Mak 14
14
Ratleli hal u goah ramahi Jisas
1Ren karu nanong tedi goro renan kanleutnan Pasova, bi bered niah isnan tei tebulong. Aji salean le valin God bi goah rat wuhu Temwat rabawo nedongvi hal u goah rama wuh las i Jisas bi ramahi. 2Lo no toptowan ba rat vep nuhu, “Tan ba leltean le taron kanleutan gonani baskani illan mini tarutni.”
Aji havin tewura i Jisas
3Jisas tedok Betane leiman Saemon, niah teras i rasan tekapma. Entorah tesadok negan, ba aji havin mapma, teselkani botel niah rat leli i tanmalkobo. Ratehu i alabasta. Wura tedi le botel nong, bi bunun tei tekapkabis, bi gelnan tei bwerakte. Mwelel bwera botel nong bi mwesalila wura nong li bujun Jisas. 4Datngin tarutni rah ratti lele mwegakat, bi rabep ma mini ni nuhu, “U apma ba aji havin ahe mogodori wura ahe? 5Tigoah batti nge ini ba batei gelnan dola tevata vakajil, bi bat beji aji songoni nokon gelnan.” Lele tekakat i aji havin nong bi ram raji.
6Jisas bep mini ni nuhu, “Kaba godoranini; u apma ba kamleli rongnan nokon mwegapma tapmak? Teleli uman tekabis mini nana. 7Gimi ba kamdok ras ben aji songoni, tigoah kanga doni ba kanga bejiteni. Ba u nana ba nanba dok ras nga bemi. 8Teleli apma ah tedoni nuhu bat leli. Tewura i nana bovani torah rabat dipmi nana. 9Mwetaknga nambep mini gimi, utibe nan ah dalek teraba mandi iginan li uruu sera, ba apma i teleli nong ba ran bep lenga radanaini i kavihni lenga nan.”
Judas temko u goah manwos i Jisas
10Judas Iskariot, niah tei datngin tarut non Jisas, niah tei ni tesangwul vepnan karu, ban ben aji salean le valin God nuhu nema wos i Jisas mini ni. 11Rongnam noko tei tekabis tokol entorah rat rongo apma ah Judas tevep mini ni. Rabatjuru mini nuhu raneskani mane i gelnan. Judas terongo tapmak nong bi bawo modongvi hal u goah nemalngi Jisas ban li ngaa.
Jisas tekani kanleutnan Pasova mini non tarutni
12Te levawonan renan sasabisian, tei leto nanong ba rat kani bered niah isnan tei tebulong. Tei le ren nanong niah rat tehi nuju sipsip u goah ratkani le sasabisinan Pasova. Tarut non Jisas ramuhleli ini nuhu, “Utibe ah komdoni nuhu kaman ban nemumumtak i hinkan sasabisinan Pasova iginan niah kon gani?” 13Jisas masro datngin non tarut nuru karu. Bep mini nuru nuhu, “Karuban li vini ihe, ba kanru butdihi aji dalma man selkani sileng le botel. Kanru dahkuru aji nananong. 14Tigoah mansak le val be kanru sak jukun, bi kamru bep mini ajinan val nong nuhu, ‘Sesesrakan tevep nuhu, “Val nimbeh ah mangani hinkan Pasova lelen mini non tarutni?”’ 15Kanru bep mini tapmak ba ajinan val nong mansesra ut mini gimru ah bwerakte bi mwidi mere. Kanru mumumtak nai utnende iginan ut ah tangani hinkan Pasova.” 16Ramru ban bi ramru sip li vini nong. Entorah ratru sip ba ratru butdihi sera natapmak goah Jisas tevep mini nuru. Ratru sip bi ramru leli hinkan sasabisinan Pasova.
17Tei utebwarek ba Jisas mapma mini non tarutni niah tei ni tesangwul vepnan karu. 18Entorah ratti negan tavan ba Jisas bep mini ni nuhu, “Mwetaknga letlet nambep mini gimi, aji rei gimi man bos i nana. Manei aji rei gimi nai tamdi negan ahe.” 19Rongnan noko tei tekapma tokol ini. Ramuhleli bwabwahlehlak ini i Jisas nuhu, “Kobep tapmak ba kobihni nuhu itan?” 20Jisas balu ini bep nuhu, “Manei aji rei gimi niah kabi nok tarut, niah gimi tesangwul vepnan karu. Manei aji rei gimi niah man songi kan bered le dis niah nan songi kak lelen. 21Nana niah nambi Nujun Aji ba nan mat tapmak goah ululan at mate tevep. Ba man gapma tokol mini aji nanong niah manbos i Nujun Aji. Bat kabis ngate tokol mini aji nanong nuhu bat bamboran.”
