Luke 3
3
1Yawmaq Hyangphalang Tiqberiq Kaeta mang nawnsauk hng'laihngaw a'moeiq kho wa Yudaq pleiya Poutipilat khoeq ba'yeinkhan phlaet loeqteq, Herouq khoeq Galilae plei a'uksuksaw a'phlaet. Herorq nau Philapuq khoeq Iiqtuyae loeq Tayakhawnoeiq pleiya a'uksuksaw phlaet loeqteq Luqtaniq khoeq A'biqlein pleiya a'uksauksaw a'phlaet. 2Yaq khinga Anaq loeq Kayaphaq khoeq Yahaenpaw lang an phlaet kho wa Boipaw plau khoeq tau duka a'moeiq khoeq Zakhariq caw Yawhan hma a'phaw. 3Yawhan khoeq Yawdan mlaet baeng blaiq hlaiq loeqteq khlaung haqla yaqhniq a'plaeta khoeq án loetai tawiqya tuiyoeng hneitsein ánkhaumiyai khoeq klong a'hau haq. 4Pa'rawphaeq Hesayaq klama yok loeq a'tauk khoeq teq tau duka khlaung poemak loeq hlaiq loeqteq mpoq loeq a'hau khoeq plau teq Boipaw a'lo dun laum klan boei. Boipaw laum mkhlunboei tuk. 5Hng'longsok a'moeiq khoeqhaq hmluiq tuk loeqteq, tonglaen tonghyaung haqkhoeq nán hmyi laqai. A'kalaek khoeq lawm haqkhoeq mkhlun tuk loeqteq a'glai khoeq lawm haqkhaw amthoe boei tuk. 6Yaqkiyoeng Boipaw loeq a'klawnai klong khoeq khlaung haq awlum loeq a'nhmuq laqai taeng a'hau. 7Yaqklongoeng Yawhan hma tuiyoeng hneitsein ánkaumiyai án lo khoeq khlaung haqla pawi yaq khoeq pho sei myoe haqloe, a'phaw hnai khoeq Boipaw a'mlunghloka khoeq nánconai tawiq ya nanghniqa a'ni loeq sa'diq a'mpaek haqloe? 8Nanghniq loeq a'plaet haq kán tong poeiq hni nakkhoeq nanghniq biyoeng sauksi plaqoek. Nanghniqa nanghniq Abarahan caw haq kán phlaet taeng hau wai tuk. Boipaw loeq nei lung haqkhoeq Abarahan caw haqla a'sai haq noeng. 9Towa khinga hai laengak loeq thing haqla a'yungpa ta'koeiq a'khluqai khoeq a'moeiq hni. Yaqklongoeng a'thaiq pawi thaiq yaqkhoeq thing haq a'khluq laqi loeqteq mipuma a'thoen a'laqi yai taeng a'hau. 10Yaqkiyoeng khlaung luiya khoeq boengak loeq Yawhana neikhanaka keihniq loeq pi khoeq kán sai laqai yoe? taeng án hiq. 11Yawhan loeqkhaw nanghniq duka khoeq angki lawphneiq tawyi saw loeq lawpak khaw tawyi yaqkhoeqa lawpak paekouk. Ei okai moeiq saw loeqkhaw moeiqyaqsawa paekouk taeng a'hau. 12Boengak a'khon koksaw haqkhaw Yawhan hma hneitsein án kaumiyailo uk loeqteq sa'lapawoe, keihniq loeqkhaw pi khoeq kán sai laqai yoe? taeng án hiqa teq 13Yawhan loeqkhaw yaqhniqa nanghniq loeq a'khon nákok loeq thaengthaeng kokai tuk taeng a'hau haq. 14Boengak caeksaw haq loeqkhaw keihniq loeqteq pi khoeq kán sai laqai yoe? taeng án hiqa teq Yawhan loeq nanghniq loeqkhaw khlaung haq hma khoeq haen aqdamaq hiqi yai tuk. A'niya khaw seiyaq khoeq yutiyai tuk. Nanghniq nán laqi khoeq wawnhaenoeng nán mlung mdipi boei tuk taeng a'mcok hau haq. 15Khlaung awlum loeq Boikhreitaw a'lo wai khoeq án congi khing a'phlaet klongoeng Yawhan khoeq a'klawn saw Mesiyaq seipai taeng án mkhin. 16Yaqkinga Yawhan loeq a'hau haq ba khoeq teq kei khoeq khlaung haqla tuiyoeng hneitsein ka'paek khoeq a'layi. Seiloeqkhaw kei thauka a'tat a'laen khoeq khlaung a'lo hni. Kei khoeq yaq khocumyoi ka'mphlut paekai khoeq pak toniya hang. Yaq loeq khlaung haqla cimcai muikhlawoeng khaw, mi yoeng khaw hneitsein a'mpaek haqlai. 