UKUM 2
2
Baré Akan
1“Idi kudeng idé luk maré inan Tuhan aceh baré luk kenen, do' ieh maré banak luk rinaburneh ku umau saitun perapu dengan umau luk do' buen. 2Idi do' amung ineh iten amé' nan anak Arun luk imam-imam. Idi sebuleng imam miak ngalap sengeragam banak ineh, perapu dengan umau saitun idi umau luk do' buen ineh. Idi do' imam ineh ngeseb ineh luun bubpun pad mangun ku aceh buen luk do' kuan Tuhan. 3Idi luk ketecan ratnan baré akan ineh mangun ku babpat imam-imam, idi ieh ineh meluun ligan ngaceku ieh ilap ratnan akan luk barén kuan Tuhan.
4“Idi kudeng baré ineh pinaram luk uen nadang luun tetel, idi do' ieh na uen ngelamud. Miak muyuh nganau' pinaram luk mekapal luk rinabur ku umau saitun, idi teh pinaram luk melipi luk linusi ku umau saitun.
5“Idi kudeng baré ineh pinaram luk uen nadang luun belawan, idi do' ieh ratnan banak luk rinabur ku umau saitun idi luk na linamud. 6Do' ngareg ineh idi ngelusi ineh ku umau pad ineh mangun ku aceh baré akan.
7“Idi kudeng baré ineh pinaram luk uen nadang bang periuk, idi do' ieh ratnan banak idi umau saitun. 8Do' ieh barén kuan imam ku aceh baré kuan Tuhan. Idi imam nguit ineh amé' nan bubpun. 9Idi do' imam ngalap sesuut ratnan baré akan ineh ku babpat luk sabpen luun bubpun kuan Tuhan, pad ineh mangun ku aceh buen luk do' pa kiungNeh. 10Idi luk ketecan ratnan baré akan ineh mangun ku babpat imam-imam, idi ieh ineh meluun ligan ngaceku ieh ilap ratnan akan luk barén kuan Tuhan.
11“Idi aleg muyuh maré baré akan luk linamud kuan Tuhan. Idi aleg muyuh maré luk linamud idi luk inan duru' kuan Tuhan. 12Do' muyuh maré babpat peranih luk pun-pun kuan Tuhan. Iamo' ieh na miak sabpen luun bubpun. 13Idi do' muyuh nucu' anid baré akan, ngaceku tucu' ineh pinginud pejani' arang Allah dengan muyuh. (Do' muyuh nucu' amung baré muyuh.) 14Kareb muyuh maré inan Tuhan aceh baré akan ratnan peranih luk pun-pun, idi do' muyuh maré ilung padé luk mebaruh idi luk didang ku apui, idi teh ilung luk tapen dari-dari. 15Idi do' iko nganau' umau saitun idi umau luk do' buen luunneh. 16Idi ratnan babpat luk barén ratnan padé luk tipeh, idi umau saitun perapu umau luk do' buen, do' imam ngeseb sebabpat kuan Tuhan mangun ku aceh baré luk kenen kuanNeh.
Valgt i Øjeblikket:
UKUM 2: BLD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
BALA LUK DO' Lun Bawang Bible © The Bible Society of Malaysia 1982, Second Edition 1998.