Luka 17
17
Be mò e du be nobǝ bwe ebgen anga
(Matiyu 18:6-7,21-22; Marku 9:42)
1Yeso è jan be ya è ba ye anga jan, “Be mò a du nobǝ a tswa fù ángá a bwa a tén ebwam, tea ga no mò ebwe a chu mo ende nwene a vǝ fù etswam hon a bwa ángá. 2Gè twa a fǝ̀ ye a ge, bà a ti hwya mò e kpwam ti e ndi adi dgomo, ti e hwya e fu ye shwa, ti e twa e shi a tswa kǝn, chàshín nwone a gà a du akan mo be mbǝgyashan ena be e bwe ebgen. 3Nye e bgeshi fǝzǝn.
“Ano nwenjin o bwe o edan, we vǝ ye tón. Ano ge jan a vǝ mbwe jan ge dan ara, we gwa e no ye. 4Ano ge bwe o edan kè chwen a fà adi tsǝnò akan, ge twanga bwa a zǝn o kè chwen a fà, n bgó jan, ‘M dan ara o’, ge no kenm, we gwa e no ye.”
Túbi je chaebi
5Be etsonchi mo Yeso è jan ye jan, “Etsodwe, bwe chaebi mo je ge e no echakpokpo.”
6Yeso è jan be, “Ano chaebi mo nye no nwofyan abu fwento musta, nya jan a ti tumo ekeke ena, ‘Vǝ kpu chu o, ken shin a tswa sǝn.’ Ga bwe abu nye jan ángá.”
Ja be ya mochi kpwà ara
7Yeso è tú bishi be mò jan, “Be è jan, akan a engga mo nye no ngge nwen mochi e dgon ye efyomo anga eno e ra, ge bwe ye mochi anga. Ara a engga mo nye, a nwen mochi mbwe vǝ a kpèn twabǝ bwa ara a mu ángá, ga jan nó kè akan, ‘Bwa chu a sen we de mode?’ 8Chú ga jan ye nó jan, ‘Bwe m mode, nggwa mokàn a ju o, no m mode hon, nobà m, atan m de ngge m ngǝ fwa ara sangǝ́, we chà e de we ngǝ ra?’ 9Yagwamo mu hon a chwa a no nwen mochi mbwe hon adia ge bwe ara mò a be jan ye ángá? É yé. 10Eni abu ge no ngge nye ángá gaten. Atan a nye bwe gu ara mò a Ehwya jan nye e bwe ángá nye e jan, ‘Ja mbǝgya mochi è kǝn be ra, je bwe ara mochi e no ara je e bwe ángá, kpwà ara.’ ”
Yeso è matswa ya modwa-ehwyá gwi
11Abu Yeso è nyaken a Urishelima, gè kengga a zǝn fǝte mo Galili ngge Samariya. 12Abu gè kwa nyashi a eten nwofyan akan, be ndedon ya modwa-ehwyá gwi è di ye. Bè bwa ywano adgya, 13nè tandwa jan, “Yeso, Yagwamo mu, di ashi mo je.”
14Atan a Yeso è di be ángá, gè jan, “Ken, nye e tú chu nye a zǝn be ekǝ́n mo Ehwya.” Abu bè nyaken efǝ ángá, bè di jan modwa-ehwyá hon è gwa ara be.
15Akan a engga mo be, abu gè di modwa hon gwa ara ye ángá, gè twabǝ bwa a zǝn Yeso, nè tandwa jan, “Be e tàn Ehwya.” 16Gè bwa nggwa ekpanvǝ mbwe chafya mo Yeso nè chwano ye a chu mò a gè bwe ye ángá. Ende hon ena, è no ya a Samariya.
