Luka 14
14
Tō Iēsū 'akaora'anga i tēta'i tangata maki
1E tae akera ki tēta'i Sābati, 'aere atura a Iēsū ki roto i te 'are o tēta'i tangata mana o te au Phārīsea ē kai i te kai, tē 'ākara matariki maira rātou i aia. 2Ē inā, tei mua i tōna aroaro tēta'i tangata kua tū'ia e te kō'ao. 3Kua ui atura a Iēsū ki te au Pū'āpi'i Ture ē te au Phārīsea, nā kō atura, “'E mea tika āina i te 'akaora i te maki i te rā Sābati, mē kāre āina?”
4Kāre rā rātou i kī mai. Kua rave atura aia i taua tangata maki ra, 'akaora atura, e tuku atura kia 'aere. 5#Māt 12.11Ē kua ui atura aia ki a rātou, nā kō atura, “Ko 'ai i a kōtou na ē, kāre e totō vave mai i tāna tamaiti ki runga, mē kāre ra tāna puakatoro, kia topa ki roto i te va'aruā vai i te rā Sābati?”
6Ē kāre atura i rauka i a rātou kia pāto'i mai i tāna tuatua'anga ra.
Te tū 'aka'aka ē te tū tākinga meitaki
7E kite atura a Iēsū i te au manu'iri i te 'aka'ape'ape'anga kia riro i a rātou te ngā'i ngāteitei i te kaingākai ra, kua taki atura aia i tēta'i parabole ki a rātou, nā kō atura, 8#Mase 25.6,7“Mē pati'ia mai koe e 'aere ki te 'ōro'a 'akaipoipo'anga, auraka e no'o i te kaingākai ki te ngā'i ngāteitei. Ko tē pati katoa'ia atu ā'ea tēta'i tangata tao'i'au ma'ata atu, 9ē ko tē 'aere atu 'oki taua tangata i pati mai i a kōrua ra, ē tē tuatua atu ki a koe, ‘Ka tuku mai i tēnā na ngā'i ki tēianei tangata,’ ē ko tē 'aere 'akamā 'ua atu 'oki koe ki te ngā'i 'aka'aka. 10Inārā, kia pati'ia koe ra, e 'aere 'ua atu ki te ngā'i 'aka'aka. Ē kia tae mai te tangata i pati mai i a koe ra, ka nā kō maira ki a koe ē, ‘E tama, e 'aere atu koe ki runga atu.’ E 'akangāteitei'ia atura koe ki mua i te aroaro o te aronga e no'o katoa i te kaingākai ra. 11#Māt 23.12; Luk 18.14Ko tei 'akateitei i aia 'ua'orāi ka tā'aka'aka'ia ia; ē tei tā'aka'aka i aia 'ua'orāi ka 'akateitei'ia ia.”
12Kua tuatua atura a Iēsū ki aia i pati mai i aia ra, “Kia 'akatupu koe i te kaingākai avatea ē te kaingākai a'ia'i, auraka e pati atu i tō'ou au 'oa ra, ē tō'ou puna tikāi, ē tō'ou kōpū tangata, ē te aronga tangata tupu 'apinga nui ra. Ko tē pati katoa mai ā'ea rātou i a koe, ka tūtaki'ia mai ā'ea koe. 13Kia 'akatupu rā koe i te umukai, ko te tangata rikiriki tē pati atu, ko te pirikoki, ko te 'akangoru, ko te matapō. 14Ē 'e ao tō'ou i reira. Kāre 'oki ā rātou kia tūtaki mai i a koe. E tūtaki'ia mai 'oki koe kia tae ki te tū'aka'ou'anga o te aronga tuatua tika.”
Te parabole o te kaingākai ma'ata
(Mātaio 22.1-10)
15Ko tēta'i o te au manu'iri i 'akarongo mai i tā Iēsū tuatua ra, kua nā kō maira ki aia, “'E ao tōna tō tei kai i te mānga i te bāsileia o te Atua ra.”
