UKUM 1
1
Baré Luk Sabpen
1Tuhan nenawar ni Musa rat bang Lepo su luk inan papu' Tuhan, kebalaNeh, 2“Do' lun Israil maya' bala ini: Kudeng idé rat arang muyuh pian maré aceh baré ratnan aya'neh, ieh ineh sapi', dumba, kian amék lek, 3idi kudeng baré ineh aceh baré luk sabpen ratnan sapi' ineh, do' ieh maré aceh sapi' deléi luk do'. Do nguit neneh macing pa atun tanga' Lepo su luk inan papu' Tuhan, pelé Tuhan ngalap ineh. 4Idi do' ieh ngerareng ticu'neh nan uluh luk barén sabpen ineh, pad ineh mangun ku aceh baré luk nguit pedo' kuanneh. 5Idi do' ieh ngeret sapi' su ineh. Idi do' anak Arun luk imam-imam maré dara' ineh kuan Tuhan, idi ngisak ineh libut-libut bubpun luk pa atun tanga' Lepo ineh. 6Idi kubil luk barén sabpen ineh uen mulu'-mulu'. 7Idi do' imam-imam ineh nganau' kayuh apui luun bubpun idi nutud ineh. 8Idi do' ideh nganau' uang pung ineh dengan uluhneh idi lemakneh luun apui. 9Idi do' ieh maru' tinéi' idi kukudneh, idi do' imam ngeseb amung baré ineh luun bubpun, pad mangun ku aceh buen luk do' kuan Tuhan.
10“Idi kudeng luk barén ineh ratnan aya' dumba, kian amék lek, do' ieh maré deléi luk do'. 11Idi do' ieh keretenneh pa tinueh busat aco bubpun ineh. Idi do' imam-imam ngisak dara' ineh libut-libut bubpun. 12Idi do' ieh uen mulu' perapu dengan uluh idi lemakneh, idi imam nganau' ineh luun apui. 13Idi do' ieh maru' tinéi' idi kukudneh. Idi do' imam ineh ngeseb amung baré ineh luun bubpun, pad mangun ku aceh buen luk do' kuan Tuhan.
14“Idi kudeng luk barén sabpen ineh ratnan suit, idi do' ieh maré suit sukur, kian suit limun lek. 15Idi do' imam nguit ineh amé' inan bubpun idi ngekaka dierneh, idi ngeseb uluhneh luun bubpun, idi dara'neh uen ngeti luun iring bubpun. 16Idi do' ieh nala' belunanneh idi mubput buluhneh idi nala' ineh pa busat aco bubpun su luk inan abuh. 17Idi do' ieh narak su ilad suit ineh, iamo' aleg ngatad bururneh. Idi do' ieh ngeseb amung ineh luun bubpun pad mangun ku aceh buen luk do' kuan Tuhan.
Valgt i Øjeblikket:
UKUM 1: BLD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
BALA LUK DO' Lun Bawang Bible © The Bible Society of Malaysia 1982, Second Edition 1998.