Fakasigadan 20
20
Abrayam ay Abimelek
1Abrayam dadwa naubun wan Mamre ay nalao sas talun Negeb. Ay dadwa nanamanwan sas wabilug Kades ay Sur. Ay wa glugo, kanya nalao sas Gerar. 2Ay kaduge dadwa sanya, Abrayam gfoyung sa sangay taw tagbanwan sanya te, “Sara ku faduksay way.” Ay Abimelek, Gerar at fun, nasugu at ngay fagsuguan laman nantaban Sara sa anya.
3Sik yabi, Dius ansure sas Abimelek siginan sik taginfan. Dius nalong anya te, “Umbul ro wo, aroro nabul o kafag mangena ke mangama wan.”
4Abimelek ye nafakamulun at mauri sas Sara, ay nalong te, “Ku Fun, wain ro am fagfabulun angku ay ku ngay taw, ay kwe asalanan. 5Masdi Abrayam nalong angku te, at faduksay way Sara. Ay anggan Sara nalong yangay te, at faduksay way Abrayam. Nu katanya, masine way ku algan dewa au nabul Sara.”
6Ay Dius nabalus anya te, “Kin, nasaful kwan, wo e amatanganan mauri, nu katanya, nasalag au emu laman di o gfakamulun at mauri sas Sara laman di o e asalanan sa angku. 7At masine, fafolii wan anya sat indugan, aroro at indugan sik taglong, ay gdarangin ro emu laman di ro wo kabul. Ay nu dway ro wo nafafoli anya, umbul ro wo gasfuan am ngay taw.”
8Ay balabag di sbalabag sirut, Abimelek nafauro fagayu at tagfakamulun ay nafoyung at taginfan, ay kanya fagayu nu nadungug, kalimu. 9Ay Abimelek nafauro Abrayam ay ginto anya te, “Wain am fagnafakamulunun sa emi takatanya? Nataw nunda ku asalanan sa emu am fagnafadasugun faurianan sa angku ay sas fagdaul ku fagfagtainanan? Wa matuyan am fakamulun takatanya. 10Ay wain am fagnafakamulunun takatanya?”
11Ay Abrayam nabalus anya te, “Nu glong kro ste fag furuan, we kalimu Dius, ay nu glong kro, gfabul ro am angku ay gbul ku bubay. 12Anud duksay way mi, ay si way baliwa em mama, ay nabubay au anya. 13Gina Dius glong angku te, ‘Ubuni wan am mama at fagbanwanan,’ nalong au sas Sara te, ‘Katatuy ban nu gfalag o te, kesug tuo angku: nusnga nday ban ta, longi way te, duksay way ta.’ ”
14Ay Abimelek nafafoli wan Sara sas Abrayam. Abimelek abat ngate nafaurianan Abrayam, kanya nafon ya sik ngay tupa, ay ngay baka, ay sik ngay fagsuguan mangama ay mangena. 15Ay nalong sas Abrayam te, “Mafalganan au gfabanwan ayu nusnga nday ay fakaylatun gbanwan si ku fagagbilugun fag daga.” 16Ay nalong yangay sas Sara te, “Nafon au sam faduksay sadik libuk salapi, laman sik famatuyan sa ay ngay kaiban te, kwa nafakamulun sa emu at mauri.”
17-18Gina Abimelek nabul Sara, Yawi nafayud gsisian fagayu mangena tagbanwan sis Abimelek at bale. Nu katanya, Abrayam nadarangin sas Dius, ay Dius nafafia Abimelek at mangena ay anggan at fagsuguan fag ngay mangena laman gdog tua kae sisian.
Dewis Presennol:
Fakasigadan 20: OCCT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright © 2021 by OMF International, Philippines