मरकूस 10
10
बियाह अड़ाः होड़ेंगगुः बदीरे चेड
(मती 19:1-12; लूका 16:18)
1हनते ईसू कपरनहूम सहर अते एहूदिया छतरराः सियाँ सरहद होरते एरदन नई मार परोमरेय सेनेडा अरू मुरुक बगरा होड़कू हाँय एचेरेकू जुमावनेना। हनमेला ईसू हँकुःआ होड़कू, हाँय मड़ंगे चेडा हना इयाय चेडकुःआ।
2दो फरीसी होड़कू ईसू एचेरे वेगकियानखन हाँय अंदजावगेय लगाकू होंबरेया, “ने गुरुजी, अबूराः नियमरे तोनोंगीग मरद आँयग अइमीय अड़ाः अवेयता जा?”
3दो हाँय कतातेड, “भगवानराः कागदरे नाःआ कता बदीरे मोसेस चेले माःआने ओजाःकेरा?”
4दो हँकुःआ होड़कू कतातेड, “मोसेस दो अड़ाःगेराः चिठी ओजाःकेडखन अड़ाः एंडागेय लगाय ओजाःकेरा।”#दो. नि. 24:1-4
5दो ईसू हँकू एचेरेय कतातेड, “अपेराः जीव केटेग इदा। हनालगा हाँय अपे लगा नाःआ इयाःआ हुकुमे एमेकेरा। 6चउंदीसराः बुँहड़ीन अते भगवान मरद अरू अइमीय तुलाकेडकिना।#रेःएत 1:27 7नानलगा मरद आँयग एंगात अपात अते एटाःकियानखन आँयग अइमी सुदा मिनीरेय दोहोनता। 8अरू हना वरीते हँकिन बार होड़ कोवाकिना, मनदो मिनीटोंग देहकिन होया जुवाःता।#रेःएत 2:24 9हनालगा भगवान मिनीकेडकिना हँकिनाः होड़किन तोनोंगीग होड़ अहाय हिगार हटिंगकिन।”
10तयोमरे चेलाकूतेन ओड़ाःरेकू दोहोन मेला, हना बदीरे हँकू हाँय एचेरे अरूकू होंबरेःआ। 11दो हाँय हँकू एचेरेय कतातेड, “अनँयग अइमी अड़ाःवाडखन एटाः अइमीय सगइयता, हाँयग होड़ सनहाता। 12अरू अनँयग मरद अड़ाःवाडखन एटाः मरद सुदाय सगइगुःता, हाँयग अइमी सनहीता।”#1 कुरि 7:10,11
ईसू लइंकूराः जीवे भलावातेरा
13दो मी दिन, ईसू लइंकू टोँवाव लगा होड़कू लइंकूकू अगुःआ। मनदो चेलाकू होड़कूकू डंटावतेरा। 14नाःआ ञेलवाडखन ईसू रीसयाने अरूय कतावाकुःआ, “लइंकू ईंग एचेरेपे वेग ओवाकू। हँकू अहापे रोंकावकू। नँकुःआ लइंकू इया इदानकुःआ, हँननकुःआ होड़कूराः हवे भगवानराः राइज। 15अपे ईंगपे अयूम, लइंकू इया भगवानराः राइज मेरकू मनेवाता हँकुःआ होड़कू भगवानराः राइजरे ओनोरोकू बोलो अवेनेना।” 16हनते ईसू हँकुःआ लइंकूय सहेरतेड अरू हँकूराः बोःरे आँयगराः तिःई खेपातेडखन लइंकूराः जीवे भलावातेरा।
गिरहत डिंघा होड़
(मती 19:16-30; लूका 18:18-30)
17दो ईसू हना अते उडुंगनेनखन दूररेय सेन मेला मी होड़ ईसू एचेरे वेजेडखन उकुड़ोमनेनखने होंबरेःआ, “ने नपाय गुरुजी, ओरो टुटीगनेना हना जीव पवाः लगा चिलायिंग एचे?”
