Gha ta Wəshi 40
40
1Kwa sebe ta wəshia shɛhɛ ne, pa wəndə nya te ghəa wəshi kesa ba'a wəndə nya te ghəa wəshi kezeme ta meghe bezemte nda ghena ke meghea ka Ɛzhipte nya kande sleke hɛ. 2Mɓɛke Farawon hwepete wənə va mbelia jama ta ka mene slene ta ŋkɛ bake: wəndə nya te ghəa wəshi kesa ba'a nya te ghəa wəshi kezeme. 3Pa ŋkɛ fəyi hɛ kwa daŋgayɛa wəndə nya te ghəa mbeli nyi keya ŋkɛ, nya nza Zhozɛf kwa. 4Pa wəndə nya te ghəa mbeli nyi keya meghe dapate nda hɛ te dzeve ke Zhozɛf, pa hɛ teməakɛ temə kwa daŋgayɛ.
Ghena nya mbe yɛ shiwəa ka daŋgayɛ nyi bake
5Ma te kwete viɗi ne, pa wəndə nya te ghəa wəshi kesa ba'a nya te ghəa wəshi kezeme ta meghea ka Ɛzhipte nyi kwa daŋgayɛ shiwəte shiwə. Keghə keghə shiwəa shɛhɛ ba'a keghə keghə ghena nyi mbe hɛ. 6Ma kwa lə Zhozɛf sha hɛ masheke ne, pɛtɛ hɛ le kema teheɗe. 7Ma ke sha hɛ: «Va wa nza yɛ le kema teheɗe ɓeshi wa?» 8Ma ke hɛ shɛ: «Ghen'yɛ shiwəte shiwə, ama wəndə shɛ kezha ncɛte n'yɛ ghena nya mbe we.» Ma ke Zhozɛf sha hɛ: «Wərə Shala kancɛte ŋayɛ, gezete ɗa mə shiwəa ŋayɛa shɛhɛ.»
9Pa wəndəa kwele nya te ghəa wəshi kesa ki ghɛa meghe gezete nda shiwəa ŋkɛ, ma ke: «Ma shiwə 'ya ne, wəfe ta rɛzɛŋe ya mbe kema ta ɗa. 10Dzeve mahekene ya te. Ma kwa ɗa ŋkɛ ne, pa ŋkɛ betete ghwə, taghanyɛ, pɛkwe ya nyi kenehe nehe te. 11Yitea dzeve ta ɗa zlerekwea Farawon, ntake 'ya kanda rɛzɛŋe kezha hetəsə yɛməa ŋkɛ kadzawa zlerekwea Farawon, pa 'ya ndeke nda ŋkɛ.» 12Ma ke Zhozɛf shɛ: «Wa nya ghena nya mbe shiwəa ŋa nya: Ma dzeve ta wəfe nyi mahekene nyighɛ ne, hɛ mahekene geze ta ŋkɛ. 13Tene hɛ mahekene ne, kateve ŋa Farawon kawəndə nya kwele. Katezhɛne ŋa ŋkɛ te slene ta ŋa, kateve nda tɛ na kala nya se na kamene vəashi. 14Ama mba na kezaghəyite ɗa vəa ŋkwa nya nza na te ŋkwa ganyɛ. Geze nda ghena ta ɗa megela ke Farawon təhwə təhwə ŋa 'ya kezha kelakame ɗa ŋkɛ same kwa daŋgayɛ nya. 15Kwa nza ŋkɛ kaberete kelemte ɗa mbeli te hɛɗia ka Ɛbrə, teke zhɛkwa, kemenete kwete wəsə 'ya nda veyi ɗa mbeli kwa daŋgayɛ we.»
16Ma kwa nakɛ wəndə nya te ghəa wəshi kezeme ganyɛke gezete ghena nya mbe shiwəa nyagha Zhozɛf ne, ma ke shɛ: «Nahe 'ya keshiwəte shiwə perə. Ma newe 'ya, mahekene kwaciga ta gatewe kwa ghə va 'ya. 17Ma kwaciga nya pelɛghə ne, mama ta gatewe nyi zeme Farawon ya kwa, ama nda se yase yɛ 'yɛ katsetsakwe hɛ kwa kwaciga nya kwa ghə va 'ya.» 18Ma ke Zhozɛf shɛ: «Wa nya ghena nya mbe shiwəa ŋa nya: Ma kwaciga nyi mahekene nyighɛ ne, hɛ mahekene geze ta ŋkɛ. 19Tene hɛ mahekene ne, katesla ghə Farawon te gha. Katehwepe ŋa zewe ŋkɛ kwa welɛ kezha nza na ŋalawe te wəfe, katetsakwe slia geva ta ŋa yɛ 'yɛ.»
20Hɛ mahekene kwetere wəmbəa ŋkɛ, pa Farawon menete gəsəkəa ya ta ŋkɛ. Pa ŋkɛ menete nda wəshi kezeme kwele kwele ke mbeli nyi yite pɛtɛ. Pa ŋkɛ pelakame wəndə nya te ghəa wəshi kesa ba'a wəndə nya te ghəa wəshi kezeme kwa kema ta mbeli pɛtɛ. 21Pa ŋkɛ zhɛneyi wəndə nya te ghəa wəshi kesa te slene ta ŋkɛ, kezha zhɛne ŋkɛ kave nda zlerekwea tɛ. 22Ma wəndə nya te ghəa wəshi kezeme ne, ŋalawe ŋkɛ hwepeyi ŋkɛ te zewe pelɛ wəfe kala nya gezete Zhozɛf. 23Ama kese wəndə nya te ghəa wəshi kesa nyagha kageze ghena te Zhozɛf we, yare ghena yitea ghə ve.
Valgt i Øjeblikket:
Gha ta Wəshi 40: BEKDC12
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
La Bible en langue Kapsiki avec les livres deutérocanoniques © Alliance Biblique du Cameroun 2012.