Jon 11
11
Mete nan Lasaros
1Aji, han ah Lasaros tedok Betane, bi teras. Betane nong ba te vinnan Meri nuru kisan ah Mata. 2Tei Meri nanong niah te lehvi wokon nondo Subu Jisas bi mwe sabahka i ilin. Tei hojin naah Lasaros niah tei teras. 3Meri nuru Mata ramrusro vehuran ban ben Jisas ramru bep nuhu, “Subu, walun nom mweran ba mwe ras.” 4Entorah Jisas terong vepnan bep nuhu, “Lasaros man ba mat nga i rasan nong ba man leli ba tarutni ran haphawi God. Bi man leli ba ran haphawi nana niah nambi Nujun God.”
5Jisas temwegololo i Mata bi kisan ah Meri, bi Lasaros. 6Entorah terongo vepnan nuhu Lasaros teras bi mwidi si dobo ut ah tedi iginan ren karu. 7Bep mini non tarutni nuhu, “Tamul bamul Judia.” 8Non tarutni ra balu ini ra bep nuhu, “Sesesrakan, te gamrai ni nge nawih ba Jiusni rat vep nuhu rama weha kik iginan, bi ko bep nuhu tema mul mwetak iginan?” 9Jisas bep nuhu, “Vatkun to tesanwul vepnan karu le ren bwaleh, bi entorah aji mu hural ut teren ba teba ditkani, nga, u gonani mu hural le maban metakal. 10Ba tigoah bat hural bung ba bat titkani u gonani hee tebulong lelen.” 11Jisas te vep tedapmak nong bi mumu bep nuhu, “Walun nondo mweran ah Lasaros ba mamju ba ban bi nam bamta bamula.” 12Non tarutni ra balu ini ra bep nuhu, “Tigoah man nemju nge, Subu, ba man gabis nge.” 13Tei meramnan dalen Jisas nong ba Lasaros tei temat, ba non tarutni rat gam bihni nuhu, mamju gololo nge. 14Jisas bep gololo mini ni nuhu, “Lasaros ba temat. 15Ba rongnan nokok mwegabis u gonani nat badi tenga ben ba man nei kabis nami nanong gonani kan bihni mwetaknga nak. Taban ne gita.” 16Tomas niah rat tehu i Mwelap bep mini datngin ni nuhu, “Taban jukun metan go tan mat serange mini!”
Jisas bibi mas bamulan bi masan
17Entorah Jisas te wupngak ba morongo goah ren kavet te tevan goro goah rat tipmi Lasaros. 18Betane mini ut Jerusalem ba sasari nuhu tei mael karu. 19Jiusni hal kawu lengleng rat van nendi ben Mata nuru Meri nuhu van matnan hojiru niah Lasaros.
20Entorah Mata terongo vepnan nuhu Jisas tepma bi mu dumre ban gorokoro. Meri te sadok nge dobo le imaru. 21Mata bep mini Jisas nuhu, “Tigoah ko bat ti nge dokah, Subu, ba hojik bat ba mat nga! 22Ba nam maililngi goah nanong ba God man neskani apma mini kik niah kon uhleli dini.” 23Jisas bep mini nuhu, “Hojimuru man mas bamul dini mete vale masan.” 24Mata balu ini bep nuhu, “Nam mililngi nuhu man dumre bamul vale masan le nok nan ren entorah mete ni ran dumre bamul.” 25Jisas bep mini nuhu, “Nana, nambi tumre bamulan bi nambi masan, aji ah man bihni mwetaknga nak ba man mas i masradaan, masen ah man mat. 26Bi aji ah modok bi bihni mwetaknga nak ba man badi tenga nemate. Ko bihni mwetaknga nan?” 27Mata balu ini bep nuhu, “Iao, Subu, nam bihni mwetaknga nam, nuhu kobi Kraes, bi kobi Nujun God, bi kot sipma li uruu.”
Jisas tedeng
28Limalen goah Mata te vep vehuran nong bi ban mahu kisan i suran, bi bep mini nuhu, “Sesesrakan mwi dite dokah bi mu uhleli kik.” 29Entorah Meri te rongo vehuran nong bi mu dumre bi mo rop ban grokoro. 30Jisas tei tebado van nga li vini ba tedi rada ngama ut ah Mata te wutdihi iginan. 31Jiusni ah rati le iman Meri van matnan Lasaros rat kita goah te dumre bi ban. Ram dahkuru u gonani rat gam bihni nuhu ba van nesadok nedengte li kabwejin Lasaros.
