Oyinyima 11
11
Irehi ọgọdọ ana a ka à da tụ́ Ịbabịrọnị
1Ịnị ịyẹẹyẹ avaba anẹhẹ vị ana aa kà ẹkụra ikonya. Ẹ yị nyị irenyi ịnị ịrẹyị ẹnịnị. 2Ịnị ụmẹ ọnọọ aza ẹnyị ệ kụ̀rà hụrẹ eyi ọnị ọyịị̄ zịị vẹ di e ne tù ọnya ịnị ẹtẹ Isinari nị. Dị ẹnịnị yà ịzọọ nị. 3Ẹkụhị ọnya kẹnẹ dị ẹ hị́ ẹngụ dị ẹ ka, “À vẹ dị ẹnị ẹ̀ jị ụvụrọkụ dị ẹnị ẹ̀ hù ọ ẹtẹẹtẹrẹ dị ọ̀ vẹchị.” Ịzẹyịza dị ẹ vavọọ jị ụvụrọkụ ana a vọrọ ka ẹ̀ sị dà irehi, anka a mẹẹ sị ịrẹta dà irehi avọọ nị. Dị ẹ rẹ sị ọda ẹnị ẹ vaa sị kụ́ ụvụ ọnọọ gẹ nị, anka a mẹẹ sị Isementii kụ́ irehi gẹ avọọ nị. 4Dị ẹ hị́ ẹngụ dị ẹ ka, “À vẹ ẹnị ẹ̀ dà ẹkụra ẹnịnị, di ẹnị ẹ̀ dà irehi ọgọdọ ọnya tụ́ ọ dị ọ̀ gọdọ na ngụ ịnị ihinẹba. Di aa sị ọnọọ hị́ ịrẹha ẹnịnị. Ẹ ka à yị vị avọọ vị ẹnị aa garaa hi ẹhẹ kẹnẹ nị.” 5Di Ẹnẹyịmavara chi vẹ di o ve re ẹkụra ọnọọ ọnịrị irehi ọgọdọ ana aza ẹnẹẹ dà nị. 6Di Ẹnẹyịmavara kà: “Aza ẹnẹnị vị ọnya, dị ẹ rẹ yaa kà ẹkụra ọnya nị. Ịsị ẹ vaa mẹ̀ ẹ yaa dà ahụụ hụrẹ ẹhẹ aanị nị. Òo nee kú ẹ yị nyị ịsị ẹ ka ẹnị aa mẹ dị ẹ̀ yị mẹ̀ ẹ. 7Ọ kà vẹ eni è chi ne tụ́ wa, dị ẹnị ẹ̀ và ẹkụra ẹnị ẹ yaa kà zị dị asị ẹ kụkụ wụ́ ịrẹyị ẹngụ.” 8Ịzẹyịza di Ẹnẹyịmavara gara wa hụụ ịzọọ hi avaba ẹhẹ nị. Dị ẹnịnị ẹ̀ yị kụkụ dà ẹkụra ọnọọ nị. 9Agụvị avọọ aā hị́ ẹkụra ọnọọ Ịbabịrọnị nị, agụvị ka ịzọọ Ẹnẹyịmavara yà kụ́ ẹvazi ngụ ẹkụra ana anẹhẹ aa kà nị. Hụrẹ ịzọọ a yà gara wa hi avaba ẹhẹ nị.
