Génesis 1
1
Ñanderuete rembiapo. Mba’éichapa ojejapo opaite mba’e ñepyrũme
1Ñepyrũmbýpe Ñanderuete (Jahve) ojapo ypyva’ekue yvagakuéra ha yvy.
2Ha pe yvy oĩ nandi ha sarambikuépe, ha ypytũ oĩ yguasu pypukuetereíva ári, ha Ñanderuete Pytu Porãitéva oku’e ijape ári.
3Ha Ñanderuete he’i: Tahesakã, ha hesakãma.
4Ha Ñanderuete ohechávo pe tesakã, ojohu iporãha; ha Ñanderuete omboyke tesakã ypytũ apytégui.
5Ha Ñanderuete ombohéra pe hesakãvape ára; ha ypytũme, pyhare. Ha ohasa ka’arupytũ ha pyhareve, pe ára peteĩha.
6Upéi Ñanderuete he’i: Toñemboja’o umi yguasu mokõi hendápe, pe y yvy apére ha pe y ára yvate pegua; ha ijapytépe toiko pe arapy (firmaménto).
7Ha Ñanderuete ojapo pe arapy iñasãiva, ha omopa’ũ pe y oĩva arapy iñasãiva guýpe, upe y oĩva arapy iñasãiva árigui. Ha upéicha ojehu.
8Ha Ñanderuete ombohéra pe mba’e iñasãivape arapy. Ha ohasa ka’arupytũ ha pyhareve, pe ára mokõiha.
9Upéi Ñanderuete he’i: Ta’ijaty umi y oĩva umi ára guýpe peteĩ hendápe, ojehecha hag̃ua pe mba’e ikãva, ha upéicha ojehu.
10Ha Ñanderuete ombohéra pe mba’e ikãvape yvy, ha pe y Ha’e ombyatyva’ekue ombohéra yguasu. Ha Ñanderuete ohecha hembiapo iporãha.
11Upéi Ñanderuete he’i: Pe yvýpe taheñói opaichagua ka’avo hovyũ ha’ỹiva ha opaichagua yvyra hi’áva. Ha opaichagua ka’avo ra’ỹigui, tokakuaa jevy pe ka’avo heseguáva. Ha opaichagua yvyrágui, tokakuaa jevy pe yvyra ypykue reheguáva.
12Upérõ, pe yvýgui heñói opaichagua ka’avo hovyũ ha’ỹi reheguáva; ha avei opaichagua yvyra hi’a reheguáva. Ha Ñanderuete oma’ẽvo umívare ohecha iporãha.
13Ha ohasa ka’arupytũ ha pyhareve, pe ára mbohapyha.
14Upéi Ñanderuete he’i: Toĩ umi mba’erendy ohesapéva arapýpe, ojei hag̃ua ojuehegui ára ha pyhare; ha ohechauka hag̃ua umi ára (día), jasyjere (mes) ha añokuéra.
15Ha umi mba’erendy toĩ arapýpe ohesape hag̃ua yvy apére. Ha upéicha ojehu.
16Ha Ñanderuete ojapo umi mokõi tesape tuicháva; pe tuichavéva (kuarahy) ohesape hag̃ua arakuépe, ha pe michĩvéva (jasy) omyesakã hag̃ua pyharekuépe ha ojapo avei mbyjakuéra.
17Ha Ñanderuete omoĩ umía pe arapy iñasãivape ohesape hag̃ua yvy ape ári,
18ha oisãmbyhy hag̃ua arakue ha pyharekuépe, ha omboja’o hag̃ua ojuehegui tesakã hypytũgui. Ha Ñanderuete ohecha iporãha hembiapokue.
19Ha ohasa ka’arupytũ ha pyhareve, pe ára irundyha.
20Upéi Ñanderuete he’i: Taheñói ykuérape opaichagua mymba oikovéva ýpe, ha guyrakuéra ovevéva yvy ape ári g̃uarã, pe arapy iñasãivare.
21Ha Ñanderuete ojapo ypy umi mymba ypegua tuichaitéva ha michĩvéva oiko hag̃ua ho’ytahápe yguasúpe, upéicha Ha’e ojapova’ekue opaichagua mymba ypeguáva ha opaichagua guyra ipepóva. Ha Ñanderuete ohecha iporãha.
22Ha Ñanderuete ohovasapa, he’ívo: Peñemoña ha peñembohetáke, pemyenyhẽ umi yguasu ha guyrakuéra toñemboheta yvy apére.
23Ha ohasa ka’arupytũ ha pyhareve, pe ára 5-ha.
24Upéi Ñanderuete he’i: Yvýgui taheñói opaichagua mymba, mymba tuicháva yvýre otyryrýva, ha opaichagua ambue mymba yvy apére g̃uarã. Ha upéicha ojehu.
25Ha Ñanderuete ojapo umi mymba saite, ha ambue mymbakuéra hesaite’ỹva, ha opaichagua mymba otyryrýva yvy apére. Ha Ñanderuete ohecha iporãha hembiapokue.
26Upéi Ñanderuete he’i: Jajapóna kuimba’e ha kuña ñane ra’ãngáicha, ha tañandejogua; ha toisãmbyhy hikuái umi pira yguasúre oikóva, umi guyrápe ovevéva árare, umi mymba tuichávape, pe yvy tuichakue javeve ha opaichagua mymba otyryrývape yvy apére.
27Ha Ñanderuete ojapo ypy kuimba’e ha kuña ha’ãngáicha, Ñanderuete ra’ãngáicha ojapo ypy ichupekuéra.
28Ha Ñanderuete ohovasa ichupekuéra ha he’i: Peñemoña ha peñembohetáke; pemyenyhẽ meve ko yvy, ha pemoĩ pende poguýpe, peisãmbyhy umi pira yguasúre oikóva, guyra árare ovevéva ha opaichagua mymba omýiva guive yvy apére.
29Ha Ñanderuete he’i: Peikuaa porãke, ame’ẽmbaha peẽme opaite ka’avo ha’ỹiva, oĩva guive yvy apére, ha opaite yvyra hi’áva ha’ỹi reheve, pene rembi’urã ramo.
30Ha opaite mymba yvy ape reheguáva, opaite guyra ovevéva ha opaite umi yvýre otyryrývape ame’ẽ opaichagua ka’avo hovyũva ho’u hag̃ua. Ha upéicha ojehu.
31Ha Ñanderuete oma’ẽvo opaite mba’e ojapova’ekue rehe ojohu iporãitereiha. Ha ohasa ka’arupytũ ha pyhareve, pe ára 6-ha.
Dewis Presennol:
Génesis 1: ÑÑP2015
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.