ལུ་ཀ། 24
24
ཡི་ཤུ་ལོག་ཉི་བཞེངས་པ༌ལ།
1དག་པ་ཀབ་ཉི་ གཟའ་ད་ཝ་ག་ནོང་ཀ་ ཝུན་བེད་པེ་རང་ རོག་ཏེ་བ་ཀི་ ཅམ་ཁཱན་སི་བ་བུ་ཉི་ དུར་ག་ཏཱན་དི་ཝ༌ལ། 2ཉི་རོག་ཏེ་བ་ཀི་ དུར་ག་གོད་པ་ཀབ་ཉི་ ཀོ་བུག་ཉི་ཐ་ཁཱན་ ལུང་ཁེ་པ་གིར་ཉི་ བུན་ཐ་ཝ་ ཅ་གི་ཝ༌ལ། 3དག་པ་ཀབ་ཉི་ རོག་ཏེ་བ་ ནང་ཀ་ནུབ་ཉི་ གོད་པ་ཀབ་ཉི་ ཡི་ཤུ་ག་སྐུ་ཕུང་ མ་ཝ་ཅ་གི་ཝ༌ལ། 4ཨོ་ཐ་ཀོར་གེ་ རོག་ཏེ་བ་ ངང་ཉི་ཆོ་ལ་ཀབ་ཉི་ ཁ་མུང་བ་ལིང་མིན་གེ་ འོད་ཆར་བ་ཨ་ཝ་ སོ་ངོ་ཉིག་ཙིང་ རོག་ཏེ་བ་ཀ་ ར་ག་ཐིང་མ༌ལ།
5ཉི་རོག་ཏེ་བ་ ཡོང་ཁེ་ཉི་ ཕྱག་འཚལ་བ་ཀབ་ཉི་ ཨོ་ཉ་སོ་ངོ་ཉིག་ཙིང་གི་ རོག་ཏེ་བ་ཀ་ གསུངས་མ་ལ་ ཤི་ཁཱན་བ་ཀ་པོང་ཀ་ གསོན་པོ་ཨ་ཉི་བཞུགས་ཁཱན་ ཧང་ཨ་ཉི་ལམ་ཅ་ཡ། 6རོག་ཐ་ག་མཱན་ཅ་ དག་པ་ཀབ་ཉི་ སྐུ་བཞེངས༌པ། རོག་ག་ལིལ་ག་ བཞུགས་པེ་གང་ཀ་ རོ་ཀི་ ཧང་གསུངས་མ་གི་ལ་སྨོ་ ཡིད་ཀ་ཨའི། 7རོ་ཀི་གསུངས་མ་ཆོ་ཝ་ སོ་ངོ་ག་ཟ་ཤོ་ སྡིག་ཅན་སོ་ངོ་བ་ཀ་ ག་དང་ག་སྤྲོད་ཉི་ ཁྲིམས་ཤིང་ག་ཇཱན༌མེ། ཉི་ནོང་སམ་ག་ཚི་ངེ་ ཝུ་ལེ་ན་དག༌ཉི།
8ཉི་རོག་ཏེ་བ་ཀི་ ཡི་ཤུ་གི་གསུངས་ཁཱན་བ་ ཡིད་ཀ་ཨ་ཉི་ 9ཉི་དུར་གེ་ལོག་ཐཱན་ རོག་ཏེ་བ་ཀི་ སོང་ཐུར་དང་ ཨོམ་ཐུར་བ་ཀ་ ཨོ་ཐ་ཀོར་གེ་ ཡེག་པ༌ལ། 10ཉི་ཨོ་ཐ་ཀོར་གེ་ སྐུ་ཚབ་བ་ཀ་ཡེག་ཁཱན་ མག་ད་ལི་ནི་དག་ཁཱན་ མ་རི་ཡམ་དང་ ཡོ་ཨན་ན་ ཉི་ཡ་ཀུབ་ག་ཨ་མ་ མ་རི་ཡམ་དང་ རོག་ཏེ་བ་ཀབ་ཉི་ཆོ་ཁཱན་ བཱརའ་མེ་ཝག་ཙ་བ་ གི་ཝ་ཆོ་ཝ༌ལ། 11དག་པ་ཀབ་ཉི་ རོག་ཏེ་བ་ཀི་ ཨོ་ཐ་ཆཱས་ དེན་ཐ་མ་ཁཱན་ གཏམ་ད་བུ་ཐོང་ཉི་ ལོ་མ་དི་ཝ༌ལ། 12དག་པ་ཀབ་ཉི་ པ་ཏྲུས་ ཐིང་མ་ཐྲེ་ཀེ་རང་ ཇུག་ཉི་རང་ དུར་ག་ཏཱན་ དི་ཝ༌ལ། ནོང་ཐཱན་ ནང་ཀ་གོད་པ་ཀབ་ཉི་ ཁ་ཤ་བ་ལིང་མིན་ཁེན་ཤ་ ཐོང་མ༌ལ། ཉི་ཧང་ཇུང་མ་གི་ལ་སྨོ་ ཨོ་ཉ་ཀོར་གེ་ ངང་ཉི་རང་ རོག་ཕའི་ག་ཏཱན་ དི་ཝ༌ལ༎
ཨིམ་མ་འུས་ག་ལབ་ཀ།
13ཉི་ཨོ་ཉ་ནོང་ཀ་རང་ ཡ་རུ་ཤ་ལེམ་གེ་ ཀི་ལོ་མི་ཊར་ སོང་ཐུར་ཕང་ག་ཆོ་ཁཱན་ དུང་ག་མིང་ ཨིམ་མ་འུས་དག་ས་ག་ཏཱན་ ཡི་ཤུ་ག་སློ་མ་ཉིག་ཙིང་ དིན་ཅ་གི་ཝ༌ལ། 14ཉི་ཨོ་ཐ་བ་ཇུང་ཁཱན་ ཐམས་ཅན་ག་ཀོར་གེ་ ཐུར་གི་ཐུར་ཀབ་ ཆཱས་ཨན་ཅ་གི་ཝ༌ལ། 15རོག་ཉིག་ཙིང་ཏབ་ཐུར་ ཆཱས་ཨ་ཉི་ ཏུན་ཆ་ཨན་ཅ་ཨ་ཉི་ ཡི་ཤུ་ རོག་ཏེན་བུ་ རོག་ཉིག་ཙིང་ག་ ར་ག་ཕེབས་ཉི་ རོག་ཉིག་ཙིང་ཀབ་ཉི་ བྱོན་ཅ་གི་ཝ༌ལ། 16དག་པ་ཀབ་ཉི་ རོག་ཉིག་ཙིང་གི་ རོག་གུམ་མ་ཡེ་ལེ་དེན་གེ་ རོག་ཉིག་ཙིང་ག་མིང་བུག་ཉི་ ཐ་ཝ་ཆོ་ཝ༌ལ།
17ཉི་རོ་ཀི་ རོག་ཉིག་ཙིང་ག་ གསུངས་མ་ལ ན་ཆིང་དང་ཅ་ཨ་ཉི་ ཐུར་གི་ཐུར་ཀབ་ ཆཱས་ཨ་ཁཱན་ ཧང་གི་ལ་ཡ་དག༌ཉི།
ཉི་རོག་ཉིག་ཙིང་ ནོང་མ༌ལ། ཁོ་དང་ཆཱད་པ་ཅ་གི་ཝ༌ལ། 18ཉི་རོག་ཉིག་ཙིང་གེ་ ཀེལེ་ཨོ་པཱས་དག་ཁཱན་གི་ རོ་ཀ་ལན་ཨ་ཉི་ ལེ་ལ་ག་ ཨོ་ཐ་ཅམ་ཀ་ ཇུང་ཁཱན་ཀོར་གེ་ མ་སེ་ཁཱན་ ཡ་རུ་ཤ་ལེམ་ག་ ཨུ་ཁཱན་ཤི་མིན་ ནཱན་ཐུར་ཤ་གི་ལ་སྨོ་དག་ཉི་ ཡེག་པ༌ལ།
19ཉི་རོ་ཀི་ རོག་ཉིག་ཙིང་ག་ ཧང་ཇུང་མ་ཡ་དག་ཉི་ གསུངས་མ༌ལ།
