Gha ta Wəshi 39
39
Zhozɛf ki ghɛa Potifar, nde Ɛzhipte
1Pa ka Ismayɛl nyi kekeleghe Zhozɛf kadzawa Ɛzhipte pamte nda ŋkɛ ke kwete nde Ɛzhipte nya nza sləa ŋkɛ kaPotifar. Gheŋkɛ ne, wəndə nya wəba ŋkɛ yitea Farawon, wəndə nya te ghəa ka sewajɛa meghe. 2Nahe Mahwətə kenza le Zhozɛf, vatse nza wəshi nyi mene ŋkɛ pɛtɛ megela, mba ŋkɛ ki ghɛa nde Ɛzhipte nya kesleke ŋkɛ. 3Newe ke wəndə nya kesleke ne, nahe Mahwətə kenza le Zhozɛf, nda jive yajive wəshi nyi mene ŋkɛ mbe kema. 4Kwele kwele ɗehwe Zhozɛf Potifar, pa ŋkɛ kelete ŋkɛ kande mene slene ta ŋkɛ, dapate nda ghɛa ŋkɛ ba'a pɛtɛa wəshia ŋkɛ te dzeve. 5Pelave nda ma ta Potifar ke hweŋkwa kezha nza te ghəa ghɛa ŋkɛ ba'a pɛtɛa wəshia ŋkɛ ne, pa Mahwətə wəpikɛ ghɛa nde Ɛzhipte te zlaɓa ta Zhozɛf. Pa wəpi ta Mahwətə veyi geva kənəa pɛtɛa wəshia ŋkɛ, ghɛa ŋkɛ ba'a wəshi nyi kwamte te yɛ wəve. 6Pɛtɛ dapate ŋkɛ nda wəshia ŋkɛ te dzeve ke Zhozɛf, deke zeme wəsə kezeme nde tene ve.
Yɛ Zhozɛf le male ta nde sleke ŋkɛ
Wəndə nya ndeɗe ba'a nya mawe mbeli kanewe Zhozɛf. 7Kwetere wəmbəa hɛ ɓɛhwɛ, ntake male ta nde sleke ŋkɛ kamawe Zhozɛf, ma ke shɛ: «Ɓelahe ɓə.» 8Ama hɛreɗɛ ŋkɛ ɗema, ma ke sha male ta nde sleke ŋkɛ: «Nahe nde sleke ɗa kedapate ɗa pɛtɛa wəshia ŋkɛ te dzeve. Mba ŋkɛ kanewe ghweme te wəshi nyi ki ghɛa ŋkɛ we. 9Ki ghɛ nya ne, wəndə shɛ kwele ma ke 'ya we, kefɛake ɗa kwete wəsə ŋkɛ we. Deke gha va nya nza na kamale ta ŋkɛ. Tsema nza 'ya kamene wəsə kwa ndiremi kala nya ba'a kabeze nda ghena 'ya ke Shala wa?» 10Keveci keveci geze nda nde ke Zhozɛf kadzembe cɛa nta kezha ɓelahe le, ama kayɛ ŋkɛ tɛape we. 11Te kwete veci ne, pa Zhozɛf dzeki ghɛ yitea slene ta ŋkɛ. Ka mene slene shɛ kiagha we. 12Tepele male ta Potifar keseve ŋkɛ te lekwesa, ma ke shɛ: «ɓelahe le 'ya.» Pa Zhozɛf sərəakɛ lekwesa ta ŋkɛ mbe dzeve ta nta ba'a hwɛnyɛ shave ki ghɛ. 13Ma kwa nakɛ nde nahe ŋkɛ kesərəakɛ lekwesa ta ŋkɛ mbe dzeve ta nta kezha hwɛ kajive ne, 14pa nde hekake ka mene slene ta nta, ma ke sha hɛ: «Newema mə, nahe nde Ɛbrə nya keleke ɓəmə nya za ɗa keɗe karaberə le gheɓə! Nahe ŋkɛ kese sha 'ya kezha zele ɓelahe le 'ya, ama kɛake 'ya sha lewela le berete. 15Ma kwa fate lewela ta ɗa ŋkɛ kaheka ŋkwa ne, pa sərəakɛ lekwesa ta ŋkɛ vare 'ya ba'a hwɛnyɛ kajive.» 16Pa nde veyi lekwesa ta Zhozɛf dzeme va bela ta nta pa te və nya zhɛneke geva za nta. 17Pa nde gezete nda ghena shɛnyɛ ke za nta, ma ke: «Nahe nde Ɛbrə, mava nya keleke nya na kekelemte zləvə te 'ya. 18Ma kwa fa ŋkɛ katsa lewela 'ya kaheka ŋkwa ne, pa ŋkɛ sərəakɛ lekwesa ta ŋkɛ teke yitea 'ya ba'a hwɛnyɛ kajive.» 19Ma kwa fate ghena nya gezete nda male ta ŋkɛ wəndə ke ghɛ, tsema tsema menete nda Zhozɛf ne, mɓɛke ŋkɛ hwepete wənə. 20Pa ŋkɛ keseve Zhozɛf ba'a veyi ŋkɛ kwa daŋgayɛ, mbe ŋkwa nya ŋzle ka daŋgayɛa meghe mbeli.
Zhozɛf kwa daŋgayɛ
Ma kwa nza Zhozɛf kwa daŋgayɛ ne, 21nahe Mahwətə kenza le gheŋkɛ. Pa ŋkɛ ncɛte nda ganyɛa ŋkɛ laka zhɛ helia wəndə kwele nya te ghəa daŋgayɛ. 22Pa wəndə kwelea shɛ ndeke nda ka daŋgayɛ pɛtɛ te dzeve ke Zhozɛf. Gheŋkɛ ya te ghəa wəshi nyi mene ka daŋgayɛ. 23Kazhɛne wəndə nya te ghəa daŋgayɛ kanewe ghweme te wəshi nyi ndeke nda ŋkɛ te dzeve ke Zhozɛf we, va nya nza ŋkɛ kənəa Zhozɛf Mahwətə, kave nda berete ŋkɛ kajive mbe kema mbe kema mbe yayata wəsə nya mene ŋkɛ.
Valgt i Øjeblikket:
Gha ta Wəshi 39: BEKDC12
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
La Bible en langue Kapsiki avec les livres deutérocanoniques © Alliance Biblique du Cameroun 2012.