Luka 11
11
Yemasanga ye Yeso a ngona bereremo
(Mat 6.9-13; 7.7-11)
1Oye dara nze Yeso aberoromo ariya. Ni se ma jamu, nze ono vento ayima ano yemasanga me ma gon me, “Asharri masado nane se woro neng ngona beroromo, sakama nane se Yohana ma masa ano yemasanga a me.”
2Nze Yeso gonnye, “Inga se nyi ya ngona beroromo, ego,
“ ‘Tata,
a deke ijarroi sansang,
a togomo ta toi Ogomo Asharri to rai.
3Nyado eyabo wucu owere kane.
4Buzado a masharra mado,
nane se woro ga buzaza ana geme se nga na sharra a woro.
Tego odekedo epete ayimi yiyau ye sharro ne.’ ”
5Nze Yeso kuru ogon ano masa a me a tare, “Atingo woi okunyi zen orone, nze ma ngame a me neng azata tiyǝ, nze ma gom me, ‘Wano, nyan avale agoro aturra ataro. 6Oye orone okong osuru denye imi, asuru atano, mizemeng eyabo se miya nya kame ama wucu ne.’
7“Atingo orone me se mana ngame a me agangǝrrǝ oduru me nze ma garre ayim mi ma gom me, ‘Deken tii mina pate arakǝi, neng abiya akan zal woro na tete, nze ma morra owera in nyei eyabo ne.’ 8In gon nyi kobarse mama wera ma nya me dan baka orona ome ze ne, ma neng wera ma nya me koyaze maya narra me. Baka orona ome dan kone emme mo sangarra me ne.
9“Miya gosan nyi, sangarrane, a ya nya akanyi. Gangarrani eya morra me, terrese ne a ya puku akanyi. 10Zal ono gome se ma sangarre a ya nya rrome. Zal ono geme se ma gangarri maya morra me. Zal ono gome se materrese a ya poka rrome.
11“Avizi ayimi akanyi se inga vana ome sangarre me biginu ama nya me biwǝ. 12Ne vana me sangarre amwa ama nya me bilakara? 13Inga nyi ayebebo nyi ru eyabo erreze se nyi ya nya abiya akanyi kabarri Tata okunyi Asharri maya nya uRuhu Usansang ano sangarra me.”
Yeso neng Balzabol
(Mat 12.22-30; Mar 3.20-27)
14Oye dara Yeso azuzu olakere uruhu obo a oye ono, ni si owazarra me sure nze ono me bura bi belen. Nze ano kuna zal nga kerkene. 15Nze an ngai ayima akanye nga go, “Cha Dan Belzabol ze ne, Ogomo uruhu zen a nya me a gata awo zuzu uruhu obo me ne.” 16Nze an ngai anara o pese rrome puru nze nga go, wongkodo eye yegwani egemese ano neng ru se ngo zen a gata asuru Asharri.
17Ni se Yeso, ma ru adodonzo ageme se nga yayimmi nze magnnye, zal togomo togeme se tu warna ka repo tuchǝkǝnǝ binyarna neng apun, togomo tome, tozema torene. Nane ze atitǝu ageme se awarna ka repo tuya chǝkǝnǝ binyarna tuya wirtu. 18Nyi go min wuza etoma neng a gata o Shetan, Inga se o Shetan warna ka repo, maya binyarna neng apana akame, ana ngona in ni zi togomo atume tuwe a gata? Tuni si nyi go a gata Belzabol ze miya zuzu uruhu obo. 19Atingo a gata a Belzabol ze min zuzu turuhu tobo, to, ano yemasanga akanyi pa? A gata an nga vizi nyi zuzuzun no? Ano masanga akanyi nga ya wuza akanyi usheriya a tara me. 20Inga se a gata a Ogomo Asharri ze min zuzu uruhu obo no, to togomo to Ogomo Asharri tuna ranyi geme.
21“Inga se onagata mana gorro dede maya wankǝli atitǝu akame, togorro to atitǝu akame to ya chǝkǝnǝ shammo. 22Se ko inga ono kera a me a gatama rai ma garra meneng okara nze ma kera me a gata, nze makanke togorro togeme se ono me zen no se toze agatame, nze ma nyiza togorro tome se mana kanka.
23“Ono ogome se mazema worso me nam mi ni, maya binyarna neng mi geme, ono ogome se mata malan aworoso me ne maya bashakarra meze.”
Okuru uruhu obo
(Mat 12.43-45)
24“Inga se uruhu obo osuru ono ayi pun, matarase tora tugumese tuzeman manyi ni, baka ma morra aro vonke. Inga mata murrane nze ma go, ‘Ya kuru atitǝu ageme se mina suru ano.’ 25Inga ma ra ma morra se ana sarka, ana mamarra atitǝu me, 26nze ma kuri maka kanka turuhu tobo tome sunare togeme se tu kera me evera, nze nga rai nga chǝkǝnǝ arame. A bimaso, ochǝkǝnǝ ono ogomme oya kera obura me esharro.”
Uvati taye to magangang
27Ni se Yeso ya yimi belen, nze oye wai ayima ano nze ma nyiza rremelo, ma gon me, “Ogomo Asharri vati owai ogome se mayoye taye, se ma gugui nze ngona bare nanna.”
28Nze Yeso garre, ogonme, “A, baka uvati taye tukera ana geme se nga kuna beleng bo Ogomo Asharri nze nga tarse beme!”