ཉི་རོག་ཉིག་ཙིང་གི་ལན་ཨ་ཉི་ ནཱས་རཱད་ག་ཡི་ཤུ་ག་ཐུང་ཀ་ ཇུང་ཁཱན་ཀོར་གེ་དག་ཉི་ ཡེག་པ༌ལ། རོག་ཤོ་ ལུང་བསྟན་པ་གི་ཝ་ཆོ༌ཝ། དཀོན་མཆོག་དང་ སོ་ངོ་བ་ཀ་གུབ་ཀ་ རོ་ཀི་མཛད་ཁཱན་ཕྱག་ལཱ་དང་ གསུངས་ཁཱན་གསུང་བ་ ཤུགས་སྟོབས་ཆི་ལུ་ཆོ༌ཝ། 20བླ་མ་ཆི་ལུ་དང་ དབང་ཁཱན་བ་ཀི་ རོག་བཀྲོངས་མེ་ག་ཙུག་ཉི་ ཉི་རོག་ ཁྲིམས་ཤིང་ཐུང་ཀ་ཇཱན་ཉི་ བཀྲོངས༌མ། 21དག་པ་ཀབ་ཉི་ ཨ་ཤི་ རེ་ཆ་ཨ་ཝ་ཆོ་ཝ་ ཨིས་རེལ་ག་སོ་ངོ་བ་ ཤོག་ཉི་གནང་ཁཱན་ རོག་གི་ཝ་ཨོ་ཕེ་ལ་དག༌ཉི། གི་ལ་ ཨུ་ཐུ་ཐུར་ཤ་མང་གི་ཝ་ ཨོ་ཐ་བ་ཇུང་ཉི་ ཐི་ནོང་ ནོང་སམ་དི༌ཝ།
22ཙོ་རང་ ཨའི་ཀབ་ཉི་ཆོ་ཁཱན་ མེ་ཝག་ཙ་བ་ཀི་ ཨའི་ཡིད་ཆི་ལེ་ག༌ཝ། ཝུན་བེད་པེ་རང་ རོག་ཏེ་བ་ དུར་ག་ དི་ཝ་ཆོ་ཝ་དང་ 23ཉི་རོ་ཀ་སྐུ་ཕུང་མཱན་ཆི་དང་ ཨུ་ཉུ་མ་ཚཱད་པ་ རོག་ཏེ་བ་ལོག་ཐཱན་ ཞིང་ཁམས་ག་འཐེན་པ་ཉིག་ཙིང་གི་ རོག་ཏེ་བ་ཀ་ མཇལ་ཁ་གནང༌མ། ཉི་རོག་ལོག་ཉི་ སྐུ་བཞེངས་པ་ཨ་ཉི་ གསུངས་ཆོ་ཝ་དག་ཉི་ ཡེག་ཆོ༌ཝ། 24ཨའི་ཀབ་ཉི་ཆོ་ཁཱན་ ཚེ་བང་ དུར་ག་དི་ཉི་ གོད་པ་ཀབ་ཉི་ མེ་ཝག་ཙ་བ་ཀི་ ཡེག་པ་པུརུས་ཀིན་ཨ་ཉི་རང་ ཆོ་ཝ་དང་། དག་པ་ཀབ་ཉི་ རོག་ཤོ་ མ་མཇལ་ཤི་དང་དག་ཉི་ ཡེག་པ༌ལ།
25ཉི་ཡི་ཤུ་གི་ རོག་ཉིག་ཙིང་ག་ གསུངས་མ་ལ དབའི་ ཡོང་བ་བ་ ལུང་བསྟན་པ་བ་ཀི་ཡེག་ཁཱན་ ཐམས་ཅན་ག་ ལོ་དི་ལེ་ག་ ཧབ་ཏུར་རང་གོར་ཅ་ཡ། 26ཧང་ ཁིརིས་ རོ་ཀ་གཟི་བརྗིད་ག་ ནུ་ཕེ་དེན་གེ་ ཨོ་ཐ་བ་ དཀའ་ཝ་ཅཱད་པེ་ཁེ་ཝ་ག་ ཁག་ཆི་ལུ་མཱན་ཆི་སྨོ་དག༌ཉི། 27ཉི་ཡི་ཤུ་གི་ རོག་ཏེ་བ་ཀ་ མོ་ས་གེ་ཨ་ཉི་གོ་ཙུག་ཉི་ ལུང་བསྟན་པ་ ཐམས་ཅན་ག་ དཔེ་ཆ་དང་ རོ་ཀ་ཀོར་གེ་ཤོ་ཁཱན་ གསུང་རབ་ ཐམས་ཅན་ག་ དེན་ཐ་ཁྲེ་ཉི་གནང་མ༌ལ།