17Ekǝnggwa Yeso è ká be ya è no a zǝn ángá eka jan, “Fwa ye nobǝ gwi a ḿ matswa ana ra? Be chwen a ndwe e dan ángá, no a che? 18Ben di ye nobǝ akan a engga mo be e bwa evǝa ge e no Ehwya egǝ̀n ra, kpwà shi kpenmo ena?” 19Yeso è jan nobǝ a Samariya hon jan, “Nyi etkyen, we nya kèn mbo. Chaebi mbo mastwa ara o.”
Ebwam mo zenoti mo Ehwya
(Matiyu 24:23-28,37-41)
20Nò kè akan, be Farisi ya ehwyà è ká Yeso eka jan ne, a ndwe-engǝ, a zǝnotì mo Ehwya a bwa?
Yeso è janfwe be jan, “Zǝnotì mo Ehwya fwa ye mò a nya di ngge fǝzǝn ángá ra, 21efki ra, be nobǝ a jan, ‘Di, ge ena, eno e ra, di ge e nokǝ̀n ra,’ adia zǝnotì mo Ehwya hon no a tswa engga mo nye.”
22Kǝnggwa, Yeso è jan be ya è ba ye anga jan, “Ekpengga nyabwa, atan a nya nda nye e di nò akan a tswa mo be tsǝnò mo Nwen Nobǝ, tea nya a di nye nó ra. 23Be nobǝ a jan nye, ‘Nwen Nobǝ hon e nokǝ̀n, eno e ra, a ge e no na.’ Nye e ken nye ra, nye e tse e ba nye be ra. 24Adia ebwam mo Nwen Nobǝ hon a no abu enggasansan e mbǝgezǝ, n ngga zǝn anga a zǝkpe, tke a ekǝn-etkyen chá akan ti ken chá akan anga. 25Tea ge no ara kenm, ge kwafya a ngǝ ekan mo be mò embo, be nobǝ e no asuswana ángá a se a gwa ye.
26“Abu gè no adi ekpengga mo Nuhu ángá, ga no enó adi ekpengga a Nwen Nobǝ a twabǝ a bwa ángá. 27Adi be tsǝnò eni, be nobǝ è no de anga nè no ngǝ anga, bè no fǝ́ ndegwa, nè no du ndegwa don anga, ti bwangga atan a Nuhu è kwashi a tswa ngga ekeke ángá. Kǝnggwa, embobin è bwa tkò gu be.
28“Gè té mò akan abu ekpengga mo Lotu. Be nobǝ è no de anga nè no ngǝ anga bè no jwa anga nè no jwade anga. Bè no tswa mowa anga, nè no mbwe be àtá anga. 29Tea nò a Lotu è gwa eten Sodoma ángá, fǝ̀ ngge be ten-fǝ̀ efkenfken è nggwashwa chá kpe nè tkò gu be.
30“Ga no enò gaten, Nò nwone a be fi Nwen Nobǝ hon tú ara be nobǝ ángá. 31Nò eni, ende e no a chu àtá ge e shwa ye a sen evǝa ge e kpu be atkimo mbwe ra. Enò gaten, ende e no a kpèn ge e twabǝ e bwa ye a mu evǝa ge e ti mò akan ra. 32Kaben mò è ben gwa Lotu ángá. 33Ende e dgyan ge e dgon nya mbwe a ben ye nó ra, ende e no ara nya mbwe, a ben nó. 34M jan nye, etsǝ nò eni, nobǝ fà a dwa a no adi zǝndwa akan, ba ti akan, ba gwa akan. 35Be ndegwa fà, no a kpwa mò anga a hwya a zǝn akan, ba ti akan, ba gwa akan.”
[ 36Nobǝ fà no a bwe mochi anga eso a kpèn, ba ti akan, ba gwa akan.]
37Be ya è ba ye anga è ká ye eka jan, “Etsodwe, mò hon a bwe a che?”
Yeso è janfwe be jan, “Zǝn a kǝnmò no anga, be endo fǝn anga a zǝn.”
Dewis Presennol:
Luka 17: ICH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2024 Luke Initiative for Scripture Translation