UKUM 3
3
Baré Luk Nguit Pedo'
1“Idi kudeng idé rat arang muyuh maré aceh baré luk nguit pedo', ieh ineh sapi', idi do' ieh maré deléi, kian tineh lek, luk do'. 2Idi do' ieh ngerareng ticu'neh luun uluh luk barénneh ineh, idi ngeret neneh pa atun tanga' Lepo su luk inan papu' Tuhan. Idi do' anak Arun luk imam-imam ineh ngisak dara'neh libut-libut bubpun ineh, 3idi maré inan Tuhan sebabpat baré luk nguit pedo', ieh ineh linuap idi amung lemak luk luun tinéi'neh luk miak sabpen ku baré kuan Tuhan, 4idi dueh-dueh baterneh idi amung lemak luk luunneh, idi luk nan iungneh, idi babpat luk meluun do' ratnan aténeh. 5Idi amung ineh sabpen imam-imam luun bubpun ineh dengan amung baré luk sabpen, pad mangun ku aceh buen luk do' kuan Tuhan.
6“Idi kudeng ieh maré dumba kian amék lek ku baré luk nguit pedo', ieh miak maré deléi idi tineh luk do'. 7Idi kudeng dumba luk barénneh, 8do' ieh ngerareng ticu'neh luun uluh luk barén ineh, idi ngeret neneh pa atun tanga' Lepo su luk inan papu' Tuhan. Idi do' imam-imam ngisak dara'neh libut-libut bubpun ineh, 9idi maré inan Tuhan sebabpat baré luk nguit pedo', ieh ineh lemak idi iurneh luk melamu luk miak uenneh netek birit tulang iung, idi linuap idi amung lemak luk luun tinéi'neh, 10idi dueh-dueh beterneh, idi amung lemak luk luunneh, idi sebabpat luk meluun do' ratnan aténeh. 11Idi amung-amung ineh miak sabpen imam luun bubpun mangun ku aceh baré akan kuan Tuhan.
12“Idi kudeng amék luk barénneh, 13do' ieh ngerareng ticu'neh luun uluhneh, idi ngeret neneh pa atun Lepo su luk inan papu' Tuhan, idi do' imam-imam ngisak dara'neh libut-libut bubpun ineh, 14idi maré inan Tuhan sebabpat baréneh luk miak sabpen, ieh ineh linuapneh idi amung lemak luk luun tinéi'neh, 15idi dueh-dueh beterneh, idi amung lemak luk luunneh, idi luk nan iungneh, idi babpat luk meluun do' ratnan aténeh. 16Idi amung ineh miak sabpen imam luun bubpun ku aceh baré akan luk petulu kuan Tuhan. Idi amung lemak Tuhan kuan. 17Idi lun Israil bibpeng na miak kuman lemak idi dara'. Idi ini aceh ukum luk meruked kuan lun Israil iapeh-iapeh pana'.”
Valgt i Øjeblikket:
UKUM 3: BLD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
BALA LUK DO' Lun Bawang Bible © The Bible Society of Malaysia 1982, Second Edition 1998.