28ཉི་རོག་ཉིག་ཙིང་དི་ཁཱན་ དུང་ར་ག་ ཏེམ་ཅ་གི་ཝ༌ལ། ཉི་རོ་ཀི་ རོག་མ་ནོང་མཱན་རང་ བྱོན་མ་ཅོད་པ༌ལ། 29དག་པ་ཀབ་ཉི་ རོག་ཉིག་ཙིང་གི་ རོག་ཁག་ཉི་ཡེག་པ་ལ་ ཨའི་ཀབ་ཉི་བཞུགས༌ཅོ། ཨོམ་མིང་མེར་ཉི་ བི་ནང་རི་ལེ་ཅམ་ལ་དག༌ཉི། ཉི་རོག་ རོག་ཉིག་ཙིང་ཀབ་ཉི་ བཞུགས་པེ་ག་ ནང་ཀ་བྱོན་མ༌ལ། 30ཉི་རོག་ཚོགས་བཞེས་ལེ་དེན་གེ་ རོག་ཉིག་ཙིང་ཀབ་ཉི་ བཞུགས་པེ་གང་ཀ་ ཀེབ་ཏང་དུང་ཐཱན་ བྱིན་རླབས་ཞུ་ཉི་བོང་ཐཱན་ རོག་ཉིག་ཙིང་ག་གནང་མ༌ལ། 31ཉི་རོག་ཉིག་ཙིང་ག་ མིང་ཆོག་ཉི་ རོག་ཉིག་ཙིང་གི་ རོག་གུམ་ཡེ་ཝ༌ལ། ཉི་གེ་ རོག་ རོག་ཉིག་ཙིང་ག་མིང་གེ་ ཡེ་ཉི་ཇོང་མ༌ལ།
32རོག་ཉིག་ཙིང་ ཐུར་གི་ཐུར་ག་ཡེག་པ་ལ་ ལབ་ཀ་ རོ་ཀི་ ཨ་ཆིང་ཀབ་ཉི་ གསུང་གྲོས་མཛད་ཉི་ ཨ་ཧ་ཏཱན་ གསུང་རབ་ག་དེན་ཐ་ཁྲེ་ཉི་ གསུངས་མེ་གང་ཀ་ ཨ་ཆིང་སེམས་ནང་ཀེ་ཨ་ཉི་རང་ ཤོ་ནང་མ་ཕེན་ཤི་སྨོ་དག༌ཉི། 33ཉི་ཨོ་ཉ་ཐྲེ་ཀེ་རང་ རོག་ཉིག་ཙིང་ཐིང་ཐཱན་ ཡ་རུ་ཤ་ལེམ་ག་ཏཱན་དི་ཉི་ སྐུ་ཚབ་སོང་ཐུར་དང་ རོག་ཏེ་བ་ཀབ་ཉི་ཆོ་ཁཱན་ བཱརའ་བ་བུ་ཏབ་ཐུར་ཛོམ་ཉི་ ཆོ་ཝ་ག་ཐོང་མ༌ལ། 34རོག་ཉིག་ཙིང་གི་ ཡེག་པ་ལ་ གཙོ་བོ་བཞེངས་པ་ ཏེན་ཏེན་རང་གི་ཝ༌ལ། རོ་ཀི་སི་མོན་ག་བུ་ མཇལ་ཁ་གནང་མ་ལ་དག༌ཉི། 35ཉི་རོག་ཉིག་ཙིང་གི་ ལབ་ཀ་ ཧང་ཇུང་མ་གི་ལ་སྨོ་ ཉི་ཡི་ཤུ་གི་ ཀེབ་ཏང་བོང་མ་ཀབ་ཉི་ རོག་ཉིག་ཙིང་གི་ རོག་ ཧང་ཏེན་ གུམ་ཡེ་ལེ་རེ་བ་གི་ལ་སྨོ་ ཨོ་ཉ་ཀོར་གེ་ རོག་ཏེ་བ་ཀ་ ཡེག་པ༌ལ༎
