Shiyanso 49
49
UYaakobo ikivayimiilila avanaakwe
1Baheene uYaakobo wávashemeela avanaakwe wávajovela, “Kungaani, baheene nivajovele amaswi gina gakhavapata insiku sina siyinsa.
2“Kungaani, munipuliise, omwe vaana va Yaakobo,
munipuliise one Isilaheli, ni wuheenyu.
3“Lubeni, uli muswamu wangu wa wutasi,
ngufu sangu, likhomo lyangu lya wudiimi wangu,
owe uvashilile avanangʼana vaakho woona kwa ngufu nu wukhome.
4Owe uli ngaja malenga gina gadeekha, leelo usikhava wa wutasi khanji,
kwa kiiva wataanaga pa wusaga wangu na kigona nu mudala wangu.#49:4 Yimba mu litaafili lya Shiyanso 35:22.
5“USimiyoni nu Laawi vali lukholo,
imalala saanave vigahila amavi.
6Inumbula yangu yisikhajelaga kiyinjila mu mbuusa yaanave,
one, nisikhajelaga kiyinjila mu shipuga shaanave,
kiiva mu nkhalasi yaanave, vavabudaga avaanu,#49:6 Yimba mu litaafili lya Shiyanso 34:25-29.
kwa wupuluusi waanave vadumulaga umusipa gwa ngʼombe.
7Inkhalasi yaanave yiyiijilwe, kwa kiiva yikhandi nkhali,
yoope inkhalasi yaanave, yikhandi yingaya lusungu.
Nikhavayalaalisa mu nyi ya Yaakobo,
nikhavapalankhania mu nyi ya Isilaheli.
8“Owe Yuuda, avalukholo lwakho vakhakusufya,
ukhavatakha ku nsingo avalugu vaakho,
avaana va wiiho vakhakufugamila.
9UYuuda muswamu wangu, owe uli ngaja nyana nyalupala,
wafwima, waabuda na kiwuukha. Lino ugonile pansi ngaja nyalupala imbalusi, yu naani iijela kikulamusa?
10Ulukwegu ulwa shitwa lusikhawuukha kwa Yuuda,
lukhasigala nsiku soona mu shikholo shaakwe,
mbakha pina akhayinsa umunya wutwa,
yuna inyi soona sikhamutiila.
11Akhava na magunda amanofu mandu,
hata akhaliisa idogovi saakwe amasabiibu gaakwe amanofu.
Idivaayi yaakwe yikhava nyinshi mandu ngaja malenga,
hata akhakhansa amenda gaakwe mu divaayi yaakwe.
12Ameeho gaakwe gakhava maduuhu kwa kiiva ya divaayi yaakwe nyinshi,
ameeno gaakwe gakhava mavalafu, kwa kiiva ya tupyo twakwe twinshi.
13“USabulooni akhava iikhala mu mbalamo ya bahali,
imbalamo yaakwe yikhava luvala lwa kiyiimya ifipugo,
insala yaakwe yikhafikha mbakha ku nyi ya Sidoni.
14“UIsakaali ali ngaja dogovi inya ngufu,
yina yikiyigonia pa masigo gaakwe.
15Wáawona kiija, luvala lunofu lwa kituuya,
khanji inyi yaakwe yinojeele,
wádoovamya umugongo gwakwe kisumula amasigo,
wáava muvanda wa kisenga insengo kwa ngufu.
16“UDani akhavalongosa avaanu vaakwe kwa shiyooli,
ngaja munyaayumo wa fikholo fya Isilaheli.
17UDani akhava ngaja njokha mu mbalamo ya nsila,
njokha inya wanga mu mbalamo ya nsila,
yina yikhooma ifinsikiliinyi ifya falaasi,
woope yuna iyangala iigwa pansi.
18“Wee Mutwa Nguluvi, one niheepile uwukulukho waakho.
19“UGaadi akhayalushilwa na vayalushilaaji,
leelo umwene akhavayalushila mbakha kivamena.
20“Inyi ya Asheeli, yikhava yiihumya ishakiilya shinshi na shinofu mandu,
woope akhahumya ishakiilya ishinofu kwa mutwa.
21“UNafutaali ali ngaja inshaama itogota yina yikiyijendela,
yina yiisava inyaana inofu.#49:21 Yina yiisava inyaana inofu: Mu mayandikhwa agamonga amakuulu yiyandiikhwe, Yuna ilogola ishilogolo ishinofu.
22“UYusufu ngaja musabiibu guna gwikhoma mandu,
musabiibu guna guli mu mbalamo ya shisansa sha malenga.
Amansamba gaakwe gatavile mu luhengo.
23Avaanu vina vitoosa indibulo vamuyalushilaga,
vamudibula ni ndibulo na kimulafya mandu.
24Leelo uludibulo lwakwe lupinyiilwe mandu,
amawokho gaakwe gaava gana ngufu,
kwa kiiva ya wutawulilwa wa Nguluvi uwa Yaakobo,
kwa litaawa lya mudimaaji, umwene Lipaama lya Isilaheli,
25kwa kiiva ya Nguluvi wa daada waakho ikikutanga.
UNguluvi uMunya Ngufu Soona, ikikuyimiilila,
upate inoonya kihuma kushaanya,
imota iya malenga aga fisansa fina fili pansi,
imota ya fidiimwa ni shisafi.
26Imota isa wiiho nkhome kishila imota isa fidunda ifya shiluta,
imota nyinshi kishila ifidunda ifya shiluta.
Imota iso soona sikhale pashaanya ya mutwe gwa Yusufu,
sive pashaanya pa wulondonsi wa mutwe gwakwe yuna mukhome kwa valukholo lwakwe.
27“UBenyamini ngaja mbwawa nkhali,
ulwamilaawu iilya inyama yaakwe yina afwimile,
ishaamihe iigava ifiinu fina wágalula.”
28Awo vaveene shiyanso sha fikholo ishumi na fivili ifya kihuma ku Isilaheli. Ago gageene gina uYaakobo wávajovelaga pina wávayimiliile woona, wávayimiilila yumo yumo ngaja shina yisakulwa.
Imfwa ya Yaakobo
29Baheene uYaakobo wávalajisa kiija, “One nili nkholeela kiifwa. Pina nikhava naafwa, mukhalutaje munisiile ku majooja gina gali mu mugunda gwa Efuloni uMuhiti, kuna vasilwagwa avagogolo vangu. 30Mukhanisiila mu lijooja lina lili mu mugunda guna guli ku Makipela, pina wiiluta ku Mamule mu nyi ya Kanaani. Ilyo lilyene lina uAbulahamu wágulaga lumo nu mugunda gwa Efuloni Muhiti, baheene pave paakwe pa kisiilila. 31Ukho kukwene vasilwagwa uAbulahamu nu mudala waakwe uSaala, uIsaaka nu mudala waakwe uLebeka na umo mumwene namusiilaga uLeya. 32Umugunda gula ni lijooja lila lyagulwagwa kwa Vahiti.”#49:32 Yimba mu litaafili lya Shiyanso 23:11-20.
33UYaakobo wáganile kimala kivasimila hela avanaakwe, wátansa amagulu gaakwe pa wusaga wáafwa, wáaluta kwa vawiihe vina vafwisaga.
Valgt i Øjeblikket:
Shiyanso 49: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.