17Yaqkhuta a'moeiq khoeq koksawqoeng Zungcaung hum loeq caungpau a'mkha hoeiq lai. Caunghum khoeq caunglaenga thoen loeqteq caungpau khoeq mi yoeng a'siyai taeng a'hau haq. 18Yawhan loeq nei khakhut plau haqloeng khlaung haqla sa'diq laq uk loeqteq Boipaw pa'toeng ánhlaiqi ba lai tawiq ya sa'taung pawi a'hau haq. 19Yawhan loeq ba'yeinkhan Herouqwa khaw a'nau paeha Herawdiqa a'sim khoeq klong loeq a'coe pawi yaq khoeq hmuqlong haqloeng khaw a'plaet a'taung. 20Yaqklongoeng Herouq loeq Yawhan khoeq thonga khlawq loeqteq a'la pawi yaq khoeq hmuq haq a'sai tuba. 21Thonga a'klawq mawoeng Yawhan loeq khlaung haq thaengthaenga tuiyoeng hneitsein a'paek haq kho wa Boiyesuq khaw hneitsein khaumi loeqteq suq a'tongi kiyoeng mehon pa'wang loeqteq 22Cimcai muikhlaw khoeq wakho caw khut Boiyesuq hona a'kom. Mehona khoeq a'thai teq nang khoeq keiloeq ka'mkhaeki khoeq caw na'phlaet. Keiloeq nanga nana ka'mlatnauk taeng plau a'lo. 23Boiyesuq khoeq Boipaw hmuqlong mcaq loeq a'sai khoeq khinga a'sauk thumkip a'moeiq hni. Khlaung haq hmuqa yaqkhoeq Yawtaq caw phlaet loeqteq Yawtaq khaw Eliqcaw a'phlaet. 24Eliq khoeq Matat caw, Matat khoeq Lewiqcaw, Lewiq khoeq Melakhiqcaw, Melakhiq khoeq Yanaqcaw, Yanaq khoeq Yawtaq caw, 25Yawtaq khoeq Matatiqcaw, Matatiq khoeq Amouqcaw, Amouq khoeq Nahoucaw, Nahou khoeq Etaliqcaw, Etaliq khoeq Nagaecaw, 26Nagae khoeq Maatcaw, Maat khoeq Matatiqcaw, Matatiq khoeq Semiqcaw, Semiqkhoeq Yawtaq caw, Yawtaq khoeq Yudaqcaw 27Yudaq khoeq Yawhanaqcaw, Yawhanaq khoeq Yetaqcaw, Yetaq khoeq Zerubabelaq caw, Zeyubabelaq khoeq Salatelaqcaw, Salatelaq khoeq Neriqcaw, 28Neriq khoeq Melakhigcaw, Melakhiq khoeq Atdiqcaw, Atdiq khoeq Kawtancaw, Kawtan khoeq Elamawsancaw, Elamawdan khoeq Eraqcaw, 29Eraq khoeq Yawsuqcaw, Yawsuq khoeq Elayaezacaw, Elayaeza khoeq Yawroeicaw, Yawroei khoeq Matat caw, Matat khoeq lewiqcaw, 30Leiwiq khoeq Siqmaungcaw, Siqmaung khoeq Yudaqcaw, Yudaq khoeq Yawtaq caw, Yawtaq khoeq Yawnancaw, Yawnan khoeq Elyakoeicaw, 31Elyakoei khoeq Melecaw, Mele khoeq Maenancaw, Maenan khoeq Matataqcaw, Matataq khoeq Natancaw, Natan khoeq Dawoeiq caw, 32Dwoeiq khoeq Yesae caw, Yesae khoeq Awbaeqcaw, Awbaeq khoeq Bawzaqcaw, Bawzaq khoeq Calamoucaw, Calamou khoeq Nasou caw, 33Nasou khoeq A'minadapcaw, A'minadap khoeq Atmoeicaw, Atmoei khoeq Arancaw, Aran khoeq Hezaroucaw, Hezarou khoeq Pharaeqcaw, Pharaeq khoeq Yudaqcaw, 34Yudaq khoeq Yakoukkcaw, Yakouq khoeq Izaeqcaw, Izaeq khoeq Abarahancaw, Abarahan khoeq Teraqcaw, Teraq khoeq Nakhawcaw, 35Nakhaw khoeq Cerauqcaw, Cerauq khoeq Ragawcaw, Ragaw khoeq Phalaeqcaw, Phalaeq khoeq Hebacaw, Heba khoeq Salaqcaw, 36Salaq khoeq ka-iqnancaw, ka-iqnan khoeq Aphazeitcaw, Aphazeit khoeq Semaqcaw, Semaq khoeq Nawqecaw, Nawqe khoeq Lamaeqcaw, 37Lamaeq khoeq Matusalaqcaw, Matusalaq khoeq Enauqcaw, Enauq khoeq Yaraeqcaw, Yaraeq khoeq Ma'halelaqcaw, Ma'halelaq khoeq Ka-iqnancaw, 38Ka-iqnan khoeq Enouqcaw, Enouq khoeq Setaqcaw, Setaq khoeq Adancaw, Adan khoeq Boipaw caw a'phlaet.
Dewis Presennol:
Luke 3: ctpv-rv
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.