Psom 102
102
Lapriyer enn zenes dan lapenn
Lapriyer enn malere ki nepli ena lafors. Li expoz so konplint devan LESEGNER.
1SEGNER, ekout mo lapriyer;
ekout mwa kriye mo detres.
2Kan mo bizin led, pa vir to ledo
kan mo dan detres;
ekout mo lapriyer,
pa tarde pou reponn mwa.
3Parski lafime mo lavi pe disparet
e mo lekor pe konsome dan dife.
4Mo kouma lerb sek ki kraze dan later
e manze mo nepli anvi manze.
5Mo plengne for-for;
mo finn vinn lapo-lezo.
6Mo kouma enn zwazo sovaz dan dezer;
enn ibou dan rwinn abandone.
7Dormi mo pa dormi;
mo kouma enn zwazo soliter
tousel lor enn twa lakaz.
8Toulezour mo lennmi provok mwa;
pe servi mo nom pou zet malediksion.
9Akoz to mekontan ek ankoler ar mwa
lasann finn ranplas mo dipin,
10e larm plin mo goble.
To finn balie mwa, zet mwa dan kwin.
11Mo lavi pase kouma lonbraz aswar,
mo kouma lerb sek.
12Me twa SEGNER, tomem lerwa eternel;
sa, enn lasenn zenerasion zame pou bliye.
13To pou drese e montre pitie pou Sion;
ler finn vini pou montre li to faver;
wi, vremem so ler finn vini aster.
14Bann ki kontan twa zot osi kontan li
mem si li finn konn destriksion;
zot ena boukou sagrin pou li
mem si zordi Sion li an-rwinn.
15Bann nasion zot respe LESEGNER;
bann lerwa lor later ena reverans pou li.
16LESEGNER pou rekonstrir Sion
e li pou montre so laglwar.
17Li pou tann soufrans so pep abandone
e li pou exos zot lapriyer.
18Dan lintere zenerasion fitir, anou ekrir sa,
koumsa bann ki pa ankor ne kapav enn zour sant so louanz:
19depi lao dan so sanktier LESEGNER ti get anba;
depi lesiel lao li ti get later,
20pou li tann bann prizonie pe kriye zot soufrans,
pou li liber bann ki ti dan koulwar lamor.
21Akoz sa nou pou onor so nom dan Sion;
nou pou loue li dan Zerizalem
22kan dimounn partou kote zwenn
e bann rwayom osi, pou ador LESEGNER.
23LESEGNER finn afebli mwa, mem mo ankor zenn;
li finn tay longer mo lavi.
24Lerla mo dir, “Bondie, pa pran mo lavi aster-la, mo ankor zenn;
Twa, ki viv depi touzour e pou touzour!”
25Ena lontan to ti kree fondasion later
e ar to prop lame to ti fer lesiel.
26Kan to kreasion disparet, twa to pou touzour la;
kouma vie latwal zot pou defile ek desire.
To sanz zot kouma linz, zot zistwar pou fini lamem.
27Me twa to pa sanze, to lavi pa konn finision.
28Nou to serviter, e nou zanfan pou viv an sekirite,
zanfan nou zanfan pou viv anpe dan to proteksion.
Valgt i Øjeblikket:
Psom 102: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.