Noknan kanan non Jisas mini ni
22Entorah ratti negan bi Jisas mali bered bi bavatla God uru, bi bwabwerawera bi maskni mini non tarutni. Bep mini ni nuhu, “Karuli bi negani gonani mamjik nanong.” 23Mali lah bi bavatla God uru, bi maskani mini ni, bi ni sera ratemni nokon. 24Jisas bep mini ni nuhu, “Danak nanong niah manrop u ajini seranae. Danak niah manleli ba watlean non God mandi tetkol. 25Mwetaknga letlet nambep mini gimi, nanbamdi nga nemin mwetani waen ahe, ba manei ningate ah nanemni waen teraba le ut kokon non God.”
26Ram leli sasaan bwaleh bi raban li rewen Oliv.
Jisas tevep seresere goah Pita man bep nuhu tebaililngi nga
27Jisas bep mini ni nuhu, “Gimi sera ahe ba kan ropselal dini nana, nomi vihni mwetakngaan maneiah. Tapmak goah ululan at mate tevep, niah tevep nuhu, ‘God manehi ajinan kitan li sipsip, bi bilan sipsip ran roprop selal.’ 28Ba limalen goah nan dumre dini mete ba nandok neban bawo Galili, ba kanga binet jukuk.” 29Pita balu ini bep nuhu, “Nan badi tenga neling gabarakte kik, masen ah gonirahe ran rop selal.” 30Jisas bep mini Pita nuhu, “Mwetaknga letlet nambep mini kik, mwatete manbado datere nga vakaru, ba kon bep masi vakjil bungmwerani nuhu kotbaite datngin nok tarut nga.” 31Pita balu ngate ini tetkol bep nuhu, “Nanbadi tenga nembepte nuhu nat baite datngin nom tarut nga masen ah nabat mat mini kik.” Riaknan non tarutni rabep sera nge tapmak.
Jisas tedangro leko ah Getsemane
32Ram mapma ut ah ratehu i Getsemane, bi Jisas bep mini non tarutni nuhu, “Karu sadoksi dokah bovani goah namavan nedangro.” 33Matkae Pita bi Jemes bi Jon bi raban jukun. Terongo ah non vihnian temrespon, bi rongnan nokon tekapkapma. 34Bep mini ni nuhu, “Nok vihnian ba mamrespon bi rongnan nokok mwegapkapma, namrongo ah bwelwel na namat nong. Karudi si dokah, bi negit.” 35Tehural nge ban tewep ba maiah valitan bi mwedangro nuhu, tigoah hal batok ba batleli ba illan ah tepma mini bataras dini. 36Mwedangro bep nuhu, “Tadat, Tadat. Leutsera ba boswos mini kik, ba nam uhleli i kik nuhu, kon ba leltean nuhu naminte le lah ahe. Koleli ba ba man ban gabarak dini nana. Tebaite nok tonian nga ba li nom tonian.” 37Mulma, tegamupma ba butdihi goah ni kajil ah ratti nemju. Bep mini Pita nuhu, “Saemon, komamju u apma? Rowom tebulong u goah kobat mugitsi batei vatkun to bwaleh. 38Karudi negit bi kam dangro metan goah kanbaiah nga entorah ranlel dopmi gimi. Nomi vihnian matkol ba mwegamui u mamjimi ba rowomi tebu.” 39Ban mwetak nedangro bep vehuran nge ah tevep bawora. 40Mulma mwetak ben non tarut ah ni kajil. Tepma ba butdihi goah ratti nemju gonan meta tei tetluk basla. Rat bamuililngi apma nga ah rama vep mini entorah tepma bee. 41Temulma mwetak i vakajilan bi bep mini ni nuhu, “Kamdi ngama nemju bi nemembe luhluh? Kawutesi, gonani to tepma nanong. Nanong ba nana niah nambi Nujun Aji namaskakan ban li ngan ajinan kapmwaanni. 42Karudumre ba taban. Karugita aji ah man bos i nana ba nitei mapma ahe.”
Ratwuhu Jisas
43Jisas tedoptop rada ngama ba Judas, niah tei datngin tarut non Jisas, niah tesangwul vepnan karu mapma. Tetkae bwera tarutni. Goi rat tepma jukun nong ba rat kavin buan kuran, bi wasoga. Ajini nong ba aji salean le valin God bi goah rat wuhu Temwat lemtan tarutni ratesro ni. 44Aji ah tewos i Jisas teskani dalekte masi mini ni tevep nuhu, “Kan gita aji ah nan wahwahbwet mini ba aji nananong niah kanbuhu. Kanwuh bata gololo entorah kaneli ban.” 45Entorah Judas tepma bis bi mwesak bi bep mini nuhu, “Sesesrakan!” bi bwahwahbwet mini. 46Ram mapma bi rabuh bata bi ram matkae ban. Ratwuh bata tetkolsik entorah rateli ban. 47Aji rei goah ratti sasari Jisas, mwereva nuan non kuran bi mwedas behe maun dalingan atnan karih non aji kawunan ut le valin God. 48Jisas modoptop bep mini ni nuhu, “Gavak nagoah kat tepma metak tapmak ah, niah kam mapma netak van buan kuran bi wasoga? Kam leli tapmak goah nambat tei ajinan lasan, bi nambat ihlas i aji. 49Tei ras nagoah nat sesesrak le koron valin God. Ba nannga ba katbaga wuhu nana nga. Ba apma ahe ba mandapmak rada, gonani man leli ba ululan at mate nan rop bwiswis.” 50Non tarutni ram ling gabarani bi ramrop selal dini.