Ụnanka Ịsẹmị
(1 Ịtọ 1.24-27)
10Aza ana chi hụụnị ịpa Isemi vẹ m maa vaa hị́ aanị nị. Ịsẹmị vị ịrayị ẹchẹhị (100) dị ọ ma Aripakisadi Ịnị ịrayị ọhụva ọnị ọhaara enyi kụ́ ẹhẹ ọ yà ma a nị. 11Isemi mẹ̀ sị Aripakisadi ma, ộ vana ra ẹhẹ mẹ ịrayị akanarẹchẹhị, (900) dị ọ vana ma ezi anọrụ ọnịrị anẹẹ nị. 12Aripakisadi mẹ̀ sị gụ ịrayị ohurẹẹwụ tụra ẹẹhị (35) dị ọ ma Ịsẹẹra nị. 13Ịrẹma ọnị ọ si Ịsẹẹra ma, Aripakisadi ọ vana mẹ ịrayị akana tụra ẹẹta, (83) dị ọ ma ezi anọrụ ọnịrị anẹẹ nị. 14Ịsẹẹra ọnị mẹ̀ sị gụ ịrayị ohurẹẹwụ, (30) dị ọ ma Ẹba nị. 15Ịsẹẹra mẹ̀ sị Ẹba ma, ọnị ọ rẹ vana yà ịnị ẹhẹ mẹ ịrayị akana tụra ẹẹta, (83) dị ọ rẹ vana ma ezi anọrụ ọnịrị anẹẹ nị. 16Ẹba ọnị mẹ̀ sị gụ ịrayị ohurẹẹwụ tụra ẹẹna (34) dị ọ ma Ịpẹrẹgị nị. 17Ịrẹma ọnị ọ ma Ịpẹrẹgị, Ẹba ộ vana ya ẹhẹ mẹ ịrayị akana tụra ohurẹẹwụ, (830) dị ọ rẹ ma ezi anọrụ ọnịrị ezi anẹẹ nị. 18Ịpẹrẹgị ọnị vị ịrayị ohurẹẹwụ (30) dị ọ ma Irewu. 19Ịpẹrẹgị ọnị mẹ̀ rẹ si Irewu ma, ộ vana ra ẹhẹ mẹ ịrayị ịrẹka tụra ịhịịna, (209) dị ọ vana ma ezi anọrụ ọnịrị anẹẹ nị. 20Irewu mẹ̀ sị gụ ịrayị ohurẹẹwụ tụra ẹẹva (32) dị ọ ma Iserugu nị. 21Ọ mẹ̀ sị Iserugu ma, Irewu ộ vana ra ẹhẹ mẹ̀ ịrayị ịrẹka tụra ịhịmba, (207) dị ọ vana ma ezi anọrụ ọnịrị anẹẹ nị. 22Iserugu mẹ̀ sị gụ ịrayị ohurẹẹwụ (30) dị ọ ma Inahọ̀ nị. 23Iserugu mẹ̀ sị Inahọ̀ ma, ộ vana ra mẹ ịrayị ịrẹka, (200) dị ọ vana ma ezi anọrụ ọnịrị anẹẹ nị. 24Ịnahọ̀ mẹ̀ sị gụ ịrayị oohu tụra ịhịmba, (27) dị ọ ma Ịtẹra nị. 25Inahọ̀ mẹ̀ sị Ịtẹra ma, ộ vana yà ẹhẹ mẹ ịrayị ẹchẹhị tụra ẹwụrịhịmba, (117) dị ọ vana ma ezi anọrụ ọnịrị anẹẹ nị. 26Ịtẹra mẹ̀ sị gụ ịrayị ẹtarẹwụ, (70) dị ọ ma Abụramị, Ịnahọ̀ ọnịrị Ịharanị.
Ụnanka Ịtẹra
27Aza ana chị hụụnị ịpa Ịtẹra m maa vaa hị́ aanị nị Ịtẹra ọ ma Abụramị, Ịnahọ̀ ọnịrị Ịharanị nị. Dị Ịharanị ọnị ma Ịrọọtị nị. 28Ịharanị o vịdị su tụ́ Ịtẹra ada anị ịnị ẹtẹ ịzị a yà ma a nị. Ịzọọ aā hi Ọọrị ịnị ẹtẹ Anikaridi nị. 29Dị Abụramị ọnịrị Ịnahọ̀ ệ nyị ọnẹẹ nị. Ose Abụramị ọ rị Isarayi, dị ose Ịnahọ̀ ọnị rị Imirika nị. Imirika ộ nyị ọyịnyara ọnẹẹ ana hị́ Isika vi ozi Ịharanị. Ẹnịnị vị. 30Ama Isarayi ọnị vị ọbọrị o yi re ozi ma. 31Di Ịtẹra sị Abụramị ozi anị ne beri Ịrọọtị ozi Ịharanị nị. Ịrọọtị vị aazị Ịtẹra. Ịtẹra ọ rẹ sị Isarayi ose ozi anị Abụramị di e dudu hụrẹ Ọọrị ịnị ẹtẹ Anikaridi, ka ẹ̀ nọ ịnị ẹtẹ Ikanaani nị. Ama e mè tù ẹtẹ Ịharanị, dị ẹ kụkụ yà ịzọọ nị. 32Ịtẹra vị ịrayị ịrẹka tụra ẹẹhị (205) di o ve su ịnị ẹtẹ Ịharanị.
Valgt i Øjeblikket:
Oyinyima 11: EBTP
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Ebira First Bible © Bible Society of Nigeria, 2014.