Mak 10
10
Jisas tesesra ni nuhu halan gavak mini aji ah mwiling gabarani danjun
1Jisas mamlu dini ut iginan bi mwisip li vini ah Judia, bi ban rotvi sileng ah Jodan. Tarutmumu ram mapma mwetak ben bi mwesesra ni tapmak goah tedok nangate nelel ras ini.
2Ajinan goah rat wuhu Temwat ram mapma ben nuhu rama leldopmi nuhu rama wuhu. Ramuhleli ini nuhu, “Kovep mini gema, nondo Temwat mamkorini nuhu aji man ling gabarani danjun?” 3Jisas mwegam balu ini bep nuhu, “Dalek telingling apma ah Moses teskani mini gimi?” 4Rabalu ini rabep nuhu, “Moses teskani dalekte mini gema nuhu aji man neulu vehuran u roworowan ba mwega ling gabarani danjun.”
5Jisas bep mini ni nuhu, “Moses teulu dalek telingling nanong mini gimi gonani bujummi matkol basla. 6Ba le vawonan entorah God teleli ut li uruu, ba ululan ah tevep nuhu, ‘God teleli aji dalma bi aji havin. 7Bi nau vehuran nanong ah aji dalma man ling gabarani teman nuru dajin bi ramrui bwaleh nuru danjun. 8Bi ran bamrui karu nga ba ranrui bwaleh.’ Bi bujun nanong nagoah ran bamrui karu nga ba bwaleh. 9Aji man bam sabwera apma nga ah God tedidi vautbwaleh.”
10Ratmul bamul leval, ba tarut non Jisas ramuhleli mwetani vehuran nong ini. 11Bep mini ni nuhu, “Aji ah mwiling gabarani danjun, bi mwelak rus i aji havin watnende ba mweleli vasalan mini danjun ah bawo. 12Bi mini aji havin ah mwiling gabarani hoan ba mweleli vasalan, entorah mwelak rus i aji dalma watnende.”
Jisas tevagabis i havakni
13Ajini ram matkae havakni mapma ben Jisas nuhu nemalngi ngan li ni. Tehu ba non tarutni ramdi goro ni. 14Entorah ah Jisas tekita ba lelen tekakat i ni uru gonani non tarutni ratgadi goro ni. Bep mini non tarutni nuhu, “Karuleli ba rapma bek, kabadi niran. Kan ba maluktean nagoah ut kokon non God ba utne tedok iginan. 15Mwetaknga letlet nabep mini gimi aji ah man bali ut kokon nga non God tapmak aji havak ahe, ba man badi tenga nevante iginan.” 16Jisas mweapko havakni nong vautbwaleh bi malngi ngan lini bi bagabis i ni.
Aji subu ah tedoni nuhu bat wutdihi masradaan
17Jisas mamlu mwetak bi muhural ban, ba aji morop mapma bi mwidingdu nokon bi muhleli ini nuhu, “Sesesrakan tekabis, apma ah nanleli ba naneli masradaan?” 18Jisas bep mini ni nuhu, “Kobep nuhu natkabis u apma? Aji tebulong ah tekabis ba God nante nihken. 19Komaililngi luhmwi dalek telingling ni ah rabep nuhu, ‘Kon baih las tean i aji, bi kon ba lelbasal tean, bi kon ba las tean, bi kon ba keket tean, bi kon ba lelte kunan leut non aji watnende. Konetpe temam nuru dajim.’ ”
20Aji nong bep nuhu, “Sesesrakan, tevawora entorah nat tei aji ba nat ioh ras li dalek telingling ni nong mwegat mwerani.” 21Jisas mwigit valin le rongnan nokokte tekabis bi bep mini nuhu, “Apma bwaleh ngama ah kobatmu leli. Kovan bi kobos i nom leutni bi komaskani gelnan mini aji songoni. Metan goah konei aji subu mere le bini, bi kom mapma nedahkuru nana.” 22Entori aji nong terongo vehuran nong, bi lemtan mamrapsol bi rongnan nokon mwegabmas bi mul. Rongnan nokon tekapma gonani tei ni aji subu bi non leut tedi basla.
23Jisas mwigit vali non tarutni bi bep mini ni nuhu, “Apwin! Manetkol tokol mini aji subu u goah man ban le ut kokon non God.” 24Non tarutni rat tetkoh but i vehuran nong. Tehu ba Jisas bep mwetani nuhu, “Nujukni, ut kokon non God ba matkol tokol u goah aji man ban. 25Tebatkol tenga u goah kamel batvan le bwangan nedil, vali goah aji subu batvan le ut kokon non God.” 26Vehuran nong teleli ba non tarutni rat tetkoh tokol ini. Ram gamdima neuhleli i ni, rabep nuhu, “Bi itan nga ah man bamwesaan?” 27Jisas mwigit vali ni bi bep mini ni nuhu, “Leutsera matkol mini ajini, ba mwegamui mini God ba leutsera mamrongrong.”