51Tegamui aji malgel bwaleh nge tevan dobo jukun Jisas. Tegam viteh nge i sereul. Rabuhbata 52ba mosongabarani kajivin bi bi morop selal i kakahan.
Jisas tedi lemtan toptowan
53Ramali Jisas ban le valin aji kawunan ut le valin God. Saleanni le valin God bi lemtan tarutni bi goah rat wuhu Temwat ram mapma ut bwaleh. 54Pita tedahkuru ba tevan tenga sasari tokol, mwesak le koron valin aji kawu nan ut le valin God. Mwesak mwesadok matlah ben goah ratti nesesep. 55Aji ah tei salean le valin God bi tarutnan toptowanni ramdi nedongvi aji ah bat vepte vehuran tekapma vanokon Jisas. Gonani rabatba ih masen nga ini, apma batok ngate ah rabat tehi uru. Rat leldopmi ba apma tei tebulong ah rabat wutdihi. 56Aji halkawu lengleng ah rat ket vanokon Jisas, ba nannaga ba vehuran ah rat vep ba tei ketan sera.
57Ajini go ramdumre van vehuran ah rat vatru bwaleh bi ramabiri vanokon Jisas. 58Rabep nuhu, “Kamat rongo goah tevep nuhu, ‘Nan sengsegelani valin God i aji rat leli ahe, bi namlellihi i goah maneli ren kajil nge ba monok.’ ” 59Ratvep tapmak ba no vehuran ah rat vatru bwaleh ba tei tebaite mwetaknga nga, bi rat ba rong mwetak tenga.
60Aji kawu le valin God mwidi boswos lolokna bi muhleli vehuran i Jisas bep nuhu, “Apma tebulong ah konwalu vehuran non tarutni rahe ini?” 61Tehu ba Jisas tedi ronga, tebavepte mase vehuran bwaleh nga. Aji kawu le valin God muhleli mwetani vehuran ini bep nuhu, “Kik kobi Kraes, niah kobi Nujun God?” 62Jisas balu ini bep nuhu, “Nana nanong. Kan gita nana niah nambi Nujun Aji, nan sadok maun God li maun ngan ah mwiji, entorah man supmulam le bini mini rowon.” 63Aji kawu le valin God masre bwelan bi bep nuhu, “Vehuran apma go ngama ah tamdoni u aji ahe? 64Kat rong sera non toptowan nanong, niah modoptop gapkavak vanokon God. Kabihni nuhu mwegap?” Ramatrak sera ngaa, bi rabep nuhu, “Teleli kapmwaan bi man mat radanae.”
65Datngin tarutni ramdumre bi ram gasu vanokon Jisas, bi raboji bodi birin metan bi ram riji. Rabep mini nuhu, “Tigoah manei kik ajinan dalen God ba kovep dopmi nuhu itan ah mwiriji kik.” Goah rat sesep ramali bi ram reba.
Pita teket nuhu tebaililngite Jias nga
66Pita tesadok rada ngama le koron val nong. Tesadok ngama ba atnan karih non aji kawu le valin God muhural mapma. 67Entorah tekita Pita ah tedi netlah bi bep mini nuhu, “Ae, kik ahe ba kotsok masen goah rat tahkuru Jisas ah aji at Nasaret?” 68Tehu ba mwiget, bi bep nuhu, “Natbaililngi aji nga nong bi natbaililngi apma nga ah kobep.” Bi muhural mwisip wan matgali. Tei ninge le to nanong ba matete mwedatere i vawonan. 69Aji dalat go mapma niah tei atnan karih, bep rorop ini mapma mini ni nuhu, “Aji ahe babi datngin tarut non aji i mwelel dopmian ahe.” 70Pita mwiget mwetak. Temui vilnge limalen ba goah ratti sasari rabep mini Pita nuhu, “Kon ba ket nga nuhu kot batei datngin non tarut nga, gonani kik, ba kobi aji at Galili.” 71Pita mwegala bep nuhu, “Namgala God, natbaililngi aji nga ah kamdi nebep.” 72Temui vilnge ba matete mwedatere i vakaruan. Pita bihni lenga goah Jisas tevep mini nuhu, “Matete manbado datere nga vakaru ba konbep masi vakajil nuhu kotbaililngi nana nga.” Le non vihnian mwegapma bi mwedeng.
Dewis Presennol:
Mak 14: APMA
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Published by the Bible Society of the South Pacific in 1977.