GENESIS 2
2
1Mania asi ade la eri thalo lo ki ma fanua na i iano kera thauwai nia ka sui, ma do eki sui bana na ni iei. 2Ma ana fiuna fa boṉi, tha God e faasuia naa ra nia asi do ne thauwanidaki; ma nia ka mamalo ana fiuna fa boṉi eri faisia ra nia ni sui bana ne thauwai nia. 3Ma tha God ka alua lea la fafia fiuna fa boṉi eri, ka faaabua: uria na afa boṉi eri nia e mamalo faisia ra nia ni sui bana na tha God e thauwai nia, ma ka alua ka to bonaa.
4Si ade la ne ita mai ana thalo lo ki ma fanua ne i iano nai nia, si maṉa na kera thauwanida ka sui, afa boṉi eri na tha Jihova God e thauwai nia sui naa fanua ne i iano ma thalo lo ki, 5Me gwalua ’ai eki sui bana i masuu si maṉa ne a’i si ni u bana i theegano, ma kaala lolo eki sui boo si maṉa ne a’i si tae u mai: uria na tha Jihova God e a’i si falea u mai dani na kai arunia fanua, me a’i ta wane si to bana sa kai ’ilia theegano. 6Ma sui si datha ka tae iaa faisia fanua ne i iano, ka faagwinaa maana theegano ka sui boo. 7Ma tha Jihova God e thauwai nia wane ana gegeona theegano, ka ufu sulia ro malee gwalusu nia ki asi maṉo ni marukia; ma wane eri ka bii maruki. 8Ma tha Jihova God ka fasia si do lea ki la ra i Itena na ka lio uria si kula ana tae lana thato; kula eri naa, nia ka bii alua wane eri ne thauwai nia iei. 9Ma i theegano eri tha Jihova God ka faatagwasua ’ai eki sui bana riki lana ka lea ma ani lana ka lea lau boo; ’ai ana marukia lau boo ne ni initoona ra eri, ma ’ai ana thaitoomana lana lea la ma taa la. 10Ma tee kafo baita ne ita mai i Itena ka lae uria ra eri fasi kai faagwinaa; sui lalae kau faisia si kula eri, ka mataṉa ana fai tabii kafo. 11Thatana do totonao kera alaṉia ana Pisono: nia neri na ka lae kakalia fanua i Hafila sui boo, si kula si golu ni iei; 12Ma si golu i fanua eri ka lea bana; deliama ma fau onikisi ni lau boo iei. 13Ma thatana ruana tabii kafo kera alaṉia ana Gihono: nia neri na ka lae kakalia fanua i Ithiobia sui boo. 14Ma thatana ula tabii kafo kera alaṉia ana Idikela: nia neri na ka lae uria Asiria asi kula na ka lio uria tae lana thato. Ma faina tabii kafo na ṉa Iufetisi. 15Ma tha Jihova God e talaia wane eri, ka alua i la ra i Itena fasi kai ’ilia theegano ma kai betaa. 16Ma tha Jihova God kai ṉata fifi isana wane eri, ka una eri, Ana ’ai eki sui bana na i la ra, oki tona ania bamua foana: 17Ma sui ’ai eri ana thaitoomana lana lea la ma taa la, osi ania foana: uria na afa boṉi toto oki ania foana, e mamana oki maelia.
18Ma tha Jihova God ka una eri, E a’i si lea ifana wane nei kai to tee nia; nau kwai thauwai nia ta Do ni kwaiadomi la ifana na kai farana. 19Na ana theegano tha Jihova God ka thauwai nia do maruki eki sui boo i masuu ki mai, ma thaaro eki sui boo i mamaṉaa; ka talaida mai satha Adam fasi kai roṉotoona thatada na wane eri kai alaṉida ania: ma atona bana ta thata na tha Adam e alaṉia ata do ana do maruki eki sui bana, thatana bonaa neri. 20Ma tha Adam e falea thatada ifana katele eki sui boo, ma ifana thaaro na i mamaṉaa ki, ma ifana do maruki eki sui bana i masuu ki mai; una ena mena, e a’i kesi fulatoona ta do ni kwaiadomi la ne farana tha Adam. 21Ma tha Jihova God e faabiṉaa tha Adam ka biṉa liu: sui nia ka lafua tee si ogi babarana, ka fono fafia si kula eri ana seena ne toto iei, ka mafo lau bana; 22Ma si ogi babarana na tha Jihova God e lafua faisia seena wane eri, nia ka thauwai nia ka lioe kini, sui ka tolea mai sana wane eri. 23Ma tha Adam ka una eri, Si ogi ana ogiku nai nia, ma seena na si kula ana seeku: keki alaṉi nia ana Kini, uria na kera lafua faisia seena ṉa wane.
24Uria si kula eri, wane kai akwasia maka nia ma thainana, kai ofu bia kwaina: ma keroa tee see imole naa. 25Ma wane eri ma kwaina kero talu badaroa, me a’i kesi seenoni.
Dewis Presennol:
GENESIS 2: MLU1949
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
British and Foreign Bible Society 1949, 1951