Jon 7
7
Jisas te doptop mini kisanni
1Tei limalen ba Jisas tegam hural dobo Galili tebam doni nga nuhu bat hural dobo Judia gonani Jiusni at iginan rat toni nuhu ram hi. 2Taron sasabisian non Jiusni u kan leutan u Tabanakel niah rat leli biribiri val ba tedi sasri. 3Kisan Jisas ni ra bep mini nuhu, “Ko van dini ut ahe, bi ko ban Judia metan goah nom tarutni ran gita uman ah kom leli. 4Entorah aji mo doni nuhu vepnan nema rop, ba teba lel surani apma nga. Dajin uman i kom leli ahe, tekabis nuhu ko leli ba tarutni ah ni sera ah li uruu ram maililngi kik!” 5Kisan ni nge bi rat ba vihnite mwetaknga nan nga. 6Jisas bep mini ni nuhu, “Nana ba to teba dopma nga u nana, ba mini gimi ba to tewoswos seranga u gimi. 7Tarut at li uruu ba ran ba kit riani gimi nga, ba ram git riani nana gonani nam bep seresere ini mini ni nuhu no lelian mwe gapma. 8Karu ban le kan leutan gonani nok to be teba dopma nga bi nan ba vinet nga.” 9Te vep go nong mini ni bi mwi di rada dobo Galili.
Jisas te van le sasanisi nan Tabanakel
10Limalen goah kisan ni rat van le kan leutan ba Jisas mwe ga ban juku. Rat baililngi tenga, ba te van las nge. 11Jiusni rat tongvi dobo le kan leutan, ram uhleli ra bep nuhu, “Jisas nimbeh?” 12Tei dajin sugalgalan masen tarutni, datngin rat vep nuhu, “Ni wusun aji,” ba go ra bep nuhu, “Tebu gonani badaltal i tarutni.” 13Aji teba doptop tenga dobo nokon utemsa gonani rat temtani Jiusni.
14Tevan navalolok nan kanleutan ba Jisas ban le koron valin God bi bawo mwe sesesrak. 15Jiusni rat tetkotkoh tokol ini ra bep nuhu, “Aji ahe maililngi gavaki ut? Gonani teba van tenga le skul kawu.” 16Jisas balu ini bep nuhu, “Apma ah nam sesra ba tebaite nok nga ba non God niah tesro nana. 17Aji ah mamko nuhu nema leli tonian non God, ba aji nanong man neililngi nuhu nok sesesrakan te sipma ben God, io nam doptopma li rowok. 18Aji ah mo doptop bamul ma nokon dalen, ba mwe lel dopmi noh nema geri bamula ni ma. Ba aji ah mo doni nuhu tarutni rama geri aji ah tesro ba aji nanong ba bi ni aji mwetaknga bi keketan bulong lelen. 19Moses ah te skani Temwat mini gimi ba aji tebulong rei gimi niah te rong mwetani. U apma nagoah kam lel dopmi nuhu kama hi nana?” 20Tarutni ra balu ini ra bep nuhu, “Loah mwi di le kik! Itan ah mwelel dopmi nuhu nema hi kik?” 21Jisas balu ini bep nuhu, “Nat leli uman bwaleh ah kawu lengleng, bi gimi kat tetkotkoh ini. 22Na u goah Moses te skani mini gimi nuhu kan netva nujumini ah dalma, bi kan netva ni le ren ah Sabat. Tei tebaite Moses nga ba tei jibimi ni niah rat vawora. 23Kam mwatva havak dalmani le ren ah Sabat, metan goah kan ba lel rotvi Temwat nga non Moses. Ba mwegai u apma nagoah lemi mwe gakat i nana entorah nam bamwesa aji le ren ah Sabat? 24Kawute nagoah kam sasa nokon lelian non aji tapmak, niah kam ga gita nge. Ba kamsasa nokon lelian non aji li hal ah tewoswos.”
Nemai Kraes nahe niah bat sipma li uruu?
25Datngin tarut at Jerusalem rabep nuhu, “Tebaite aji nga ahe niah rat lel dopmi nuhu rama hi? 26Karu gita! Mo doptop nge loloknan tarutni, ba aji teba gavep apma nga vanokon! Nambih nuhu saleanni ram mililngi nuhu ni Kraes nangate? 27Entorah Kraes man nepma ba aji bwaleh man baililngi te ut nga ah man nepma iginan? Ba u aji ahe ba tammaililngi sera ut ah tepma iginan.”