18दो ईसू हाँय एचेरेय कताया, “आम चिला लगा ईंग ननपायमे कतावायिंगता? भगवान अड़ाःकेडखन तोनोंगीग नपाय कोवाया। 19आम भगवानराः नियमकूनमे सुदीयतना। हना नियमरे नाःआ इया ओजाःतो इदा,
अलोपे सनहा-सनही,
अलोपे ञेड एंडाकू,
अलोपे इनिगगे,
लबरा हिदइत अलोपे एमेय,
अलोपे अडिग जोम,
अरू अपे एंगा-अपापे मान मरजइत।”#एचे उडुंग 20:12; दो. नि. 5:16-20
20दो हाँयग होड़ कताया, “ने गुरुजी, ईंग लनँइगिंग दोहोन वरी ईंग जमा कता मनाः घड़ीनिंग हराकिया।”
21ईसू हाँयग होड़ अगीय ञेला अरू हाँय दुलारवाडखने कताया, “आम मीटोंग कता अरूम एचेय। आमराः जमा जइतकून अकिरिंगवाडखन गरीब होड़कूम हटिंगगोडवा। दो आम सेरमो देसरे मुरुक नपाय नपाय इमानमे पवाःता। हना तयोमरे आम ईंगरीग चेलाम बड़ाँः।”
22हाँयग होड़ मुरुक गिरहते दोहोना। हनालगा हाँय नाःआ बड़राय अयूमतेरा अरू हाँयराः जीव हुडिंगयानखन ओड़ाः अगी तोराय।
23ईसू आँयग अउग-बउगे ञेलतेरा अरू आँयग चेलाकू एचेरेय कताया, “गिरहत होड़कू अँननकूराः ढिबुवाकूनरेकू भरसाता, हँकुःआ होड़कू भगवानराः राइजरे बोल लगा मुरुक मसकिल इदा।”
24ईसूराः बड़रा अयूमवाडखन आँयगरिकुःआ चेलाकू बयावयानकू। मनदो ईसू अरूय कताया, “ईंगरिकुःआ वपक-बोपोहकूतिंग, अपे ईंगपे अयूम, भगवानराः राइजरे मी होड़ बोल लगा मुरुक मसकिल इदा। 25भगवानराः राइजरे मी होड़ गिरहत होड़ बोल अते मीटोंग सुईराः बुचाःते ऊँट सेने पारगुः लगा रिता इदा।”
26हँकुःआ होड़कू मुरुककू बयावयान अरूकू कता होड़ेंगा, “दो इये सडाव अवेनता?”
27दो ईसू कताया, “मनुवा मेरेय एचे अवेयता हना जमाकून भगवान अते होया जुवाःता।”
28दो पतरस कतातेड, “अले दो जमा बरानाः अड़ाःकेडखन आम देह दूरले वेगकिया।”
29दो ईसू हँकू एचेरेय कताया, “ईंगपे अयूम, तोनोंगीग होड़ ईंग लगा अरू ईंगराः नपाय सरवन लगा अनँयगराः ओड़ाः, वपक-बोपोहकूतेन अरू अजी-मेमेसकूतेन, एंगा-अपाकू अरू लइंकू, अरू दोहोड़कूनतेने अटूता, 30दो नाःआ जूगरे ओड़ाःकून, वपक बोपोहकूतेन, अजी-मेमेसकूतेन, एपेंगकूतेन, लइंकूतेन अरू दोहोड़कूनतेन सव गुना बगराय पवाःता अरू कटसिया सहाव पारकेडखन सेरमो देसरे ओरो टुटीगनेना हना जीव होंय पवाःता। 31मड़ंगरे इदानकुःआ, हँकुःआ होड़कू अते मुरुक होड़कू तयोम जुवाःता अरू तयोमरे इदानकुःआ, हँकुःआ होड़कू अते मुरुक होड़कू मड़ंग जुवाःता।”
ईसू अनँयग गुजुः बदीरे अरूय कतातेरा
(मती 20:17-19; लूका 18:31-34)
32दो ईसू अरू चेलाकू एरुसलेम सहर होर दूररेकू सेना। अरू हाँय हँकू मड़ंग मड़ंगगे सेना। चेलाकू मुरुककू बयावयान अरू हँकू देह दूरकू वेगा, हँकुःआ होड़कू बोरोयानकू। अरू हँकू सेनेन सेन दूररे ईसू आँयग बारहगोटोंग मूक चेलाकू एचेरे मड़ंगरे होयाःता हना कताय उदुःवातेडकुःआ, 33“अबू एरुसलेमबू सेनतना। मरंग पुजउरीकू अरू नियम चेडदार होड़कू तिःईरे मनुवारीग बेटातकू एचे सबेयता। हनते हँकुःआ होड़कू ञेड एंडागेय लगा जाःकिरिगखन बेगर एहूदाकू एचेरेकू जिमागेयता। 34हनते हँकुःआ होड़कू लंदावायता अरू हाँय सेरमोकू बेगता अरू गुरुंदतेकू ञेंडेयता अरू ञेड गोएगगोडेयताकू। हनते पेय दिन तयोमरेय जियाव रिमुःता।”
एकूब अरू एहुनाराः चहाः
(मती 20:20-28)
35जबदीरिकिनाः बेटाकिन एकूब अरू एहुना ईसू एचेरे वेगवाडखनकिन कताया, “ने गुरुजी, अलिंग चहाःतना, आम एचेरे अलिंग असेयतना हना अलिंग लगाम एचेय।”
36दो ईसू हँकिन एचेरेय कतातेरा, “अबा चिलाबा चहाःतना, ईंग अबा लगायिंग एचेय?”
