Lɔgɔ Sabba 7
7
Lɔga Maa Dhittɛa Ba
1Na Tumu sɛɛsɛ Nɔa, “Anye wa karinyɔ hunde ani hira ridhing ningginɛna na chɔɔ bhɛa ngatenyda hira hɛtto ko inye kona ninggɛ dhulde. Na mɛa ibha zuga gunyu kumulɔng na ago tunnugu gonggul toye. 2Na ibha kɛginyaa bhɛa nanu ridhing ngalɔmmɛayo ga maya issabbay ko ga ngaha issabbay. Na yɔk ga bhɛa nanu lɔmmɛa ridhing ibha na maya dhɔnɛ ko na ngaha dhɔnɛ na tɔgɛsɛ gonggul toye. 3Na shɔa ko yɔk ibha ga maya ko ga ngaha tayɛn kari issabbay issabbay na kushurtiyaa na kɛtɛldi basseyɔ. Bhee kèni messɛ ngangaye, kèni ngaahaya kɛtɛldi basseyɔ na kete gee dhɔynɛ na ale bhɛlnɛye. 4Na ale ihi na hunde ungo a issabbayte, anye ale kughurton guyɔ na dhak ungo zugo ramman bar ko kali. Na ahaa bere keghendoni ɛlla bay lɔmmɛa bassey kumulɔng ale kuhukkan rang.”
5Na Nɔa koo mesu damiya yogɛsɛna ꞉Tumu kumulɔng.
6Nɔng Tumu huna dhitto ba ma, dha bere oynyaa Nɔa a 600. 7Na nɔng ko zuga gɛnyɛ jara ma na tunnugu gonggul. 8Na kɛginyaa ridhing ngalɔmmɛayo ko ga lɔmmɛa ridhing doriyo bhiy bhiy ko shɔa ko kɛginyaa bibiyo ko ga silolnɛna bay bay ko ga chicho chicho gen, 9ga maya ko ga ngaha kari, hoya na assa Nɔa na tɔgɛsɛ gonggul toye damiya bere senɛsɛna ꞉Tumu. 10Na saniu ungo issabbay na maa dhittɛa ba hoya.
11Na hunaa oynyaa Nɔa tewa 600de, bɛrgu rammanɔ unga ku tɔmmɔn ko issabbay, ma dhugundiyaa ba toye na guyɔ tumɔ dhɔya. 12Na dhagu kaliɛna zugo ramman ko bari zugo ramman.
13Na ngakoleonu bere dhɔttanɛ :guye rɛ, a kala bere tunnugɛa :Nɔa ko :tɛriya nɛnɛ ko erroa gɛnyɛ :Semi, :Kami, :Yabeti ko :mɛrɛya gɛnyɛ gonggul. 14-15Na kɛginyaa dusuny lɔmmɛa bassey ko ga kiwoo ko ga bansɛa ko ga silolnɛna bay bay ko ga chicho chicho gen kumulɔng, annaa hoyaa ramman ramman na tɛlda ko Nɔa gonggulɔ toye. 16Na chɔɔ ahaa bere ghendono ꞉Tumu kumulɔng, ga maya ko ga ngaha kari, annaa tunnukta gonggul damiya bere senɛsɛna ꞉Tumu. Na koo Tumu nyɔgu tutuk.
17-18Na guyɔ dhagu ungo zugo ramman na ma dhiyiyaa na ba kumulɔng te yirisi na gonggul dhɔngga :ma na zamiu ma tundɔ. 19Na ma dhiyiyaa dhɛ dhɛ ko bhee guyɛ kutuloa bibiyo kumulɔng. 20Na kutulo gɔyɔ :ma na tɛldi surr toye. Na hunde ɛlɛhɛnnɛ hɔrtina iho bhɛa zamiyɛa :gonggulɔ ko kutulo sabbichine kɛrghɛnɔye, makkiyo mɔsay siyɔ kɛngi tɔmmɔn ko hayna. 21-23Na ahaa lɔmmɛa bassey woyɛa bay kumulɔng huga ꞉Tumu rang na garayɛ, shɔa ko kɛginyaa dusuny ko ga kìwoo ko ga silolnɛna bay bay ko ga chicho chicho gen ko zugo. Na dhɔttɛ :Nɔa ko zuga gɛnyɛ ko ahaa ɛlla gonggulɔ toye sɔng.
24Na ungo 150 ma ngani ngagarsɛo.
Dewis Presennol:
Lɔgɔ Sabba 7: SUQ
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
©2023 Suri Translation Project which is a project of the Ethiopian Evangelical Church Mekane Yesus