ཡི་ཤུ་གི་ སློ་མ་བ་ཀ་ མཇལ་ཁ་གནང་མ༌ལ།
36ཉི་རོག་ཉིག་ཙིང་གི་ ཨུ་ཐུ་ཡེག་ཅ་ཨ་ཉི་ ཡིད་ཀ་རྣམ་ཏོག་མ་ཝ་ ཡི་ཤུ་ རོག་ཏེན་བྱོན་ཉི་ རོག་ཏེ་བ་ཀ་པོང་ཀ་ཐིང་ཉི་ བཞེངས་ཐཱན་ གསུངས་མ་ལ་ ན་ཧ་བ་ སྐྱིད་པུ་ཉོང་ཅེན་དག༌ཉི། 37དག་པ་ཀབ་ཉི་ རོག་ཏེ་བ་ཀི་ དོན་ཐོང་མ་ད་བུ་ཐོང་ཉི་ གནམ་མེད་ས་མེད་ ཡོང་ཁེ་ཝ༌ལ།
38ཉི་རོ་ཀི་ རོག་ཏེ་བ་ཀ་ གསུངས་མ་ལ་ ན་ཧ་བ་ ཧང་ཨ་ཉི་ ཡོང་ཁེན་ཅ་ཡ། ན་ཧ་སེམས་ཀ་ ཧང་ཨ་ཉི་ དོགས་པ་སག་ཅ་ཡ། 39ཇ་ག་བི་དང་ ག་དང་ག་ གོད་ཅོ༌ལེ། ཇང་གི་ལ་ ཇང་ཐོབ་ཐཱན་གོད༌ཅོ། ཉི་ཇ་ག་ཆོ་ཝ་པུརུས་ཀིན་ཨ་ཉི་ དོན་ག་ཤོ་ ཤ་དང་ཁང་མང་ཕ་དག༌ཉི།
40ཉི་ཨོ་ཐ་བ་གསུངས་ཐཱན་ རོ་ཀི་ རོ་ཀ་ཞབས་དང་ཕྱག་ གེན་ཉི་གནང་མ༌ལ།
41ཨོ་ཉེ་རང་གི་ནེ་བུ་ རོག་ཏེ་བ་ ཡིད་ཆི་ཉི་ ཤོ་ནང་ཕེ་ཝ་ཨ་དེན་གེ་ དད་པ་ཨ་ལེ་ མར་བ༌ལ། ཉི་རོ་ཀི་ རོག་ཏེ་བ་ཀ་ གསུངས་མ་ལ་ ན་ཧ་ཐ་ ཧང་ཐུར་ཟ་ལེ་ག་ ཅ་སྨོ་དག༌ཉི། 42ཉི་རོག་ཏེ་བ་ཀི་ རོ་ཀ་ ང་གོག་པ་ཨ་ཝ་ཐུར་ཕུལ་ཉི་ 43ཉི་རོ་ཀི་བསྣམས་ཐཱན་ རོག་ཏེ་བ་ཀ་གུབ་ཀ་རང་ བཞེས་ཝ༌ལ།
44ཉི་ཤ་ རོ་ཀི་ རོག་ཏེ་བ་ཀ་ གསུངས་མ་ལ་ ཨོ་ཐ་བ་ཤོ་ ཇང་ ན་ཧ་བ་ཀབ་ཉི་རང་ ཆོ་ལེ་གང་ཀ་ ཇི་གི་ ན་ཧ་ཡེག་ཁཱན་ ཆཱས་བ་གི༌ལ། ཇ་ག་ཀོར་གེ་ མོ་ས་ག་བཀའ་ཁྲིམས་དང་ ལུང་བསྟན་པ་བ་ཀི་ འབྲི་ཁཱན་དཔེ་ཆ་བ་ ཉི་མགུར་མ་ག་ དཔེ་ཆ་ནང་ཀེ་ཤོ་ཁཱན་ ཐམས་ཅན་རང་ དེན་ཐ་འགྲུབ་ཕེ་ཁེ་ལེ་དག༌ཉི།
