Matayo 6
6
Muli zo wutaza waciwa
1“Mulanjilile, mulece kwitumila i metumo genyu maswanu ha meso ge wanhu, ho mwilajise hali wene. Hambi hono munoze nha vivyo cagalanze, nha si mosuma kupegwa icihumbilizwa no Sogo yenyu wa ku wulanga.
2“Holeka na hono wumutaze u muciwa, wulece kwiyilajisa hali wanhu, wulece kunoza nhe wanhu iwakoci vyono wanozaga mu matangʼanilo go wuhembelo, na mu zinzila, ho walumbwe ne wanhu. Mbeka nghumutyenyi vyono, wakondya kucituga icihumbilizwa cawo.
3“Ninga agwe, lono wukumutaza u muciwa, ale wunoze mu nzila yono hamba u mwendece wako si kosuma kuyimanya yono wukwituma. 4Ho wulavye wako wuwe wulavizwe mu nzila ye cinyele, no Sogo nayo mono kawonaga ze cinyele, kokuhumbiliza.
Kuli zo wulombe
(Lk. 11:2-4)
5“Nanye lono mukulomba, mulece kuwa nhe wakoci. Hambi iwene wakoci, nha wendile kwima wima mu matangʼanilo go wuhembelo, sunga na mu zinzila, no kulomba, ho welajise kuli wanhu. Mbeka nghumulonjelenyi, vyono wawo wakondya kucituga icihumbilizwa cawo. 6Ninga agwe lono wukulomba, ale winjile mu nyumba yako kugati, widindile no mulango, ho wumulombe u Sogo mono sikejelaga. Nayo u Sogo mono kaziwonaga ze cinyele kokuhumbiliza.
7“Na mu wulombe wenyu, mulanjilile, mulece kwilonganicila nghani za bwete du, nhe wanhu wono si wamumanyile Mulungu. Hambi i wene wawo nha wehwesaga vyono, i milungu yawo ho yowahulika, ku soko yo wulonga nghani nyinji. 8Ale, anye mulece kuwa nha vyono wenha wawo. Hambi u Sogo yenyu nha yayimanyile i visakwa vyenyu, sunga na lono mukali si namulomba. 9Ninga munojeye mweze kulomba nhavi:
‘Baba mono wuli ku wulanga,
Ilitagwa lyako lyezwe,
10U wutemi wako wuze
yono wukuhila yitumwe kononze
nha vyono ku wulanga.
11Wucipelaje izindigwa zono zicikwiliye izuwali.
12Wucinenelaje imasutya getu,
nha vyono nase ciwanenelaga wono wacisutizyaga.
13Wulece kucitegula mu wujelwe,
Langa wuciponye na yulya u Mubi.’
14“Hambi hono muwanenele wanhu imasutya gawo, u Sogo yenyu nayo wa ku wulanga, ho kosuma kumunenelenyi nanye imasutya genyu. 15Ninga hono mulece kuwanenela wanhu imasutya gawo, ale, nayo u Sogo yenyu wa ku wulanga si kosuma kumunenelenyi nanye imasutya genyu.
Kuli zo wuleka kulya
16“Na lono mukuleka kulya, mulece kusininghala ha wusu nhe wanhu wakoci. Hambi iwene nha wasininghalaga ha wusu, ho wejele hali wanhu vyono walecile kulya. Nghumulonjelenyi mbeka, vyono wawo, wakondya kucituga icihumbilizwa cawo. 17Ninga agwe lono wukuleka kulya, ale wibakaje imafuta mu mutwe wako, kanyhi wizuguzaje no wusu wako, 18ho munhu wo wose yalece kumanya vyono agwe wulecile kulya, langa wumanyice no Sogo du, mono si kejelaga. Nayo u Sogo mono kaziwonaga ze cinyele, kokuhumbiliza.
