Be Mochi 3
3
Bitru matswa engǝfǝfù ya mò ebgom
1Nò kè akan, Bitru ngge Yohana è nyaken a Àtá mo Ehwya adi engga a be nobǝ è fǝn bwi anga adi ebgo ebgom ángá, atan enò è no abu tse ta mo ekakennò, a nò è hwya ara ángá. 2A zǝn akan mo be tafǝmo mo Àtá mo Ehwya hon, a bè fǝ́ anga Tafǝmo Esese endà ángá, bè tso nobǝ akan a bè mbwa tén ye ya engǝfǝfù ángá, bwa chu bwi anga a zǝn. Bè ti ye chu bwi anga a zǝn nogwa nogwa, evǝa ge e bgó mò a zǝn be ya è bwa kwashi bwi anga a Àtá mo Ehwya hon ángá. 3Atan a gè di Bitru ngge Yohana è bwa kwa nyashi ángá, gè bgó be jan be e no ye tse. 4Bitru ngge Yohana è di ye nè nggwa ye fǝzǝn a ju. Kǝnggwa è Bitru jan, “Di je.” 5Enona, nobǝ hon è twanga no dise be anga nè no ka anga jan ba no ye mò.
6Ekǝnggwa Bitru è jan, “Adi ḿ mo tse, m fwa m ngge ge ra. Tea mò a m no ngge ge ángá, ma no o. Adi ti mo Yeso Kristi ya a Nazarati, nyi etkyen, we kenkèn.” 7Gè fu nobǝ hon chá budgo nè vǝ nó etkyen. Kè akan be kpwafu ngge be kefu mo nobǝ hon è twanga cha gu re kpo. 8Gè fǝ etkyen ywa ngge kpwafu mbwe nè kwa ara kèn ekenm. Kǝnggwa gè kwashi ngge Bitru ngge Yohana a tswa chuukwa mo Àtá mo Ehwya hon, nè no kenkèn anga ngge efǝ efǝm tangge Ehwya etànm. 9Atan a binbin mo be nobǝ ya è fǝnno a zǝn è di ye gè no kenkèn nè fo ye gè no tàn Ehwya anga, 10bè diyi ara jan ga engǝfǝfù, ya mò ebgom éè chuno bgó bwi mò anga chá tafǝmo mo Àtá mo Ehwya hon a be fǝ́ anga Tafǝmo Esese endà. Bè tàn ebwikpe a chu mò ezǝzǝju éè bwe ngge ge ángá.
Bitru è du edgon a afku mo Sulemano
11Abu nobǝ hon a bè matswa è no ba Bitru ngge Yohana finfin anga, be nobǝ embo è tàn ebwikpe nè tse fǝton bwa a zǝn be, a zǝn a bè fǝ́ anga a Afku mo Sulemano. 12Atan a Bitru è di be ángá, gè jan be nobǝ hon fwa jan, “A nye, be ya a Esǝrela, ano bwe a ge mò ena du nye tàn ebwikpe? Ano bwe a ge nye nggwa je fǝzǝn no a ju abu je bwe ende ena kenkèn ngge echakpo mo je eno e ra adi mò esese a je bwe, du nobǝ ena kenkèn anga? 13A Ehwya mo Ebrayi, Eshaku ngge Yakubu, Ehwya mo be ebǝ ata mo je binbin bwegǝ̀n ara fí mbwe Yeso adi mò e bwe na. Nyè tsǝ du ye evǝa be e gu ye, nyè segwa ye chafya mo Bilatu, bi adia Bilatu è dgyan anga ge e twa e gwa ye ángá. 14Nyè segwa Echanwenwen ngge Ebitete Akan hon, nyè jan be e fken e gwa e no nye ya nobǝ egum. 15Nyè gu ende e no be nobǝ nya anga, tea Ehwya ti ye nyi etkyen a dì. A je ja be eyifwa mo be mò ena. 16Adi efka mo chaebi, a chu Yeso, nobǝ ena a nye di ngge nye yi ángá, ben ara echafǝju. A ti mo Yeso ngge chaebi e bwa anga adi efka mbwe ángá, a nobǝ ena ben gu ara ematswam abu binbin mo nye di anga na.
17“Asuswana be nwenjwa m ya, m yi jan a nye ngge be nwenfi mo nye, nye bwe nye Yeso mò hon ena adi eyim mo nye ra. 18Ehwya è jan ara ekpe ekpe chá kpevǝ mo binbin mo be efojan jan, Kristi (Etsǝpepe mbwe) a ngǝ ekan mo be mò hon ena. 19No enona, nye e twa etwa, nye e twabǝ e bwa a zǝn Ehwya evǝa be e gwa e no nye be ebgen mo nye. 20Evǝa Ehwya e chu ye a no nye efwa mo nya etkem, adi etsonm mo Kristi hon, nwene a gè swa nyi ara ekwafya jan na no ende e ti a vǝ́ nye ángá. 21Ge no kenm ga no a kpwà a kpe ti ken a ngga atan a Ehwya a bwe be mò binbin twanga a no abu bè no ekwafya, abu ge jan ekpe ekpe chá kpevǝ mo be efojan echanwenwen mbwe ángá. 22Adia Mosa è jan ara, ‘Etsodwe mo nye Ehwya hon, a swa a vǝ́ efojan akan abu me a engga mo ya mu nye. Ge no kenm nye e buton e fo e gu mò a ge jan nye ángá. 23Egwa egwa e buton fo ye efojan hon ra, ba nyo ye a vǝ́ a je a engga mo be nobǝ mo Ehwya na gu ye.’
24“Eshwen, tke a chu efojan Samela bwa a chu be efojan ya è bwa chashin mbwe ángá, binbin mo be è fijan ara fwa a chu be tsǝnò ena. 25A nye nya be edefǝ́n mo be efojan hon, ngge vǝ-esenm a Ehwya è sen ngge be ebǝ ata mo nye ekpe ekpe ángá. Adia gè jan Ebrayi jan, ‘Adi efka mo ebi mbo, binbin mo be nobǝ a zǝnchaje a ben esese.’ 26Atan a Ehwya è ti fí mbwe Yeso nyi ara etkyen a dì ángá, gè kwafya tson ye ken a zǝn nye be ya a Esǝrela evǝa ge e bwe nye esese ngge ge e du egwa egwa mo nye ge e twa e gwa be mofǝ̀ mbwe.”
Dewis Presennol:
Be Mochi 3: ICH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2024 Luke Initiative for Scripture Translation