45ཉི་གསུང་རབ་ ཧ་གོ་ལེ་རེ་བེ་དེན་གེ་ རོ་ཀི་ རོག་ཏེ་བ་ཀ་ སེམས་ཆོག་ཉི་གནང་ཐཱན་ 46རོ་ཀི་ རོག་ཏེ་བ་ཀ་ གསུངས་མ་ལ་ ཁིརིས་ཤོ་ དཀའ་ཝ་ཅཱད་པེ་ཁེ༌ལེ། ཉི་ནོང་སམ་ག་ནོང་ཀ་ ཤི་ཝ་གེ་ལོག་ཉི་ ཝུ་ལེ་དག་ཉི་ གསུང་རབ་ནང་ཀ་འབྲི་བ༌ཅ། 47ཉི་ཡ་རུ་ཤ་ལེམ་གེ་ གོ་ཙུག་ཉི་ མི་རིགས་ ཐམས་ཅན་རང་ ཆ་པ་ཨ་ཉི་ དཀོན་མཆོག་གི་ སོ་ངོ་བ་ཀ་སྡིག་པ་ བཀའ་དྲིན་བསྐྱང་མེ་དེན་གེ་ སྡིག་པ་གེ་ ལོག་པེ་ཁེ་ཝ་ཀོར་གེ་ ཇ་ག་མིང་ག་བཤད༌པེ། 48ཉི་ན་ཧ་བ་ཤོ་ ཨོ་ཐ་ག་འཛོམས་དཔང་གི༌ལ། 49ཉི་གོད་ཅོ་ ཇི་གི་ ཇ་ག་ཨ་པ་གི་ དབུ་མནའ་བཞེས་ཉི་གནང་ཁཱན་ཁེ་པ་ ན་ཧ་ཐུང་ཀ་ཀུན་ཏི༌ལེ། དག་པ་ཀབ་ཉི་ ཐོ་ལ་གེ་ ན་ཧ་བ་ དབང་གི་མ་བུག་པ་སག་པུ་ ཐ་ཁྲོམ་ཆེན་ག་རང་ ཆོའི་ན་དག༌ཉི༎
ཡི་ཤུ་ལོག་ཉི་ ཞིང་ཁམས་ག་བསྣམས་པ༌ལ།
50ཉི་རོག་ཏེ་བ་ བེ་ཐ་ནི་ཡ་དག་ས་ག་སག་པུ་ བསྣམས་ཐཱན་ རོ་ཀ་ཕྱག་ག་དུང་ཉི་ རོག་ཏེ་བ་ཀ་ བྱིན་རླབས་གནང་མ༌ལ། 51རོ་ཀི་ རོག་ཏེ་བ་ཀ་ བྱིན་རླབས་གནང་ཅ་ཨ་ཉི་ རོག་ རོག་ཏེ་བ་ཀ་པོང་ཀེ་ བེརེ་ཉི་ ཞིང་ཁམས་ག་ཏཱན་ བསྣམས་པ༌ལ། 52ཉི་རོག་ཏེ་བ་ཀི་ རོ་ཀ་མགུར་མ་ཞུན་ཐཱན་ གནམ་མེད་ས་མེད་ ཤོ་ནང་ཕེ་ཉི་རང་ ཡ་རུ་ཤ་ལེམ་ག་ཏཱན་ ལོག་པ༌ལ། 53ཉི་རོག་ཏེ་བ་ དཀོན་མཆོག་ག་ བཀའ་དྲིན་བསམ་ཉི་ མཆོད་ཁང་ག་རང་ བཞུགས་པ༌ལ༎
Dewis Presennol:
ལུ་ཀ། 24: TNTB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Tshangla New Testament
© 2023, The Bible Society of India
all rights reserved