U Wugoli ku wulanga
(Lk. 12:33-34)
19“Mulece kwiwutila sawo ya mononze, kono imakuni ne nghangaga vihodangaga, ne wahizi wenjilaga no kuhiza. 20Langa mwiyiwicilaje sawo ku wulanga, kono imakuni hamba nghangaga si vyosuma kuyihodanga yaye, hamba ne wahizi si wenjilaga ho wahize. 21Hambi hono hoyili isawo yako, nha vivyo no mutima wako nawo, wowa wuli baho.
U wuzelu wo muwili
(Lk. 11:34-36)
22“Imeso gakuwa nha yo tala yo muwili. Holeka imeso gako hono gawe matelevu, ale no muwili wako wose nha vivyo nawo wowa wuli mu wuzelu. 23Ninga imeso gako hono gawe mabi, ale no muwili wako wose wowa wuli mu wutitu. Holeka uwuzelu wono wuli muli gwegwe hono wuwe wutitu, uwutitu wuwo, wowa wa kogofya muno muno.
U Mulungu ne Sawo
(Lk. 16:13)
24“Hasina mwitumami mono kosuma kuwetumamila wafwa wejete. Kusoko nha komusula yumonga, no kumwenda yulya we kejete, hamba lunji komutyatya yumonga du, no kumubedegala ayulya muyagwe. Holeka si mosuma kumwitumamila u Mulungu hamonga ne zisawo.
I mahwele
(Lk. 12:22-31)
25“Si holeka nghumulonjelenyi nghutya, mulece kuwa na mahwele ku soko ye zindigwa mukutya, molya cici hamba mongʼwa cici, ku soko yo wumi wenyu, hamba muli ze vivwalo vyono mukuvisaka ku soko ye miwili yenyu. Alu mukwihwesa vyono u wumi wuli mu zindigwa du, hamba hocili cinji cono cicizize? No muwili nawo ma, si wuvicizize i vivwalo? 26Ale muzilangaje ta izindeje za mu mbago, vyono si zihadikaga, hamba si zidudulaga, kanyhi zisina hamba madongha hanji ho hose. Ninga hamba nhavivyo, u Sogo yenyu wa ku wulanga kazilisaga du. Ninga anye ma, si muzicizize zizo? 27Alu mwene, wa hayi ta wa muli nyenye, mono ku soko ye mahwele gakwe, kosuma kwiyonjelezeza ivilo vyo wumi wakwe hambe kwe zuwa limonga du? 28Na muli ze vivwalo, so cici lo mukwihwelela? Mugalangaje ta imaluwa ga mu mbago vyono gawilukaga no kusanula. Sigetumaga mulimo wo wose, hamba si genozezaga vivwalo. 29Ninga nghumulonjelenyi mbeka, vyono sunga no mutemi Solomona mweneco, hamonga ne nhojo yakwe, hamba si yasuma kuvwala myenda miswanu nha vyono linha limonga lye maluwa gaga. 30Alu u Mulungu hono yawe yakugavwika imahanze ga mu migunda nha vivyo gono gali baha izuwali, ninga imitondo gakutagwa mu moto, wulenyi, si kosuma kumuvwicenyi viswanu anye kuciza? Anye mo wanhu mono mwina u wihuwilo wucefu! 31Ale, mulece kuwa na mahwele yaye, mukutya, ‘Alu hamba colya cici, hamba covwala cici!’ 32Hambi iwanhu wono si wamumanyile u Mulungu, nha wo wakuwa kuzigazicila zizo zose. Ninga u Sogo yenyu wa ku wulanga, yamanyile vyono mukuvisaka ivinhu vivyo vyose. 33Ninga hamonga na zizo zose, mwamule kuwulondola u Wutemi wo Mulungu, na zose zono u Mulungu yakuzihila, holeka na zizo zose mokonjelezwa. 34Holeka mulece kuwa na mahwele ku soko ye lizuwa lye mitondo, hambi imitondo nha yowa ne mahwele gayo nayo. Holeka hasina soko yo kutowelela u wugaye, vyono izuwa no wugaye wayo wukwiliye.
Dewis Presennol:
Matayo 6: GOG91
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Cigogo New Testament © Bible Society of Tanzania, 1991.