Mak 2
2
Jisas tevamwesa gagaan
1Tebaite ren teses nga tevan, ba Jisas mulma mwetak Kapaneam. Vepnan tevan bodi ut vilbwaleh nagoah Jisas temulma bamulte leiman. 2Tarutmumu ram mapma ut bwaleh, gonong bi ut tei tebulong ut ah rabat ti iginan, gongeah ut wanketap bi tei tewon. Jisas bawo modoptop mini ni. 3Tedoptop ngama ban, ba ajini ram selkani gagaan mapma ben. Ajini nong tei ni kavet. 4Rabat ba selkani nga mwesak ut ah Jisas tedi iginan gonani tarutni rat tei halkawu basla. Ram selkani aji nong mwesak lival mere, bi ram leli bwangakte boswos i ut ah Jisas tedi iginan. Entorah rat lel sera bwangakte nong bi rabasro aji nong mwisip le bujubwenan nokon kawa. 5Entorah Jisas tekita goah no mwetaknga tei tedok bi bep mini gagaan nong nuhu, “Nujuk, nom kapmwaan te vihni gabarakan sera dini kik.”
6Datngin ajinan goah rat sesra Temwat ramdima nebep nuhu, 7“U apma nagoah aji ahe modoptop gapkavak tapmak ahe vanokon God? Aji tebulong ah bihni gabarani kapmaan, ba God nante?” 8Tei vilbwaleh ba Jisas maililngi no vihnian, bep mini ni nuhu, “U apma ba kabihni vihnian ah tedapmak? 9Apma ah tetkol tokol? Tetkol nagoah nambat vep mini gagaan ahe nuhu, ‘Nom kapmwaan te vihni gabarakan,’ io nambat vep mini nuhu, ‘Kodumre bi kom apko bujubwenam bi kom hural’? 10Namdoni nuhu nama sesra luhmwi mini gimi nagoah nana niah nambi Nujun Aji ba rowok tedok li uruu u goah nan bihni gabarani kapmwaan.” Bi bep mini gagaan nong nuhu, 11“Nambep mini kik, kodumre bi kom apko bujubwenan bi kom hural.”
12Entongama ah ratti negita, ba aji nong mudumre bi mweapko bujubwenan bi mul. Rat tetkotkoh tokol ini. Ram haphawi God rabep nuhu, “Tatbado gitate apma nga ah tapmak ahe.”
Jisas tehu Livae
13Jisas tesip mwetak mwatwen sileng niah Galili ba tarutmumu ram mapma mwetak ben bi bawo mwesesra ni. 14Tehural ban tewep ba mwigita ajinan goah teapko gelnan takis non tarutni. Tei han ah Livae, tei teman ah Alpeas. Livae nong tesadok dobo levalin non uman. Jisas bep mini nuhu, “Kopma nedahkuru nana.” Livae mudumre bi ban mwedahkuru.
15Tei limalen ba Jisas ban mwegan leut leiman Livae. Ajinan goah rat apko gelnan takis non tarutni ba tei ni hal kawu niah rat van jukun Jisas, bi mwegai ajinan kapmwaan ni. Bi mwegai datngin tarutni niah rat van jukun, bi non tarutni, ni sera raban negan mini. 16Datngin goah rat sesra Temwat niah rat wuhu Temwat ram gita goah Jisas tekan mini ajinan kapmwaan ni, bi mini goah rat apko gelnan takis non tarutni. Ram uhleli i non tarutni nuhu, “U apma ba mwegan mini ajinan kapmwaan ni, bi mini ajinan goah ram apko gelnan takis non tarutni?”
17Jisas terongo ni bi balu ini mini ni nuhu, “Tarutni ah rongnan noko mwegabis, ba rat badonite aji nan rasan nga, ba goah ram ras niah ramdoni ajinan rasan. Nat bapma tenga nuhu nama uhte aji woswosan ni, ba nat tepma nuhu namhu ajinan kapmwaan ni.”
Vehuran u halan linglingan
18Tarut non Jon, bi tarut non ajinan goah rat wuhu Temwat rat tok nelingling entorah tei taron no tangroan. Datngin ajini ram mapma ben Jisas bi ram uhleli ini nuhu, “U apma ba tarut non Jon bi tarut non ajinan goah rama buhu Temwat ram lingling ba nom tarutni rat ba lingling nga?” 19Jisas balu ini bep nuhu, “Entorah aji mwegamra lak, ba kam gita nuhu walun non mweranni ram lingling entorah ramdi ben? Entorah aji ah mwegamra lak mwidi bee ba ran ba leli nga tapmak. 20Ba taron man gapma, entorah aji ah tegamra lak man ban dini ni ba ramga lingling.
21“Io aji tebu ah man neli vingi sereul teraba bi mwisilvi mali sereul ini. Tigoah man leli tapmak, ba sereul teraba man sandede mali sereul bi mweleli bwangakte bi bwerakte. 22Bi aji tebu ah man salila waen teraba vale tangin mali waen. Gonani tigoah man leli tapmak, ba waen teraba man sasup bi mweleli tangin mali waen mawo. Man leli tapmak ba waen bi tangin ranru godo garu. Ba u waen teraba, ba tangin batmu raba tedapmak.”
Vehuran u ren ah Sabat
23Tei vabwaleh le ren ah Sabat ba Jisas muhural ban leko, ut ah rat ruwu kok lelen. Entorah rat hural ban ba non tarutni ram malngu kon bi ram gani. 24Ajinan goah rat wuhu Temwat rabep mini Jisas nuhu, “Kokita, u apma ba nom tarutni ram leli tapmak ah. Gonani apma i ram leli ahe ba mwidi i maun ren ah Sabat le noma Temwat.” 25Jisas balu ini mini ni bep nuhu, “Kat ba wulki apma nga ah Deved teleli leto ah ma tei tekaji mini non tarutni? 26Tevan le valin God bi mwegani bered niah rat teskani masi mini God. Teleli apma nong leto rah Abiata tei aji kawunan valin God. Tei le Temwat, ba tedi nante u ajinan valin God u goah rat kani bered nanong. Ba Deved tekani bi maskani mini non tarutni.”
27Jisas bep mini ni nuhu, “Sabat ba telingan u kabisnan aji tebalingan tenga na aji u kabisnan ren ah Sabat. 28Bi u nana niah nambi Nujun Aji, ba nambi Subu nan Sabat.”
Dewis Presennol:
Mak 2: APMA
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Published by the Bible Society of the South Pacific in 1977.