Bɛ̈n 16
16
Mana kekë Dhuööl ë Thɔ̈rɔ̈ɔ̈l
1Na ɣɔn, ke akutnɔm de kɔc ke Yithriɛl ëbɛ̈n ë ke jël në Elim kedhie. Na kööl ye pɛɛi ye pɛ̈i rou thok thiëër ku dhïc, pɛ̈i ɣɔn jël kek Rip, ke ke ɣet jɔ̈ɔ̈r ë Thin, jɔ̈ɔ̈r nu në kaam ë Yilim kekë Thinai. 2Na wën, ke akutnɔm de kɔc ke Yithriɛl ë ke dok në Mothe kekë Aron në jɔ̈ɔ̈ric ëtɛ̈ɛ̈n. 3Ku luelkï an, “Aŋuɛ̈n na Bɛ̈nydït ë cï wo nɔ̈k ë Rip. Adï cuëtku në rïŋ, ku ciëmku në kuïïn cït kë kɔɔr ë piɔ̈nda. Ke we bïï wo bei në ee jɔ̈ɔ̈rë yic bäk amatnɔm ëbɛ̈n bɛ̈n nɔ̈k në cɔk.”
4 #
Jɔn 6:31. Na wën, ke lëk ë Bɛ̈nydït Mothe an, “Wek bä aa wɛ̈ɛ̈r kuïn nhial aköölnyïïn. Ku kɔc abïk aa kuany në kuïïn bï ke lëu në ee köölë yetök. Yen abän keek jɔ them na bïk lööŋkï döt. 5Ku në kööl ye akööl dhetem, abïk kë cït kë yek nööm në kööl tök aa nööm raan rou. Ku kïïtkï kenyïïn në kuën ë kɔc ke baai.”
6Na wën, ke lëk ë Mothe kekë Aron kɔc ke Yithriɛl kedhie an, “Abäk jɔ ŋic alë thëën nɔn yen Bɛ̈nydït Yen ë bïï we bei Rip. 7Miäk we bï dhuëëŋ ë Bɛ̈nydït tïŋ, në luɔi cï yen dokdun piŋ, dok duɔk wek në weyäc në Bɛ̈nydït. Ɣɛɛ, ë yic wek ë dok në yeguöp. Na wook, ee lööŋke tei kek yok luɛɛl.” 8Ku lueel ë Mothe an, “Ee Bɛ̈nydït Yen abï we aa miɔɔc në rïŋ thëën, ku miɔɔc we në kuïn cït man ë kë kaarkï, në biäk cï Yen piŋ. Ku ë yic të duɔk wek në wook, ka wek dok në Bɛ̈nydït.”
9Go Mothe lɛ̈k Aron an, “lɛ̈kë akutnɔm de kɔc ke Yithriɛl kedhie, ë ke bï bɛ̈n kɔ̈ɔ̈c në Bɛ̈nydït nɔm, në baŋ cï Yen dokden piŋ.” 10Na wën aa jam Aron kekë akutnɔm de kɔc ke Yithriɛl, gokï kenïïm wɛl ë jɔ̈ɔ̈ric. Go dhuëëŋ ë Bɛ̈nydït guɔ tuöl ëthiäu në luätic. 11Ku lëk ë Bɛ̈nydït Mothe an, 12“Yɛn ë dok de kɔc ke Yithriɛl piŋ. Abïk aa cuet në rïŋ thëën, na miäk adurduur ke ke cäm në kuïn cït man ë kë kɔɔrkï, ke bïk ŋic nɔn Yan Bɛ̈nydït Nhialicden.”
13Na ɣɔn thëën, ke dhuööl ë thɔ̈rɔ̈ɔ̈l ë bɔ̈ piny nhial man abïï pɛɛny kum. Na ɣɔn amiäk, ke thäc ë geeu pɛɛny piny. 14Na wën aa dëu thäc, ke këthiin yem ë dɔ̈ŋ ë tiɔp nɔm ë jɔ̈ɔ̈ric. Kë täc cït man ë kɔɔi ë deŋ. 15#1 Kor 10:3. Na wën, aa tïŋ ë kɔc ke Yithriɛl en ke cïkï ŋic, agokï röt aa luɔp kapäc an, “Eeŋö ë kënë?”
Go Mothe lɛ̈k keek an, “Ee yen kuïn cïï Bɛ̈nydït gäm week ka an bäk aa cam. 16Acïï Bɛ̈nydït lueel an ŋɛk ë ye rɔt kuɛ̈ny këdɛn bï ye lëu, ku ŋɛk ë ye omer nööm ke ye këde raan tök (omer ee kë cït lööth kaarou), ku ë thööŋ kenyïïn në kuën ë kɔc ke baaide.”
