Genesi 7
7
Nowa nemhuri yake vanopinda muareka
1Zvino Jehovha akati kuna Nowa, “Pindai muareka, iwe nemhuri yako yose; nokuti ndakuona iwe kuti wakarurama pamberi pangu parudzi urwu. 2Pamhuka dzose dzakanaka utore nomwe nomwe, mukono nehadzi yayo; napamhuka dzose dzisina kunaka utore mbiri mbiri, mukono nehadzi yayo; 3napashiri dzedenga utore nomwe nomwe, jongwe nemhambo, kuti uraramise marudzi ose ari panyika. 4Nokuti kwasara mazuva manomwe, ipapo ndichanaisa mvura panyika mazuva ana makumi mana nousiku huna makumi mana; zvipenyu zvose zvandakaita ndichazviparadza panyika.” 5Nowa akaita zvose sezvaakarairwa naJehovha.
6Nowa wakanga ava namakore ana mazana matanhatu panguva yokuuya kwemvura zhinji panyika. 7Ipapo Nowa wakapinda muareka, navanakomana vake, nomukadzi wake, navakadzi vevanakomana vake, nokuda kwemvura zhinji. 8Pamhuka dzakanaka, napamhuka dzisina kunaka, neshiri, nezvose zvinokambaira panyika, 9zvakapinda kuna Nowa muareka zviviri zviviri, mukono nehadzi, Mwari sezvaakaraira Nowa. 10Mazuva manomwe akati apfuura, mvura zhinji ikavapo panyika.
11Pagore ramazana matanhatu roupenyu hwaNowa, nomwedzi wechipiri, nezuva regumi namanomwe romwedzi, nezuva iroro matsime ose apakadzika–dzika akadziurwa, namahwindo edenga akazarurwa; 12mvura zhinji ikanaya panyika mazuva ana makumi mana nousiku huna makumi mana. 13Nomusi iwoyo Nowa wakapinda muareka, naShemu, naHamu, naJafeti, vanakomana vaNowa, nomukadzi waNowa, navakadzi vatatu vavanakomana vake pamwechete naye; 14ivo, nemhuka dzose namarudzi adzo, nezvipfuwo zvose namarudzi azvo, nezvinokambaira zvose zvinokambaira panyika namarudzi azvo, nezvinobhururuka zvose namarudzi azvo, neshiri dzose dzamarudzi ose. 15Zvakapinda kuna Nowa muareka, zviviri zviviri zvezvipenyu zvose zvinomweya woupenyu. 16Zvose, zvakapinda, zvakapinda zvichiita mukono nehadzi, zvose zvipenyu, sezvaakarairwa naMwari, Jehovha akamuzaririra mukati.
17Mvura zhinji ikavapo panyika mazuva ana makumi mana; mvura ikawanda, ikasimudza areka, ikakwiridzirwa pamusoro penyika. 18Mvura ikakwirira, ikawanda kwazvo panyika, areka ikafamba pamusoro pemvura. 19Mvura ikakwirira kwazvo kwazvo panyika, makomo marefu ose pasi pedenga rose akafukidzwa. 20Mvura ikakwirira kusvikira pamakubhiti ane gumi namashanu pamusoro pawo; makomo akafukidzwa. 21Zvipenyu zvose zvaifamba panyika zvikafa, zvaiti, shiri, nezvipfuwo, nemhuka, nezvinokambaira, zvose zvaikambaira panyika, navanhu vose; 22zvinhu zvose zvakanga zviine kufema kwomweya woupenyu mumhino dzazvo, zvose zvakanga zviri pakaoma pasi, zvikafa. 23Zvipenyu zvose, zvakanga zviri pasi pose, zvikaparadzwa, zvaiti, vanhu, nezvipfuwo, nezvinokambaira, neshiri dzedenga; zvikaparadzwa panyika; Nowa oga akasara, nezvakanga zviri muareka naye. 24Mvura ikaramba yakakwirira panyika mazuva ane zana namakumi mashanu.
Dewis Presennol:
Genesi 7: SUB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Shona Union Bible © Bible Society of Zimbabwe, 2002.