37दो हँकिन ईसू एचेरेकिन कतातेड, “आम मान मरजइतगे इयायीग राजाम बड़ाँःता, हनमेला अलिंग मी होड़ आम खउना तिःई अगी अरू मी होड़ दिरहिया तिःई अगीम दुड़ुःलिंग।”
38ईसू हँकिन एचेरेय कतातेरा, “अबा मेरबा सुदीयतना चिलाबा असेयतना। ईंगके ञूय लगा इदा हना कटसियाराः डुबहातेबा ञू अवेयता जा अरू ईंगके गोगोः इदा हना बतिसमाबा गोः अवेयता जा?” 39हँकिन ईसू एचेरेकिन कतातेड, “अलिंग अवेगोडतालिंग।”
दो ईसू हँकिन एचेरेय कताया, “हाव, अबा अवेगोडता। ईंगके ससहाव इदा हना कटसिया अबा हों सहवेता अरू अबाराः जीवरे हों गराह गिराह होया जुवाःता। 40मनदो ईंग खउना अरू दिरहिया तिःई अगीयिंग एचे दुड़ुःकिन लगा ईंगराः हातपात कोवानेःआ। भगवान सुनावकेडकिना हँकिनाः होड़किन लगा हना ततेर हाँय सपड़ाव दोहोकेरा।”
41नाःआ अयूमवाडखन ईसूरिकुःआ एटाः दसगोटोंग मूक चेलाकू हँकिनकू रीसवाःआ। 42हनते ईसू आँयगरिकुःआ जमा मूक चेलाकू राःवाडकूखने कतातेरा, “अपे सुदीयतना, बेगर एहूदाकूरिकुःआ राजाकू हँकू एचेरेकू राइजगेता अरू मरंग होड़कू अँननकूरिकुःआ होड़कू एचेरेकू हातपातगेता। 43मनदो अपे नाःआ इया अहापे होयाः। अपे अते तोनोंगीग होड़ मरंग होयाः लगापे ओंगलेतना दो हाँय अपेरीग सेवादार बनड़ाँः लगा इदा। 44अरू जमाकू अते मरंग बड़ाँः लगाय चाहाःतान दो, हाँयग होड़ जमाकूरीग बेगारी होड़े बड़ाँः। 45मनुवारीग बेटात हों अनँयग एचे सेवान लगा मेरेय वेगगना, मनदो हाँय जमा होड़कूय सेवा लगा अरू अनँयग जीव एमे अटूकेडखन मुरुक होड़कू सडावकू लगाय वेगकिया।”
अंधा होड़ बरतिमाईराः नपायगुः
(मती 20:29-34; लूका 18:35-43)
46हनते ईसू अरू आँयगरिकुःआ चेलाकू एरीहो सहर पारनेनखनकू सलाःआ। अरू हँकू सुदा एरीहो सहर अते मुरुक होड़कू होंकू सेना। दो तिमाईरीग बेटात बरतिमाई ञावीग मी होड़ अंधा होड़ दूर कुटीरे दुड़ुःवाडखने असे जोमा। 47नसरत सहररीग ईसू नानाः दूर दरवाया हना सरवन अयूमवाडखन हाँयग अंधा होड़ खिररीवाडखने कताया, “ने ईसू, दाऊद राजारीग नइड़-बाँस होड़, ईंगमे सोगावा।”
48दो मुरुक होड़कू हाँयकू डंटावा, “आम कलेकालमे दोहोन।”
मनदो हाँय अरू मुरुक खिररी घड़ीने कताया, “दाऊदरीग नइड़-बाँस होड़ ईसू, ईंगमे सोगावा।”
49दो ईसू चड़ाँनेनखने कतातेरा, “माँय ईंग एचेरेपे राः अगूय।”
अरू होड़कू हाँयग अंधा होड़ राःतिरिगखनकू कतावातेरिया, “अहम बोर! रिमुःमे। ईसू आमे राःतना।” 50हनते आँयग ओयोनेना हना सोनहे तेके एंडातेडखने रेमयान अरू ईसू एचेरेय सोदोरयान।
51दो ईसू हाँय एचेरेय होंबोरतेरा, “चिलाम चहाःतना, ईंग आम लगायिंग एचेय?”
दो हाँयग अंधा होड़ कतातेरा, “ने रबबी, ईंग ञेल लगायिंग चहाःतना।”
52दो ईसू हाँय एचेरेय कताया, “दूमे, ओड़ाःमे सलाव जुवाः। आम बिसवासतेरा, हनालगा भगवान आमे नपायगोतेडा।” हननमेला हाँयराः मेड नपाययान अरू ईसू देह दूर हाँय हों तोराय।
Valgt i Øjeblikket:
मरकूस 10: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.