GENESIS 18
18
Abrahama hnêna fapa pêk tiam
1Mamre-a sasaw bula a puan in kawngkaah, chhûn ni sat lai takin Abrahama chu a ṭhu a, a hnênah Lalpa chu a rawn inlâr a. 2A han en chuan a bul maiah mi pathum an lo ding reng a; a han hmuh veleh chuan anni chu lâwm tûrin puan in kawngka ata chu a tlân chhuak a. Kûnin chibai a bûk a,#Heb. 13:2. 3“Ka pu, min khawngaih la, i chhiahhlawh hi min kal pêl lo hrâm teh. 4Tui tlêm han la ila, in kete sil ula, thing hlimah hian châwl rih teh u. 5In chhiahhlawh in rawn tlawh ta sa sa, chhâng tlêm ka han lâk ang che u a, in intiharh dâwn nia; chumi zawhah chuan in kal zêl a ni ang chu,” a ti a. “Chuti chu, i sawi ang chuan ti ta che,” an ti a.
6Abrahama chu puan inah a tlân lût a, Sari chu a ko va, “Chhangphut ṭha chi ṭîn khat la chhuak la, hmet la, chhangpêr siam thuai teh” a ti a. 7Abrahama chu bâwng rual awmnaah a tlân a, bâwngno chum thau tak a man a, chhiahhlawh a talhtîr a, a kang hmin ta thuai a. 8Bâwngsa kan chu bâwnghnute leh a dak nên a rawn la a, an hmaah a hlui a; an ei a, ani pawh chu an bulah, thing hlimah chuan a ding reng a.
9Anni chuan a hnênah, “Khawnge i nupui Sari a awm?” an ti a. “Puan in chhûngah hian,” a ti a. 10Pakhat chuan, “Thla kua#18:10 ‘nun insiam zawh hun’ tih a ni. a ral hunah ka lo kal leh ang a, i nupui Sari hian fapa a hring ang,” a ti a. A hnung maiah, puan in luhna phênah Sari chuan a lo ngaithla reng a. #Rom. 9:9. 11Abrahama leh Sari chu tar tawh tak, upa tak an ni; Sari pawh hmeichhe dân pangngaiin a awm tawh lo. 12Sari chu a nuih a za a, “Kei tarzûr tawh hian ka pasal ka la thlahlel ang maw, ani pawh a upa hle tawh si?” a ti rilru a. #1 Pet. 3:6. 13Lalpa chuan Abrahama hnênah, “Engtizia nge Sari nuih a zata, ‘Ka tar tawh vei nên fa ka la nei tak tak ang maw?’ a tih? 14Lalpa tân tih theih loh a awm em ni? Thla kaw ral hnuah ka lo kal leh ang a, Sari hian fapa a lo hring tawh ang,” a ti a. #Lk. 1:37. 15Sari chuan a hlau va, a pha chung a, “Ka nuih a za lo ve,” a ti a. Ani chuan, “I nuih a zat kha le!” a ti a.
Abrahaman Sodom khaw tân a ngên
16Chûng mite chu chuta ta chu an tho va, Sodom khaw lam chu an zu thlîr a. Thlah tûrin Abrahama pawh an rualin a kal ve a. 17Lalpa chuan, “Ka thiltih tum hi Abrahama lakah ka zêp ang em aw? 18Abrahama hi hnam lian, hnam ropui tak a la ni ngei dâwn a, khawvêl hnam zawng zawngin mal insâwmsak nân tak ani hi an lam dâwn a. 19A fate leh a thlah zêlte Lalpa duhzâwnga awma, thil ṭha leh thil dik zirtîr tûrin ani hi ka thlan chhuah a ni si a. Lalpa chuan Abrahama hnêna a thutiam chu a tihlawhtling ngei dâwn si a,” a ti a ni. 20Tin, Lalpa chuan, “Sodom leh Gomora khaw sual thu leh an thiltih râpthlâk thu ka beng a lo thleng hi a dik tak tak em tih en tûrin 21ka chhuk dâwn a ni, ka zu hre chiang teh ang,” a ti a.
22Mite chu Sodom khuaa kal tûrin an chhuk ta a. Abrahama erawh chu Lalpa bulah a ding khawtlai#18:22 Pathian meuh mihring ngaichânga ding khawtlaia sawi âwm loh an ti a, Abrahama zâwk hi ding khawtlai chu tia sawi niin a lang. a. 23Abrahama chuan a hnaih a, “Mi sualte zînga awm mi ṭhate pawh chu i tiboral tel dâwn em ni? 24Khuaah chuan mi ṭha, mi pawi khawih lo sawmnga awm sela, chûng mi ṭha sawmngate avângin khawpui chu zuah lovin i tichhia ang maw? 25Mi ṭhate leh ṭha lote tuar inang rengin mi ṭhate chu mi sualte nên i tiboral êm lo vang chu! Lei chung zawng zawnga thuneitu, nang meuh chuan dik lo takin thil i ti âwm si lo va,” a ti a.
26“Sodom khuaah mi ṭha sawmnga ka hmuh chuan anmahni avângin khua chu ka zuah ang,” a ti a. 27Abrahama chuan a sawi leh a, “Kei vaivut leh meivâp mai hian Lalpa chu ka be pawp ta sa sa si che a, 28mi ṭha pangain sawmnga tling lo ta sela? Pangaa an tlin loh avângin khaw pum chu i tichhia ang maw?” a ti a. “Mi sawmli leh panga ka hmuh chuan ka tichhe lo vang,” a ti a. 29A la zâwt ta zêl a, “Mi sawmli chauh awm sela?” a ti a. “Mi sawmli avâng pawhin ka tichhe lo vang,” a ti a. 30“Ka sawi zêl pawhin Lalpa chuan ninawm ti teh suh se, mi sawmthum chauh lo awm sela?” a ti a. Ani chuan, “Mi sawmthum chauh pawh hmu ila ka tichhe lo vang,” a ti a. 31“Lalpa chu ka zâwt ta law law che a, sawmhnih chauh awm sela?” a ti a. 32Ani chuan, “Mi sawmhnih avâng pawh chuan ka tichhe lo vang,” a ti a, a chhâng a. “Lalpa chuan lung lovah neih teh suh se, hei bâk hi chu ka zâwt tawh lo vang che, mi sâwm chauh awm ta sela?” a ti a. “Chûng mi sâwmte avâng pawh chuan ka tichhe lo vang,” a ti a.
33Abrahama nên an inbiak zawh chuan Lalpa chu a kal ta a. Abrahama pawh a in lamah a kîr leh ta a.
Valgt i Øjeblikket:
GENESIS 18: MIZCLBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.