnu anubɛ kolo-fen-siyaman di a ma. 36N tigila musi Sira kɔrɔyanɛ ya dan min sɔrɔn a ye, n tigi ya a bolo-fan bɛɛsi latenbi ala dan wo le ma. 37N tigi ya a ma, n ya n keli a ye. A ko n kana dunmusi fenfen furu ala dan ye nyɔ a siginɛ kan min kaka Kenan nyamanɛ rɔ. 38A ko fɔ n ni musi nyini ala dan wo ye a fa warɛ yan de serr! 39Kɔnɔ hali wo, n ya a fɔ n tigi ye ko ni musi ma sɔn nala n fɛ don, n si nfen ma? 40Kɔnɔ a ya a fɔ n ye ko a ye tagamana Mari min baraka rɔ, wo si ala melika bila n fɛ ka nna kilɛ ma hɛrɛ la alako n si musi sɔrɔn ala dan ye a fa bɔnsɔn rɔ nya min. 41N tigi ko n ba ke a bɔnsɔn ma tumɛ min, ni anu ma musi di n ma, n ya lanyiri min kiri a ye, n si bɔ wo kɔrɔ.
42“N kera yi-bi-tinɛ ma tumɛ min, n ya Alla madiya, n ko, ‘E, n Mari, n tigi Iburayimata Alla, n bi i madiyala ko i ni hɛrɛ kɛ n ye bi.’ 43Wo tumɛ n bi tenke wo dafɛ nyɔ, n ya a fɔ ko, ‘Ni sunkurɔn min nara yi-bi-tinɛ, n si wo tara min-kɛ-yi ma. 44Ni a sɔnta n kɔla ka do di nna nyomɛnu fanan ma,’ n ko, ‘alamɛ musi wo mara Isiyakala musi la.’ 45Yanni n ni ban madiyalɛ wo la, n ya Rebɛka anubɛ ala yi-bi-kunan yen nala. A yigira yi-bi-tinɛ. N ya a fɔ a ye, n ko, ‘Ile sunkurɔn, i ti n kɔ yi-ni tɔ, n ni n min?’ 46Rebɛka ya ala yi-bi-kunan bɔ a kuma ka yi di n ma. A ko, ‘N tigi, i min.’ A ko a si yi di nna nyomɛnu fanan ma. N ya n min. Nyomɛ wonu damasi ya anu min nyɔ ha anu wasara. 47N ya a manyinika, n ko, ‘Ile fa ye yon na? A tɔgɛ ye kama?’ Rebɛka ya a fɔ n ye ko Milaka Bɛtuwɛlila dan le ale la. A ko a benba tɔgɛ le Nehori. N ya sɛnɛ-fore wo dun a sunyɛ la ka sɛnɛ bolo-kalama-dɛɛn filɛ wonu don a bole la. 48N ya n madu ka Mari bato. N ko, ‘Alla tanto, n tigi Iburayimata Mari min bara ata lanyiri latɔnbagaya n tigi ye, wo ara n telen n tigita mɔgɛnu na. N bara n tigi na-kelen-nyɔgɔ-mamanɛ do taran a warɛ yan tɔ ala dan ye.’ 49Nba, ni wole si sɔn ko-nyimɛ kɛla n tigi ye ka dunmusi kɛ di a ma, wo ni a fɔ n ye. Ni wo ti sɔn wo ma, wo ni wo fanan fɔ n ye. Ni nde si min ma wo rɔ, n ni na to wo mala.”
50Leban anubɛ Bɛtuwɛli ya a yabi wo rɔ ko, “Bawo Marita ko-rabɛnnɛ le kɛ la, woletɔ ma ti ke a yɛlɛmana. 51I ma Rebɛka yen? A bi. Wo ni ta, yo! A ni ma i tigila dan wola musi la iko Mari ara a latɛgɛ nya min.”
52Iburayimata wɔli-kɛlɛ ya anu kuman-kan kɛ lamɔɛn tumɛ min, a ya a laburun a ma ka Mari bato. 53Wɔli-kɛlɛ ya fen da-gbɛlɛ-siyaman bi ka wonu ma Rebɛka furu-fan la. A ya wonu di a kɔrɔ Leban anubɛ a na ma. Wo kɔma, a ya fɛrɛya-bɔɛ anubɛ wodi-gbɛ anubɛ sɛnɛ bi ka wonu fanan di Rebɛka ma. 54Wo kɔma, anu ya a fandɛ min di a ma nun, ale anubɛ a gba-fɛ-bilalɛnu nara to wo dɔnna. Anu kira nyɔ. Sɔgɔma, a ya a masara anu na. A ko, “Nde ye tala le bi n tigi wara.”
55Rebɛka kɔrɔ-kei Leban anubɛ a na ko, “Rebɛka ni to ma fɛ wati-kundu-ni kɔrɔ. Yanni tele tan ni tenbi, a si ta.”
56Iburayimala wɔli-kɛlɛ wo ya a fɔ anu ye ko, “Wo kana n nasɛgi kamasɔrɔn Mari ara nna kilɛ diya. Wo ni n boloka alako n ni ta. N ni ta ke n tigi ma yona.”
57Anu ko, “Nba, ma ni sunkurɔn kele ka a manyinika ni a si min fɔ.” 58Anu ya Rebɛka kele ka a manyinika ko, “I ye tala le kei kɛ fɛ kaka, ka, i sa tala a fɛ?”
A ya a fɔ anu ye ko, “Nde ye tala le.”
59Anu ya Rebɛka makololɛ bila a fɛ ka anu nata Iburayimata wɔli-kɛlɛ anubɛ a gba-fɛ-bilalɛnu fɛ. 60Rebɛkala mɔgɛnu duwara a ye, anu ko,
“Alamɛ Rebɛka bɔnsɔn siyayara ka waga yirika-siyaman bɔ.
Alamɛ i bɔnsɔnnu ya nɔ-ko sɔrɔn anu yogenu ma.”
61Musi minnu tara Rebɛka to-tinɛ ala kei warɛ, wonu dama wulita ka sigi nyomɛnu na ka ta Iburayimata wɔli-kɛla kun-tigi wo fɛ.
62Anu bi kela Kenan nyamanɛ dugula-wara la wurɛ la tumɛ min, anu ya a taran, Isiyaka ye bɔla kɔlɔn wo dafɛ Hega ya min kele ko, “Alla Min Kolonkɛ ye N Na, Wota Kɔlɔn.” 63A ye a matagama-tagamana gbɛkole ma wurala-tumɛ la tumɛ min, a ya a yɛ lata ka nyomɛnu kun-nabɔɛ yen. 64Rebɛka fanan ya a yɛ lata. A ya Isiyaka yen tumɛ min, a bɔra nyomɛ kuma ka yigi dugi ma. 65A ya a fɔ wɔli-kun-tigi wo ye ko, “Kei yon bi nala ma labɛnna wo la?”
Wɔli-kɛlɛ wo ko, “Nba, n tigi le wo la.” Woletɔ Rebɛka ya kurɛ bi ka a burun a yɛ kun na. 66Wo kɔma, koe min bɛɛ kɛra tagama rɔ, wɔli-kɛlɛ wo ya wo dantɛgɛlɛ sa Isiyaka ye.
67Isiyaka ya Rebɛka ladon a na Sirala fani-bɔn la. A ya Rebɛka bi ka a ma atɛ la. Ala musi diyara a ye koikoi! Isiyaka yisi-kimara a nala sayɛla ko la.
Dewis Presennol:
Ko-Dabirɛnu 24: KCLB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Kuranko Common Language Bible © The Bible Society in Sierra Leone, 2006.