16Kua pa'u atura a Iēsū ki aia, “'E kaingākai ma'ata tā tēta'i tangata ē kua pati atura aia i te au tangata 'e mānganui. 17E tae akera ki te ora e kai ei ra, kua tono atura i tōna tāvini e tiki i taua aronga i pati'ia ra, ‘E 'aere mai, kua papa te au mea kātoatoa.’ 18Kua 'akamata atura rātou rava rāi i te kōto'e 'aere mai. Kua nā kō maira te tangata mua, ‘I 'oko ana au i tēta'i kāinga, ka 'aere ana au e 'ātoro e tikāi. Kia tuku'ia ake au e koe.’ 19Kua tuatua maira tēta'i, ‘I 'oko ana au i te puakatoro e ta'i nga'uru, ē tē 'aere nei au e tāmata. Kia tuku'ia ake au e koe.’ 20Kua tuatua maira tēta'i, ‘Koi 'akaipoipo 'ua ake nei au i te va'ine, kāre 'oki au e tika kia 'aere.’
21“I te 'oki'anga mai taua tāvini ra, kua 'akakite maira i taua au tuatua ra ki tōna pū. Riri akera te pū o te 'are, ē kua 'akaue atura ki tōna tāvini, ‘E 'aere viviki ki te au mataara ē te au arāta'a i te 'ōire nei, e arataki mai ki konei i te tangata rikiriki, te pirikoki, te 'akangoru ē te matapō.’ 22Kua tuatua maira taua tāvini ra, ‘E te 'Atu, kua oti ake nei tā'au i 'akaue mai nei, ē tē vai 'ua nei rāi te ngā'i.’ 23Kua 'akakite atura taua pū ra ki tōna tāvini, ‘E 'aere koe ki runga i te au ara tīroa ē te au pae koro ra, e mānono tika atu ei i aua tū tangata ra kia 'aere mai kia kī rava tōku 'are. 24E 'akakite atu 'oki au ki a kōtou, kāre rava tēta'i i taua aronga i pati'ia ra e tongi iti 'ua ake i tāku nei kaingākai.’ ”
Te 'apainga teia'a o te tūranga pipi
(Mātaio 10.37-38)
25'E urupū ma'ata tei āru 'aere mai i a Iēsū. Ē kua 'āriu maira aia, kua tuatua maira ki a rātou, 26#Māt 10.37“Mē āru mai tēta'i tangata i āku, ē kāre e mākitakita i tōna metua tāne, tōna metua va'ine, tāna va'ine, tāna au tamariki, tōna au tungāne ē tōna au tua'ine, ē tōna katoa 'ua'orāi ora, kāre aia e riro 'ei pipi nāku. 27#Māt 10.38; 16.24; Mār 8.34; Luk 9.23Ē tēta'i 'ua atu tei kore e 'apai i tōna 'ua'orāi sātauro ē ka āru mai ei i āku, kāre aia e riro 'ei pipi nāku.
28“Mei te mea ē, tēta'i i ō kōtou na, kia 'akakoro e 'akatū i tēta'i 'are teitei, kāre āina aia ē nā mua i te no'o ki raro, ka tatau ei i te moni te ka pou i aia e oti ei, kia kite aia mē ka rava tāna moni? 29Ko tē tuku ā'ea aia i te tango ki raro, ē kāre akera e oti i aia, e riro 'oki te tangata kātoatoa i 'ākara i te 'āviri i aia, 30nā kō maira, ‘I tāmata i'o nei tēianei tangata i te 'akatū i te 'are, ē kāre ake nei e oti i aia!’
31“Mē kāre ra, ko 'ai 'oki ia ariki kia 'aere aia e tamaki atu ki tēta'i ariki, kāre āina aia ē nā mua i te no'o ki raro, ka 'akaea+atu mārie ei, mē ka rauka i aia ē tōna aronga tangata 'okota'i nga'uru i te tauatini, kia 'akaū atu aia i tēta'i tei 'aere mai e tamaki i aia ra ma tōna au tangata e rua nga'uru i te tauatini? 32Mē kāre e rauka i aia, ka tono atu aia i te karere koi vai ātea kē ei tēta'i ē ka pati atu i te rāvenga nō te 'au. 33Koia katoa 'oki kōtou, ko tei kore i 'akaruke i tāna au mea katoa ra, kāre aia e riro 'ei pipi nāku.”
Te miti pu'apingakore
(Mātaio 5.13; Māreko 9.50)
34'E mea meitaki te miti. Kia riro rā te miti 'ei mea māngarongaro, 'e a'a atura te mea e kavakava ai? 35Kāre e meitaki nō te one, ē kāre 'oki nō te tāruta tītā; e titiri rava'ia rā. 'E taringa tōna 'ei 'akarongo ra, e 'akarongo aia.
Valgt i Øjeblikket:
Luka 14: CIMRNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Cook Island Maori Revised New Testament © Bible Society of the South Pacific, 2021.