32Entorah Meri tewupnak ben Jisas ut ah tedi iginan bi maiah vale wokon Jisas bi bep mini nuhu, “Subu, tigoah ko bat ti nge dokah nong, ba hojik bat ba mat nga.” 33Entorah Jisas te kita goah Meri bi Jiusni rat teng bi rongnan noko tekapma. Ba non vihnian temres pon ini. 34Mu uhleli i ni nuhu, “Kat titmi ibeh?” Ba ra balu ini ra bep nuhu, “Kopma ne gita, Subu.” 35Jisas tedeng. 36Jiusni ra bep nuhu, “Karu gita goah te mwegololo tokol i enang ahe.” 37Datngin Jiusni ra bep nuhu, “Te sangvi metan matbi ni, bat ba vamwesa Lasaros nga ahe dini mete?”
Lasaros temas bamul dini mete
38Bwaren Lasaros tedok nokon Jisas, bi ban ut ah rat tipmi iginan wan murun niah tei bwarang ut ah rat wesani vet goro wan katvin. 39Jisas bep minini nuhu, “Karu li vet baing.” Mata niah hojin Lasaros bep nuhu, “Bunun modokte nanong, Subu, gonani ren kavet te ban goro goah kam mat tipmi.” 40Jisasbep mini nuhu, “Ko bat kita meresan non God. Komaluni goah nat vep nuhu tigoah ko bat vihni mwetaknga.” 41Ram mali vet baing. Jisas mwi git vamere bi bep nuhu, “Nam bavatla kik, Tadat, gonanai kom rongtani nana. 42Nam maililngi nagoah kom rongtak ras i nana, ba nam bep tedapmak gonani tarutmumu i ram di ahe rama vihni mwetaknga na nuhu kot tesro nana.” 43Limalen goah te vep tedamak bi mwe ngaa ah bwerrakte bep nuhu, “Lasaros, ko vaut!” 44Mete nong baut, mini ngan bi wokon ah rat vihvi bata i bwelan mete, bi sereul niah rat lubwa lemtan ini. Jisas bep mini ni nuhu, “Karu duk bahka, bi kam ling gabaranii.”
Rat leli hal noh rama hi Jisas
45Hal kawu lengleng nan Jiusni ah rat ti dobo ben Meri, ne gita apma ah Jisas te leli, bi ra bihni mwetaknga nan. 46Ba datngin ram mul ben aji nan goah rat wuhu nan Temwat ni, ra bevehu i apma ah Jisas te leli. 47Aji nan goah rat wuhu Temwat ni bi aji salean ni le valin God, ram sasabisi mini aji nan toptowan ni bi ra bep nuhu, “Aji ahe mwe leli ililnan rowok tegol ah tam gita! Tama leli apma nanong? 48Tigoah tan nelngi utnen ba aji sera nae ran bihni mwetaknga nan. Bi at Rom ran nepma neapko kidi mini vininada, bi ram godori valin God!” 49Aji rei ni niah tei han ah Kaeapas niah tei ni aji kawu nan ut le valin God le dam nanong bep meini nuhu, “Kat baililngi apma nga. 50Kat baililngi nga nuhu, tewoswos na goah aji bwaleh man mat u nondo tarutni sera vali goah tarutni sera ra bat mat?” 51Entorah te vep vehuran nong ba tei tebaite vehuran bilos nga ba tei u gonani tei ni aji kawu nan ut le valin God, le dam nanong. Te vep dalen God, bi vehuran tevep, ba tevop biswis nokon Jisas niah bat mat u Jiusni sera. 52Bat ba mat tenga nante u Jiusni ba u nujun God ni sera niah rat ko bitwotan i ni. Bi bat lep bamula ni vaut bwaleh. 53Te vawo na le ren nanong na goah vihnian non Jiusni tei tetkol sik u goah ra bat tehi Jisas. 54Jisas tebam bural nga dobo ut temsa Judia, ba telngi ut iginan bi ban sasari ut ah li vini ah han ah Eprem ut ah tedok iginan mini non tarutni.
55Taron kanleutan Pasova non Jiusni tedi bwelwel bi tarutni hal kawu lengleng rat sak Jerusalem neleli tangroan bawo ba mwe gai taron sasabisian. 56Tarutni ram dongvi Jisas. Entorah rat tepma ut bwaleh le koron valin God bi ram uhleli i ni nuhu, “Ka bihni nuhu mwe gapu aji ahe? Ka bihni nuhu man nepma le kanleutan io tebu?” 57Aji salean le valin God bi salenan tarutni rat telngi masi mini tarutni sera nuhu, “Tigoah aji rei ni man neililngi ut ah Jisas mwi di iginan ba man bep mini ni metan goah ran ban nweuhu.”
Dewis Presennol:
Jon 11: APMA
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Published by the Bible Society of the South Pacific in 1977.