17Go kɔc ke Yithriɛl ye looi, kɔc kɔ̈k nömkï ka juëc, ku kɔ̈k nömkï ka lik. 18#2 Kor 8:15. Na wën aa themkï keek në omer (löth) ke kɔc wën cï ka juëc nööm acïn këdɛn cï bɛ̈n döŋ piny, ku kɔc wën cï ka lik nööm acïn këdɛn cï bɛ̈n dak. Ŋɛk ë kë bï ye lëu bɛ̈n aa nööm. 19Go Mothe lɛ̈k keek an, “Cïn raan lɔ dɛk kë buth miäk.” 20Ago kɔc kɔ̈k jam ë Mothe cuök piŋ, gokï biäk both. Na ɣɔn amiäk, ke ke ŋuäc ku pët ë ruöi keek. Go Mothe piɔ̈u diu ke keek. 21Kɔc aake ye kë bï ke lëu lɔ kuany aköölnyïïn kedhie, ku kë cï döŋ piny aaye lɛ̈ɛ̈ŋ të cïï akɔ̈l ruɛl.
22Ku në kööl ye akööl dhetem, ke ke kuany kë cït kë yek kuany në akööl kɔ̈kë yiic raanrou. Raan tök aaye kuɛ̈ny omer kaarou (lööth kaŋuan). Go bäny ke akutnɔm de Yithriɛl lɔ tëde Mothe kedhie lek lɛ̈k ee kënë. 23#Bɛ̈n 20:8-11. Go Mothe lɛ̈k keek an, “Acïï Bɛ̈nydït lueel an miäk ee kööl de Thabath ɣeric, köölde. Thalkï ka kaarkï ë thät, ku piäärkï ka kaarkï ë piëër, na de kë cï döŋ ke täukï miäk.” 24Na wën acïï Mothe lɛ̈k keek aya, acïk kë cï döŋ bɛ̈n täu miäk. Ku akënkï bɛ̈n riääk, ku acïn ruöi cï ke bɛ̈n pët. 25Go Mothe lueel an, “Camkï kake ee köölë, në luɔi yen kööl ë Thabath, ee kööl ë lɔ̈ŋ, kööl ë Bɛ̈nydït, ka acïn këcam bäk yök në pɛɛny lɔ̈m. 26Wek bï këcam aa kuany në nïniic kadhetem, na kööl ë dhorou, kööl ë Thabath, acïn këcam bäk aa yök.”
27Ku kɔc kɔ̈k cï lɔ an lek kuany në kuïïn në kööl ë dhorou, ago ciën kë yökkï. 28Go Bɛ̈nydït lɛ̈k Mothe an, “Bäk lööŋkï jɔ rɛɛc gam agut cï nɛn? 29Ŋiɛckï nɔn ee Yɛn Bɛ̈nydït, ee Yɛn ë gëm week kööl ë Thabath. Ka yen a Yan week gäm këcam de akööl kaarou në kööl ye akööl dhetem. Raan ëbɛ̈n në weyiic ë ye rëër baaide në kööl ë dhorou, ke cïn të le yen thïn. 30Go cuö ee luui në kööl ë dhorou.”
31 #
Kuɛ̈n 11:7,8. Go baai de Yithriɛl kuïn cäk an mana#16:31: mana: Jamë acït jam de Ɣeberuu an “eeŋö ë kënë?” (Tïŋ cöök 15). (an eeŋö ë kënë?) Aa ye kuïn ɣer nyin cït man ë mïth ke kedhbera. Ku amit cït man ë bethkawith ë loi në kiëc. 32Go Mothe lɛ̈k keek an, “Acïï Bɛ̈nydït lueel an tɛ̈uku mïthkuɔ biäk ë mana, mïth bï lɔ̈ɔ̈k bɛ̈n wadäŋ ke bïï kek kuïn tïŋ, kuïn ë gëm ë Bɛ̈nydït wook në jɔ̈ɔ̈ric ɣɔn bïï en wo bei paan ë Rip.” 33#Ɣeb 9:4. Go Mothe lɛ̈k Aron an, “Nöm töny, ku yiëkë yic lööth ke mana kaarou, ku tääuwë në Bɛ̈nydït nɔm ke bï dɔ̈t mïth bï lɔ̈ɔ̈k tɔ̈u wadäŋ.” 34Cït man cïï Bɛ̈nydït e lɛ̈k Mothe, acïï Aron en bɛ̈n tääu në cäätɔ nɔm tueŋ ke bïï döt. 35#Joc 5:12. Go kɔc ke Yithriɛl mana cam në runiic kathiërŋuan man abïk ɣet piny ë Kanaan tëdɛn wään cï kek bɛ̈n lɔ piɔ̈ɔ̈t thïn. 36Ku omer ade yic lööth kaarou.
Valgt i Øjeblikket:
Bɛ̈n 16: dip-JPB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Bible in Jieeng de Padang © The Bible Society in South Sudan, 2011.