28Pita mudumre bi modoptop bep nuhu, “Ko kita, kamat songabarak sera noma leut bi kam mapma nedahkuru kik.” 29Jisas bep mini ni nuhu, “Iaoh mwetaknga nangate. Ba ajinan ah mwiling gabarani vininan, bi kisanni io hojinni, bi dajin nuru teman io nujunni, bi lekonan u nana bi dalek tekabis 30ba man lep bamula apma nanong niah teling gabarani. Apma nan ah teling gabarani tapmak valin bi kisan, bi hojinni bi dajinni bi nujunni, bi non tan. Ba kitkitriakan manmu kawu natapmak. Limalen goah illan nanong man nepma sera ba aji nanong man butdihi masradaan. 31Aji halkawu lengleng nanong niah ramali noknan utnekte, limalen ba ran gamuli vawonan utnekte.”
Jisas tedoptop i vakajilan nokon halan metenan
32Ratsak li hal ah tesak Jerusalem ba Jisas tedumu i ni. Non tarutni rat vairu tokol i vehuran ah tevep mini ni. Tarutni ah rat tepma jukun ba rat temtaji tokol. Jisas bep mini non tarutni 33nuhu, “Karu gita, tamsak nanong Jerusalem ut ah nana niah nambi Nujun Aji, ran neskani nana ban mini ajinan saleanni le valin God, bi mini goah ramabuhu Temwat. Ran bep bamte nana bi ram maskani nana ban li ngan lenglengani. 34Ajini nanong ba ran mamaplel i nana, bi ran gasu vanokok, bi ran riji nana bi ranih bamte nana. Ba limalen ren kajil ba nandumre bamul dini mete vale masan.”
Jemes nuru Jon ratrudoni apma dini Jisas
35Jemes nuru Jon, niah tei nujun Sebedi nuru, ramrupma ben Jisas bi ramru uhleli ini nuhu, “Sesesrakan, kamrudoni nuhu konleli apma mini gemaru niah kamru doni dini kik.” 36Jisas muhleli i nuru nuhu, “Kamru doni apma? Apma ah nan leli mini gimru?” 37Ramru bep mini nuhu, “Karudoni nuhu konleli ba kamanru sadok maum, go li maun ngam ah mwiji bi go li maun ngam ah mwii, le nok kapkabisan le nom ut kokon.” 38Jisas bep mini nuru nuhu, “Kat baruililngi apma nga ah kamru uhleli. Kamruililngi go kanru min le lah ah nan min lelen, bi kamru leleh i lelehan ah nan min lelen, bi kamru leleh i lelehan ah nan leleh ini?” 39Ramru baluini ramru bep nuhu, “Kamruililngi go kamanru min lelen.” Jisas bep mini nuru nuhu, “Lah niah nan min lelen ba kanru min lelen. Bi kanru leleh i lelehan ah nan leleh ini. 40Ba woswosnan tebu mini nana u goah nanesra nuhu go nibeh rei gimru niah man sadok li maun ngak ah mwil bi go nibeh niah man sadok li maun ngak ah mwii. Ba manei God niah maneskani ut nanong mini goah telel bovani u ni.”
41Entorah riaknan non tarutni ah ni tesangwul rat rongo vehuran nong ba lele bawo mwegakat i Jemes nuru Jon. 42Jisas mahu ni vautbwaleh bi bep mini ni nuhu, “Kamaililngi lelian non goah rabi salenan lenglenganni. Aji salean nong ba rowon tedok. Bi goah rabi salena, ba ram leli tarutni nanong ramgamdi van ngaa. 43Ba mwegamui u gimi ba manei halwatnende. Tigoah aji rei gimi mandoni nuhu nemai kawu, ba man gamui ajinan nomi uman. 44Bi tigoah aji rei gimi ah mandoni nuhu nemai bawo ba man gamui atnan nomi karih. 45Tapmak goah nana niah nambi Nujun Aji ba natba sipma teng nuhu aji ran rareite nana, ba nat sipma nuhu nan rarei aji, bi naneskani nok masan metan goah man gel bamula tarut seranae.”
Jisas teleli metan Batimeas tekabis bamul
46Jisas mini non tarutni ram mapma Jeriko. Tei entonanong ba bwera tarutmumu rat van jukun Jisas, entorah ratemlu dini ut Jeriko. Aji tesadok dobo iginan dingin hal niah tei matbi, tei han ah Batimeas. Tei han teman ah Timeas. 47Entorah terongo vepnan Jisas niah aji at Nasaret, tepma al li hal nong bi mwengaa. Bep nuhu, “Jisas, niah kobi woran Deved, bwarek nedok nokom.” 48Lelen tarutmumu ah rat tahkuru Jisas mwegakat ini, bi rabep mini nuhu, “Kosadok ronga.” Tehu ba mumu ngaa ngate ah bwerakte bep nuhu, “Woran Deved, Bwarek nedok nokom.” 49Jisai mwidi ronga bi bep nuhu, “Karu hu mapma.” Ram mahu matbi nong bi rabep mini nuhu, “Tekabis nge kodumre bi koban gonani mahu kik.” 50Bonhi bwelan tavan, bi but vamere bi mapma ben Jisas. 51Jisas muhleli ini nuhu, “Komdoni apma?” Matbi nong balu ini bep nuhu, “Sesesrakan, namdoni nuhu nambat kita ut.” 52Jisas bep mini nuhu, “Kovan, nomi vihni mwetakngaan teleli ba kotmas.” Tei vilbwaleh ba mwita ut, bi mwedahkuru Jisas ban li hal.
Dewis Presennol:
Mak 10: APMA
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Published by the Bible Society of the South Pacific in 1977.