Wepélisiananu 19
19
Sɔdɔm valé Gɔmɔɔ sɛrɛle
(Mt 11:23–24; Ébr 13:2; Jud 1:7)
1Woo lanje fiéo, wo bɔ Sɔdɔm nyanadi bléyi va; ’té Lɔt a é nyanale Sɔdɔm gɔrɔ ’léé. Lɔt wo ye aan wo, é nwa wo sile zia we gi, yé é dia é bli la wo ’lɛ. 2A zuo é léé: Anzannu, kalé zanté, ’ka da ka wuozan lé kɔn ’léé, yé ’ka gane ma zuru yé ’ka yii; yé tɛlɛ ’ka nwa bladi tutu yé kalé zi sia. Wo lé a lɛ léé: Gba, ko dan yii lɛ béera. 3Naa, Lɔt wo tunu fɔɔ yé wo da a va yé wo wɔra alé kɔn gi. Yé Lɔt fɛti kɛlɛ wo lɛ; yé buru lé lévɛn ’ka a va lo, é a kɛlɛ wo lɛ. Yé wo fɛ ble.
4Wo ’ka tan yia lɛ lo yé flamunu, Sɔdɔm munu da, yé wo Lɔt lé kɔn zi lɛ sɔɔ; é sia nénu ma yé é bɔ mi segelenu ma, flamunu faa zén ékeva ’té. 5Wo Lɔt laa, yé wo lé a lɛ léé: Munu lé wo wɔra ilé kɔn gi kyɔ nyanadi, wa kyɛɛn? ’I wo bɔra ko lɛ ’ko, yé ko wo dɔɔ gɔné nya. 6Lɔt bɔra wo va kɔn ’léé, yé é kɔn lɛ tan é zuo. 7É lé wo lɛ léé: An bwenu, kalé zanté, té ka wenaané kɛlɛ lo. 8Ka ye, an lunu lé wo ’ka tan gɔné dɔɔ lɛ lo, wa fié. Maa dan da lɛ wo nya béera, yé we lé é sɔ ka lɛ, ’ka kɛlɛ wo lɛ, naa, munu ’ko a bɛn nya anlé kɔn gi, amalé té ka we do kpen kɛlɛ wo lɛ lo. 9Wo léé: ’I si ana mi! Yé wo lé é ziin léé: Mi ’ko da bɛn nya yé sin é sɔ a lɛ léé, ’é kɛlɛ weblezan nya. Aa bɔn! Ko dan wenaané kɛlɛ lɛ i lɛ yé é mini wozé ta. Yé wo Lɔt nyunu plɛplɛ, yé wo bié duoli sɛrɛle we gi. 10Yé mi fié ’ko ’wo bɛ soi yé wo Lɔt wɔra ’wo va kɔn gi, yé wo kɔn lɛ tan. 11Yé munu lé ke kɔn ’léé bɛ, wo wo yuɛ ’wii, é sia né kiénénu ma yé é bɔ mi segelenu ma, yé ’bɛnu wo wɔlɛi nyaa ’wo ma é pla kɔn ’léé naginile nya.
12Munu ’konu lé Lɔt lɛ léé: Mi kyɛɛn ɛ ke i va tan ’koo? I lu zananu koo, i benu valé i lunu koo, ilé fɛ faa lé ke fla koo, ’i wo si fɛkona. 13Naa, ko dan fɛkona sɛrɛ lɛ, siaale ana munu ma kɛlɛ plɛplɛ Gakelebale tɔné gi, azama. Gakelebale ko pa zia léé, ’ko ana sɛrɛ. 14Lɔt bɔra yé é we fe é lu zananu lɛ, yé é lé wo lɛ léé: ’Ka nwa, ’ka fwi fɛkona, naa, Gakelebale a gona fla ’wii lɛ. Naa, é dɔ a lu zananu gi léé, gle lé é a wo.