28Entorah Jisas tedi neseserak le koron valin God, ba mwenga rini bep nuhu, “Kam mililngi dihi ut ah nat tepma iginan? Nat bapma tenga li nok, ba aji ah tesro nana ba ni mwetaknga, ba gimi kat baililngi nga. 29Ba nana nam mililngi gonani nat sipma ben, bi tesro nana.” 30Ram lel dopmi nuhu rama wuhu ba aji bat ba dibwiri nga, gonani non to tei tebadopma nga. 31Sesnan tarutni rei goah ratti rat vihni mwetaknga nan, ra bep nuhu, “Entorah Kraes man nepma, ba man mu skani rowok tegol ngate vali goi aji ahe mwe leli?”
Rat tesro aji nan sesepan ni nuhu rama wuhu Jisas
32Entorah aji nan goah rat wuhu Temwat rat rongo goah tarutni rat sugalgal ini mini Jisas, ni, bi aji nan salean ni le valin God, ram masro aji nan sesepan ni nuhu ra mapma newuhu Jisas. 33Jisas bep nuhu, “Nan bamdi nga bemi temrap, ba nan mul ben aji ah tesro nana. 34Kan dongvi nana, ba kan ba wutdihi nana nga bi ut ah nan di iginan ba kan bapma nga.” 35Jiusni ra bep ma mapma mini ni nuhu, “Man ban ibeh ah tan bam butdihi nga, man ban li vini ah Gris ut ah Jiusni ram di iginan bi mwe sesra at Gris? 36Bep nuhu, ‘Kan dongvi nana ba kan ba wutdihi nana nga, kan bapma nga ut ah nan di iginan.’ Meramnan non vehuran ni ahe ah apma?”
Selngan masradaan
37Nok nan ren nan kan leutan ba tei ren kawu. Tei le ren nannong ba Jisas mwi di boswos bi mwe nga rini bep nuhu, “Aji ah mamdi ba nepma bek nemin. 38Tapmak goah matpo le ululan at mwate, niah te vep nuhu, ‘Aji ah man bihni mwetaknga nak ba selngan masradaan man baut le non masan.’ ” 39Jisas te vep vehuran nong u Tabite Kokon niah goah rat vihni mwetaknga ra bat teli. Ba Tabite Kokon nanong ba God tei teba dosro nga, gonani Jisas tei tebado dumere bamul nga dini mete vale non meresan.
Sabwaran masan tarutni
40Ses mumu nan tarutni niah rat rongo goah te vep vehuran nong ra bep nuhu, “Aji ahe ba mwetaknga nangate nuhu ni Ajinan Dalen God!” 41Datngin ra bep nuhu, “Ni Kraes.” Ba datngin ra bep nuhu, “Kraes bat bapma nga Galili! 42Ululan at mwate ba te vep nuhu, Kraes ba man nei woran Deved, bi man bo li vini ah Betlehem ut ah Deved te dok iginan.” 43Tei tegam leli ba sabwaran tedi masen tarutni u ni. 44Datngin tarutni nong rat toni nuhu ra bat wuhu Jisas, ba aji le ni teba dibwiri tenga.
Sale nan Jiusni niah no vihni mwetaknga an tei tebulong
45Aji nan sesepan ni rat mul ben ajinan goah rat wuhu Temwat bi aji nan, salean le valin God, ram uhleli i ni nuhu, “U apma ba kat batkae nga mapma?” 46Aji nan sesepan ni ra balu ini ra bep nuhu, “Aji tebado doptop tenga tapmak goah aji ah mo doptop!” 47Aji nan goah rat wuhu Temwat ni ram uhleli i ni nuhu, “Tekap temu badaltal gimi tedapmak ni? 48Kam maililngite aji rei sale nama, io datngin aji nan goah rat wuhu Temwat niah ra bihni mwetaknga nan? 49Tarutni ahe ba rat baililngi Temwat nga non Moses, bi lele kakat non God ba mwi dite li ni!” 50Nikodimas, niah te van ben Jisas mwate tesok mase, bi bep mini ni nuhu, 51“Li halan nondo temwat ba tabutdihi bawora non toptowan si, bi nem butdihi luhmwi apma ah te leli.” 52Ra bep mini nuhu, “Kik bi komui aji at Galili? Ko huru ululan at mwate ba kon gita goah ajinan dalen God ba man bapma nga Galili.”
Dewis Presennol:
Jon 7: APMA
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Published by the Bible Society of the South Pacific in 1977.