Ogǝngarra egwani
(Mat 12.38-42)
29Ni se ano ya dako o varanu ayem me se Yeso zanu, nze ma bura gusa, “Ozamane ogina, ozamane uburu zi, nga ya barsa ugunna abezeze nye eye yabo neng egwani, nze eye yabo ze ma nu ne se ekera e Yonana. 30Sakama nane se Yonana maze eyabo ano Nineba, nane meze Vana Ono ya chǝkǝnǝ ano ozamane ogina. 31A dara bimaso, Osarrouniya owulu a tara maya wera neng ana kame ozamane ogome, magonnye nyi dan ngona derte ne, maka suru ayiyau ganka baka ma ra makune yemasanga neng rremo ye Solomon. Nze woi gina se ma kera Solomon me. 32A daro masa masano ano nineba neng ano ocha ogina nga ya nyana e nyi, nga go nyi dan ngona derte ne, baka nyi na gare belen be lo be Yonana. Woi ginna se ma kera Yonana ayina!
O pitilla rripung
(Mat 5.15; 6.22-23)
33“Woi ze ma nu ne se ma wurra o pitilla nze ma gorkuza ne, ne ma pate ome neng eso ne. Aye, se koma weya a tara yedǝrrang, ara geme se kovi se ma pete maya ni ara sansang.
34“A ji a meze opetella orrepung. Inga a ji a kai aze shammo, zal rrepung a rroi zal yema chǝkǝnǝ a masansang ne. Nane ze inga a ji a kai a masansang ne, rrepung a rroi zal eya chǝkǝnǝ a mari. 35Ka shauwo, kada masansang ma geme se ngo zen no, ma kuri mare ni. 36Inga rrepung a rroi zal, ezen masana, to ariya zemen mari ne, ai zal kwaba ya wuna sansang sakama nane se o pitilla wuza ara sansang.”
Yeso ma puku tupuru tuFarisi neng ano yemasanga ye makirri
(Mat 23.1-36; Mar 12.38-40)
37Nze Yeso ayimi bellen, nze oye oFarisi ma tisa Yeso ama atitǝu, anu guna nga wuci emo wucu. Nze Yeso ngame baka nga wuci eyabo wuchume. 38Nze oFarisi ma nǝrǝ se Yeso mata zurro oware ne kamung nga wuci eyabo wucu mi ni, nze okerkene meme.
39Asharri gon me, “Nyi tuFarisi nyi kwizuzu amarro mpoto neng eso, ama ayema ka nyi, nyi ya binja neng everra neng everra neng ayabebo. 40A lakerra kǝwǝi, dan Asharri ageme se ma wei a kai, dan mazema wei ayim mi ni? 41Atongo nyi ya nya ano tuyan epegeme se nyi zan no, ko yayya ekinyi eta chǝkǝnǝ da madini.
42“Nyi neng narrǝ, nyi tuFarisi! Nye nyiza Ogomo Asharri uzaka zal neng togorro to oyaje otunango neng odangara tunango tu obi zal. Nze nye na nya me ne owoza magagan neng tubarsa togomo ta Asharri. Epegeme se e ze nyi ta wuza geme, dan neng odeke udangaran me ne.
43“Nyi neng narrǝ, tuFarisi nye narra guna ata nya nyi, tora tuchǝkǝnǝ tusasaru togura to beroromo, a kuru agirwanǝ abeze nyi okowu ukasuwa.
44“Nyi neng narrǝ, nye yankǝnǝ in sau ma geme se mamang eyabo a tara me ne se ano ya nga na nu bo nane, nga ta ru epegeme se nga ya kayanu ne.”
45Nze ono vento ayimi ano masano makirri ma Musa ma gon Yeso, “Achakura, inga ngogo nane, ai, woro ma ngona tinza do.”
46Yeso garra, ma gon nye, “Nyi neng narrǝ nye ano masano makirri ma Musa nye na binja ano otirra makirri odendeng a nga zakǝ, ama nye neng topana tonye, ko nan rrebo nye ta dorre ne anu guna nye malanye ne.
47“Nyi neng narrǝ, nyino se ya in sau ma rezeze ma to annabi ana geme se tunongona tonye Toma wuza. 48Nyi nan topana tonye, nyi mama buki, nyi kuru nyi garra epegeme se tunongo tonye Toma wuza ano bezeze taye to Ogomo Asharri, nyi ga siya in sau ma me. 49Emeze se rremo ye Ogomo Asharri yemago, ‘Ya Toma ka nye to annabi neng ano yetuma. Nga ya wuzan an ngai ayima akanyi, nga nyan an ngai uwahala.’ 50Baka nane a ya wucu ano zamano gina tomono, baka nga wuza a to annabi zal, sunnga suru obura masano, 51tuna surre owona Habila, arawa Zakariya, ono gome se ama wuna a garwa obagadi ohadaya neng ara a sansang ayimi akura sarru. A miya gosan nye, a ya wucu ano ozamane gina tomono, baka epe gemme zal!
52“Nyi neng narrǝ, ano masano makirri ma Musa, nye na pate ogora uru eyabo, nye nan topana tonye nyi dan pete ne, nye dan deke ana geme se nga ya narro pete, nga pete ne.”
53Ni se Yeso deke ayemme ayem me, nze ano masano makirri ma Musa, neng tuFarisi nze ngamo mantarra neng me, nga ya rraza me neng bi sangarra me togorro chebete, 54nga ya gatama a nga na me rremo ama buku eme geme se e ze me derte ne.
Dewis Presennol:
Luka 11: JER
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
©️2022 Luke Initiative for Scripture Translation