Bɛ̈n 5
5
Mothe kekë Aron në Melik ë Rip Nɔm
1Go Mothe kekë Aron lɔ tëde melik ë Rip, lek lɛ̈k en an, “Acïï Bɛ̈nydït lueel, Nhialic de Yithriɛl an, ‘Tɔ kɔckï jäl, lek dhuëëŋ bïï kek Ɛn näk looi ë jɔ̈ɔ̈ric, dhuëëŋ bï Ɛn miët piɔ̈u.’ ”
2Go melik puk nɔm an, “Bɛ̈nydït eeŋa, ka yɛn duëër jamde jɔ piŋ, ku ta kɔc ke Yithriɛl jäl? Yɛn kuc Bɛ̈nydït, ku kɔc ke Yithriɛl acä ke bï tɔ jäl.”
3Go Mothe puɔ̈k nɔm en kekë Aron an, “Nhialic de Ɣeberuu acï rɔt nyuöth wook, ka yïn pälë wo nïn kadiäk bïï wok cath ë jɔ̈ɔ̈ric, ke wo bï Bɛ̈nydït Nhialicda lɔ näk. Të kën wok E lɔ näk, abï wo nɔ̈k në jɔɔk ku nɔn yen tɔŋ.”
4Go melik puɔ̈k nɔm keek an, “Eeŋö cäk tak, nɔn ja wek kɔc tɔ päl luɔiden? Dakkï wenïïm në luɔɔidunic. 5Wek ë juëc awär kɔc ke Rip, ka akaarkï bäk kɔc tɔ päl luɔi.”
6Ku ee kööl manë guöpde, melik ë bäny ke Rip bɛ̈n yɔ̈ɔ̈k, bäny yɔŋ kɔc ke Yithriɛl, ku yöök kɔc ke Yithriɛl cï tääu në lïïm nïïm an, 7“Duökï lïïm be gäm anin looi kek thoop. Pälkï ke alɔ aninden kɔɔr kapäc. 8Ku takï ke loi kuën cït kuën yek looi ë caŋawään. Na cakaa thom tök ë cïï dak. Acïn luɔi dïït loikï, yen aye kek cool ë lueel kek en an, ‘Tɔ wo jäl lok Nhialicda näk.’ 9Gämkï ke luɔɔi tuc, ke ke bï ya luui ë cieŋ ke ke cïï lueth bï bɛ aa piŋ.”
10Ago bäny ke lïïm jäl, mɛ̈tkï në kɔc ke Yithriɛl cï tääu në lïïm nïïm, lek lɛ̈k kɔc ke Yithriɛl an, “Acïï melik lueel an cïï we bï bɛ aa yiɛ̈n anin. 11Në yen aa bäk anindun aa kɔɔr wapäc alɔ të bä wek en lɔ yök thïn. Ku we bï ŋoot ke we ye kuën ë thoop looi cït man wään ya wek en looi ë caŋawään.” 12Ago kɔc thiëi Rip ëbɛ̈n lek anin kɔɔr. 13Ku aaye bäny ke lïïm keek rɛ̈liic an, “Thɔ̈lkï luɔi, luɔikï kuën cït kuën wään yak kɔn looi, wään ye we yiɛ̈n anin.” 14Go bäny ke lïïm kɔc ke Yithriɛl cï tääu ë lïïm nïïm dui, ku lëkkï keek an, “Eeŋö kɛ̈n wek kuën ë thop cït kuën wään tueŋë looi?”
15Ago kɔc ke Yithriɛl cï tääu ë lïïm nïïm gööny në melik nɔm an, “Eeŋö lui yïn wook ee kënë, bɛ̈ny? 16Anin acie bɛ gäm wook, ku aye lɛ̈k wook an loiku thoop. Wok cï dui, ku ee yïn ade ee kënë ëbɛ̈n.”
17Go melik puk nɔm an, “Wek liriic, wek cïï luɔɔi kɔɔr. Yen aya wek e lueel an, ‘Tɔ wo jël lok Bɛ̈nydït näk miɔ̈c.’ 18Dakkï wenïïm ë luɔɔi yic ënɔɔnë? Acïn anin bï ya gäm week, ku wek bï kuën ë thoop wään yak looi aa ŋoot ke luɔikï.” 19Ago kɔc ke Yithriɛl cï tääu ë lïïm nïïm ye ŋic nɔn cï kek lɔ në wëliic, nɔn cïï ye lueel an bïk kuën cït kuën wään aa ŋoot ke loikï aköölnyïïn ëbɛ̈n.
20Na wën aa bïk bei tëde melik, ke ke yök Mothe akääc kekë Aron ke ke tiit kɔc ɣöt. 21Agokï lɛ̈k Mothe kekë Aron an, “Bɛ̈nydït ë kë cäk looi tïŋ, ku abï we luöi këtuc, në luɔi cä wek melik tɔ man wook kekë bänyke. Acäk keek gäm kueer bï kek wo nɔ̈k.”
Mothe Agööny Bɛ̈nydït
22Ago Mothe yenɔm bɛ puɔ̈k Bɛ̈nydït, ku lëk En an, “Bɛ̈nydït, eeŋö looi Yïn kɔcku arac? Ka eeŋö tuuc Yïn ɛn eenë? 23Të cän ajam wokë melik në këdu, melik ee kɔc jɔ luööi arac. Ku acïn kë cï looi kony Yïn keek!”
Valgt i Øjeblikket:
Bɛ̈n 5: dip-JPB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Bible in Jieeng de Padang © The Bible Society in South Sudan, 2011.