Rut 1
1
Elimeleke romo s'mai rasa aldeia Belem rae Israel la dia rae Moabe
1-2Muna nii hei tai dia kornel dia rae Israel, tuman-galan romo ta ukon atmoas Israel.
Dia muna nua la, dia atmoas sia galan Elimeleke. Ua atmoas Efrata, rasa aldeia Belem dia distritu Juda. Ua non hen galan Noemi#1:1-2 Dia liar-hu'un Ebreu, galan Elimeleke non signifikadu t'be, “Nai ta Kornel”, i galan Noemi non signifikadu t'be, “huar laran mloin”.. Romo dia anar mane ubun h'rua, galan Malon no Kilion.
Dia muna nua la, rae maram boten dia distritu Juda. Nua ta Elimeleke romo posi bali romo sian aldeia, ori la peni gini bau-bau'u dia rae Moabe, dia holan Jordaun dia parte lelo saen. 3Mais dia nua la Elimeleke mate, posi bali non kaben no anan romo mesa. 4Lau kahi, non anan mane hrua kaben no atmoas rasa Moabe. Malon kaben no hine sia galan Rut. No Kilion kaben no hine sia galan Orpa. Mais baipila romo peni dia nua la aben tonan sapulu sai. 5Noemi non anan mane hrua nua mos mate. Romo mate posi bali romo sian inar mesa: tai dia mane sia, tai dia anar, no tai dia ubur.
Noemi no Rut hali hali la Belem
6Baipila Noemi hei peni dia rae Moabe, ua rega tbe, “NAI Maromak nurat non atmoas dia distritu Juda, no dia nua la dia hali sanu an sai.” Entaun Noemi nua no non uma ubun hrua nua ploi sanu hatin e ori smai rasa rae Moabe ori hali la dia Noemi non uma dia non rae ru'uk. 7Noemi no non uma ubun hrua nua laa sai posi bali rae dia Moabe, bebei sala nee hali la Distritu Juda.
8Mais baipila romo sole tilu, Noemi to'u la non uma ubun hrua nua tbe, “Pere nua na! Mloin lau imbua hali la imin inar romo na. Pita imi tino kahi sai imin huar laran mloin mai aun anan nee mate kahi sai, no mos mai au. Nua ta au pege la NAI Maromak para tino mos Non huar laran mloin la imbua. 9Para NAI Maromak nee imbua mane selo nee huar laran mloin, Nua para imi moas no hakmatek.” No Noemi opar no me'u rombua, no romo mos sio makaas.
10Mais non uma ubun hrua nua tami, “Tain, amaa! Ami karak beibei amaa na, ori la moas lulu an no amaa non atmoas romo.”
11Mais Noemi tami, “Aun anan doben romo! Imi kala hali la ini! Tai dia helin sia, se imi bei bei au. Au tuman hine sai, au hei tai eto pita anar mane para buso-bairua e kaben no imi. 12Masik imbua pere aun anan ru'uk sai, mloi lau imi kala hali la ini. Pita au tuman sai, Nua nisi imi tai nurat tbe au e kaben hali. Au ru'uk tai nurat ua nua sai. Se dia lelobo nogo, au kaben no eto hali anar mane sia pita, imi nurat tau seba? 13Imi nurat imi e gini te'e anami'in romo boten no imi kaben no romo, ga? Tuan nua tain! Isi tau te imi tai gini pita, kahi imi kaben muna no mane selo. Nua susar, tua ka tain? Mais aun huar laran susar no pelun los lau imin. Pita au nurat NAI Maromak ru'uk ta kastigu au. Mloin lau imi srei bei-bei pita au.”
14Nua kahi romo ubun telu sio makas lau pita. No Orpa me'u non inbanin mori ori hali sai. Mais Rut opar magun non inbanin.
15Noemi to'u la ua, “Nae la! Orpa hali sai la non atmoas no hali la non lulin romo. O hali lulu no ua!”
16Mais Rut tami,
“Srei sakan, mais amaa srei su'u au hali.
No amaa srei obriga au la posi bali amaa mesa.
Pita au karak moas beibei luluan no amaa.
Amaa la dia naba, au mos la dia nua la.
Amaa peni dia naba, au mos peni dia nua la.
Amaa non atmoas hei smai mos aun atmoas.
No amaa no Nai Maromak hei smai mos aun Nai Maromak.
17Buso-bairua amaa mate dia naba, au mos mate dia nua la.
Atmoas tana amaa dia naba, atmoas tana au mos dia nu la.
Se au pahe agar no amaa,
NAI Maromak hei kastigu au.
So mate ta hei pahe itabua.”
18Baipila Noemi nae tbe Rut karak tau-tuan e bebei ua, ua tai dale pita.
19No romo bua sole trus, tee dia aldeia Belem.
Baipila hine ubun hrua nua te'e dia nua la, atmoas almamu gruan no romo. Hine romo rasa aldeia nua tugu dia agar no tou, “Nogo inaki'i Noemi, ga?”
20Mais Noemi tami la romo tbe,
“Imi srei mela pita au Noemi
pita galan Noemi tbe, ‘huar laran mloin’.
Mloin lau imi mela au Mara,
pita galan Mara tbe, ‘huar laran pelun’.
Pita NAI Maromak nee sigran tau-tuan tau aun moas smai pelun tuan.
21Muna, baipila au smai rasa rogo,
au hei teman, pita au dia lair no anar ubun hrua.
Mais agora NAI Maromak ori au hali,
au tai teman.
Pita basia imi mela au ‘Noemi’,
se NAI kastigu au?
Pita NAI ta sigran tau-tuan.
No NAI ta tau susar sia nogo mai au.”
22Sia nogo ta istori baipila Noemi hali rasa rae Moabe no non uma ubun Rut, atmoas Moabe nogo. Rombua tee dia rae Belem, natoon dia tempu lobu trigu ain.
Dewis Presennol:
Rut 1: BKMK
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Wycliffe Timor-Leste © 2025 Wycliffe Bible Translators Inc