15Bladi tutu, lanjenu Lɔt tunu a fele nya léé: ’I nwa, i na valé i lu fié lé wo ke ’ko, ’i wo si ’i go woan, dé i da zamaga wo fla ’wii bléyi va. 16É a mɔnna aan wo, ’bɛnu kun a bɛ ma, yee koo, a na koo, a lu fié koo, wo wo kun wo bɛ ma; é sɔ Gakelebale lɛ léé, wo vo é yuɛma, azama; wo go wo nya, yé wo si fla aan wo, wo daan wo ma. 17Wo wo si fla aan wo, ’bɛnu va mi do lé wo lɛ léé: ’Ka go vlan nya kabo bélile we gi; té ka yuɛ vɔ ka zuo lo; té ka dɔ bwi la lo; ’ka vlan buru gɔ vazia, dé ka da zamaga wo. 18Lɔt lé wo lɛ léé: Oo Mizan, gba! 19I an ye mi zin nya kɔɔn yé i nyanai zén an ta, yé i an vo é yuɛma; naa, we tɔntɔn é dan bɔ lɛ an ma yé an zamaga wo an sile we gi ’lɛ, ’té an ’ka tan bɔ lɛ gɔ ma lo. 20I yua, fla mun a é pu, an bɔalé an yɔɔ ’bɛna, yé é ziin, ’bɛ a kiéné. Ilé zanté, ’an go ’bɛna yé ’an yɔɔ ’bɛna yé an béli. Fla mun, ’bɛ ’ka kiéné loo? yé an boen é vo é yuɛma. 21Yé é lé a lɛ léé: Maa ’ma, maa zin ’ko kɛlɛ i lɛ é ziin yé fla lé i alé we fe bɛ, maa ’ka dan a sɛrɛ lɛ lo. 22’I go fiéfié, ’i yɔɔ ’bɛna, naa, dé i ’ka tan bɔ lɛ ana lo, an ’ka bɔa we do kɛlɛle lɛ lo. We ’ko ma lé wo fla ’ko laama Soaa.
23Yiri nwa bléyian va, ’té Lɔt bɔ Soaa. 24Yé Gakelebale povun valé kyɛ zana Sɔdɔm valé Gɔmɔɔ ta bélé lɛɛ zo. Gakelebale bozen va lé we ’ko si. 25Fla ’konu koo, fɛna pɛblɛɛ faa koo, fla ’konu la munu faa koo, tɛrɛ la lu faa koo, é wo sɛrɛ tatata. 26Lɔt na é yuɛ vɔ é zuo yé é kinin miwɛyili nya.
27Abraam nwa bladi tutu, yé é go fɛana lé é dɔ Gakelebale ’lɛ é kyɛn, ana. 28Yé é yuɛ vɔ sɔdɔm valé Gɔmɔɔ vazia, yé é yuɛ vɔ fɛna pɛblɛɛ faa la, yé é ana kyɛgoi ye nwana bélé ’furu blɛn lé kyɛgoi zo.
29Dé Kazambale fɛna pɛblɛɛ flanu sɛrɛ Abraam sele dɔ a gi; yé dunuzén?-?milawe lé é bɔ Lɔt nyanala flanu ma yé é wo guru zana a gi bɛ, é Lɔt si ’bɛ we ’konu gi.
30Lɔt kana nyanale ma Soaa, amalé é si Soaa yé é gɔ gié yé é nyana gɔ nwiin loru, yee valé é lu fiénu nya. É nyana gɔmaguru gi, yee valé é lu fiénu nya. 31A lu vininzan lé é zuané lɛ léé: Ko ti a kwa; yé mi do kpen ’ka tɛrɛ ’ko la yé ’bɛ da ko va bélé tɛrɛ faa la we zo lo. 32’I da, ’ko nwɛ nɔ ko ti lɛ yé é a mini, yé ko yi gyɛ a va, yé ko ti kulu ’é kɛlɛ. 33Yé wo nwɛ nɔ wo ti lɛ ’bɛ yi la é béli; yé a vininzan go yi gyɛ lɛ é ti va. Yé a ti ’ka we do kpen dɔɔ lɛ a yiale valé a nwale gi lo. 34’Bɛ é tu kini a vininzan lé é zuané lɛ léé: Bé ye, an yi gyɛ kyɔ an ti va; ’ko nwɛ nɔ a lɛ béli ’ko é ziin yé ’é a mini, yé ’i go yi gyɛ a va, yé ko ti kulu ’é kɛlɛ. 35Wo nwɛ nɔ wo ti lɛ é ziin ’bɛ yi nya é béli, yé a lu voélazan go yi gyɛ lɛ a va; yé a ti ’ka we do kpen dɔɔ lɛ a yiale valé a nwale we gi lo. 36Lɔt lu fiénu bɔn si ’wo ti ma. 37A lu vininzan né yaa gɔné nya yé é a tɔ pa Moab; Moab munu lé ke ana fɔɔ kyɔ yi nya, é a wo faa tra nya. 38A lu voélazan né yaa gɔné nya é ziin, yé ’bɛ ézé tɔ pa Bɛn‐Ami; Amɔn munu lé ke ana fɔɔ kyɔ yi nya, é a wo faa tra nya.
Dewis Presennol:
Wepélisiananu 19: GOURU
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Alliance Biblique de Cote d'Ivoire 1979